JOP 15
15
PERCAKAPEN SI PEDUAKEN
15:1–21:34
Kenca bage erjabap ka Elipas nina,
1-2“Cakapndu ena Jop, cakap si sea-sea kap.
3Labo lit kalak pentar i ja pe
si ngerana bagi kam e.
Labo ia nggit mbela dirina.
4Adi iikutken katandu ena,
lanai lit kalak erkemalangen tah ertoto man Dibata.
5Arah cakapndu tangkas maka kam ersalah tuhu-tuhu,
tapi alu kebeluhen ngerana lepakndu ibunikenndu.
6La perlu kam kuukum,
sabap kata-katandu jine ngukum kam.
7Akapndu kin kam manusia si pemena?
Enggo kin kam lit ope deleng-deleng itepa?
8Idengkehndu kin kai rencana Dibata?
Kam kin ngenca si mada kepentaren manusia?
9Pemetehndu labo lebih asa pemeteh kami;
pengertinndu pe labo ngelebihi kami.
10Kepentaren kami idat kami
i bas tua-tua si enggo ubanen,
janah ope bapandu tubuh,
enggo ia lit leben.
11Kurang meherga kin akapndu ndia
maka itulakndu pengapul Dibata?
Enggo ibelasken kami bekas kataNa jine,
alu manjar-anjar dingen medale.
12Tapi ngkai maka pusuhndu gara
dingen matandu merlang?
13Merawa kam kempak Dibata
dingen alu katandu ndai ilawanndu IA.
14Adi manusia, banci kin la lit sitik pe dosana?
Banci kin ia benar i adep-adepen Dibata? #Jop 25:4-6
15Nandangi malekatNa pe la tek Dibata
la lit sada pe bersih i bas pengadilenNa;
16apai ka nandangi manusia si meluat dingen ilat,
si bali akapna ras minem lau ngelakoken si jahat?
17Begiken, Jop,
enda kuturiken si enggo kuidah man bandu,
18bage pe si enggo iajarken kalak pentar man bangku.
Kepentaren e idatca i bas nini-ninina nari,
si la sitik pe ngahanken pemetehna terbuni.
19Sanga si e langa lit bangsa si deban i bas negerina,
la lit si mabai ia papak nandangi Dibata.
20Kalak jahat si merawa nipu,
kidekah geluhna tetap mbiar dingen aru.
21Sora si mejin ibegina la erngadi-ngadi,
i tengah-tengah kesenangenna ia irampuki.
22La lit arapenna pulah i bas kegelapen nari,
sabap pedang si nampul ia enggo nimai,
23perik-perik pe sangana tertima-tima,
gelah bangkena ipanganina.
Genduari enggo itehna,
matawari si pagi gelap man bana.
24Desken sekalak raja si mbisa,
mara enggo sikap nggempangisa.
25Bage me kalak si ngelawan Dibata,
si pang nimbang si Mada Kuasa.
26Alu megombang ilawanna Dibata;
perban mekapal ampang-ampangna,
akapna banci ngeligeni ia.
27Tuhu enggo senang gia akapna
enggo melala ipepulungna erta;
28kuta-kuta pe ikuasaina
dingen irampasina rumah-rumah si enggo itadingken empuna.
Tapi kuta-kuta ras rumah-rumah si bage,
nandangi kernep dingen bene.
29Kebayaken masap la tahan ndekah,
bekasna ndube pe lanai teridah.
30I bas kegelapen nari la banci ia pulah.
Desken kayu kap ia,
tunasna kerah ibahan api si gara.
Reh ka pe angin si rembus,
bungana nartar jenari melus.
31Adi ernalem ia kempak kejahaten si sia-sia,
e nipu bana me kap gelarna;
ngalo upah me ia dungna,
upah kejahaten si la erguna.
32Mate me ia ope paksana seh,
lanai mulihi meratah desken dahan kerah.
33Ia bali ras batang anggur,
langa pe tasak, buahna enggo nartar.
Desken batang saitun,
bungana keri ndabuhen.
34Kalak si la erdibata,
la lit kesusurenna.
Janah keri ipan api
rumah si nipajekken arah duit penipun.
35Bage me kalak si ngerancang ras ndalanken kejahaten,
perukurenna dem alu pertakin.”
Currently Selected:
JOP 15: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
