JOP 14
14
1Mula tubuhna nari pe, manusia la ergegeh dingen kote.
Gendek-gendek ngenca umurna, tapi dem kesusahen dingen si mesera.
2Desken rudang-rudang kap manusia,
pedas terlak, pedas ka permelusna.
Desken awih-awih permasapna, asa lalap bene ia.
3O Dibata, nggit kin Kam natap aku?
Ntah pe maba aku ku pengadilenNdu?
4Banci kin turah si mehuli
i bas kalak si meluat nari?
5Umur manusia enggo leben itetapkenNdu,
beligan bulanna pe enggo tertentu.
Enggo igariskenNdu batas geluhna, janah lanai banci ikeparina.
6Olanai pernehen ia, pelepas ia ersenang-senang;
gelah banci meriah akapna seh dahinna si mberat enggo dung.
7Man kayu si itabah, pengarapen lit denga;
sabap kedungenna reh denga tunasna.
8Reh tuana gia uratna,
dingen i teruh taneh macik tongkehna,
9tapi kenca kena lau,
mulihi ia ertunas bagi sinuan-sinuan mbaru.
10Tapi adi mate manusia, enggo dung kerajangna.
Mutus kesahna, ku ja dage ia?
11Bagi lau i bas telagah reh urakna,
bagi lau anak ngersap dingen kerah dungna,
12bage me manusia si enggo mate, asa ndigan pe lanai ia keke.
Lanai ia keke kidekah langit lit denga, kenca enggo medem,
lanai ndigan pe ia medak.
13I bas doni kalak matelah buniken aku,
bunikenlah, seh enggo lepas rawaNdu.
Jenari tetapkenlah sada paksa si tertentu, i ja iingetNdu ka mulihi aku.
14Kenca mate manusia, banci kin ia nggeluh ka?
Wari ku wari aku tertima-tima,
seh lepas paksa kesusahenku enda.
15I je kualoi me Kam, sanga aku ilebuhNdu.
Tedeh ateNdu aku, bekas tinepaNdu.
16E maka iperdiatekenNdu perjingkangku,
tapi lanai ibeligaiNdu dosa-dosangku.
17IalemiNdu salahku janah ipedauhNdu.
Kerina kelepaken si enggo kubahan isasapkenNdu.
18Lit pagi paksana deleng-deleng runtuh,
janah lingling batu pe pindah;
19batu-batu reh nipesna ikiskis lau,
janah udan meder ngombakken taneh.
Bage me pengarapen manusia ibenaiNdu.
20Kedungenna, italukenNdu ia,
e maka asa lalap masap me ia.
Sambar ayona, tupung ipelawesndu ia.
21Anak-anakna jadi kalak si ermulia, tapi si e la itehna;
janah adi anak-anakna jadi meluat, la lit kalak si meritakenca man bana.
22Si mesui dagingna saja ngenca igejapna,
atena ceda saja ngenca inanamina.”
Currently Selected:
JOP 14: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
