JOP 18
18
Jenari ngerana ka Bildat nina,
1-2“O Jop,
ndigan atendu ngadi ngeranai?
Sinik kam lebe,
maka ibelasken kami kata kami.
3Engkai maka iakapndu kami motu,
dingen ipeserindu kami ras lembu?
4Adi merawa kam,
dirindu nge ngenca isakitindu.
Akapndu kin maka erkiteken rawandu,
doni enda arus itadingken
janah deleng-deleng ipindahken?
5Lampu kalak jahat inimpeti pagi dungna,
janah dapurna ndigan pe lanai gara. #Jop 21:17
6Sapo-sapo ingan tading si gelgel terang,
jadi gelap
lampu i babo takalna nimpet asa lalap.
7Jingkangna si paguh,
genduari mbewat-mbewat,
rencanana jine erbahanca ia jurembat.
8Erdalan ia kempak siding,
nahena kena ranjo i bas lubang.
9Tukul-tukulna leket i bas ragum,
siding erbahanca ia jertuh.
10Ragum i bas taneh terbuni bana,
siding enggo itogeng i bas dalanna.
11Kebiaren ngerimrimi ia kelewet,
tiap ia njingkang,
kebiaren tetap ngikut-ngikut.
12Cilaka nggempangi ia bagi arimo si melihe,
kearun nemani ia ku japa pe.
13Dagingna serser kena penakit si mekelek,
si mahanca tanna ras nahena jadi macik.
14Ia isaren i bas sapo-sapo ingan tading nari,
i ja iakapna ia aman,
i jenari ia ibaba ngadap raja kematen.
15Kalak si deban ngiani sapo-sapo ingan tading,
kenca kertah icaburken guna mersihken kumanna.
16Kalak jahat bali ras batang kayu si kerah uratna,
dingen si melus ranggas-ranggasna.
17I belang-belang doni lanai ise pe nandai ia,
janah lanai ise pe nginget gelarna.
18Ia ianjemken i bas terang nari ku kegelapen,
ipelawes nadingken doni kegeluhen.
19Anak ras sinursurna la lit sada pe,
enggo keri kerina anak kutana ndube.
20Kalak si megi nasipna,
subuk i barat bage pe i timur,
kerina nggirgir dingen gentar.
21Bage me jadina man kalak si nadingken Dibata
kalak si la mbiar man baNa.”
Currently Selected:
JOP 18: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
