JOP 13
13
1-2Kai si ikatakenndu, enggo me mbarenda kubegi.
Kerina nge kuerti, pemetehku bali nge ras pemetehndu.
Aku labo bodohen asa kam.
3Tapi ras Dibata kap aku ersoal, labo ras kam;
ras IA nge kuranaken rananku.
4Kam itamburindu kebodohenndu alu guak;
kam desken sekalak doktor si la ngasup pepalem ise pe.
5Sinikken, maka iakap kalak kam pentar!
6Begikenlah asum aku nuriken ukurku.
7Engkai maka kam erbual?
Akapndu kin adi kam erbual untung Dibata?
8Ikapitindu kin atendu Dibata?
Ibelandu kin atendu IA i pengadilen?
9Adi ipepayo Dibata kam alu megermet, lit kin datca si mehuli i bas kam?
Akapndu kin banci itebu-tebundu Dibata, bagi penebu-nebundu manusia?
10Aminna gia alu erbuni-buni ikapitindu Dibata,
ugapa pe iukumNa nge kam alu mesangat,
11dingen kemulianNa mahanca kam mbiar mekelek.
12Kuan-kuanenndu desken abu si la erguna,
nasihatndu murah meripuk bagi taneh dah.
13Sip kam lebe maka aku ngerana,
janah uga kari jadina man bangku bagelah.
14Aku enggo sikap ngasamken kesahku.
15Enggo bene kerina pengarapenku; dage adi ibunuh Dibata gia aku, labo dalih.
Ateku nuriken soalku terang-terangen man baNa.
16Banci jadi erkiteken si e maka aku selamat,
sabap labo lit kalak jahat si pang ngadap Dibata.
17Genduari begikenlah rananku alu manjar-anjar, begikenlah keterangenku.
18Aku enggo sikap nuriken soalku,
sabap kueteh maka benar nge aku.
19Dibata, iadukenNdu kin ateNdu aku?
Adi bage sinik nari nge aku jenari mate.
20Tapi berekenlah pemindonku si dua erbage enda,
maka lanai aku cebuni i adep-adepenNdu,
21olanai ukumNdu aku, olanai ipebiar-biarNdu aku alu dolatNdu si rejin.
22Ngeranalah Kam, maka kujabap.
Tah pelepas aku ngerana, janah Kam njabapsa.
23Asa kai kin buena salah ras dosangku?
Pebetehkenlah bangku kerina lepakku.
24Engkai maka isilahkenNdu aku rusur?
Kai sabapna maka musuhNdu akapNdu aku?
25Aku la lebih asang bulung-bulung si enggo ndabuh.
Kai gunana aku igunjak-gunjakNdu?
Aku desken nggala si enggo kerah,
kai ertina aku iayak-ayakNdu?
26IberekenNdu ukumen si pagit man bangku,
ibalasNdu kesalahen-kesalahenku paksa ngudangku.
27IiketNdu nahengku alu rante;
tiap aku njingkang ipernehenNdu,
seh maka tapak-tapak nahengku pe tetap iperdiatekenNdu. #Jop 33:11
28E maka buruk dagingku desken kayu si enggo burburen;
desken selambar baju si enggo ngetngeten.
Currently Selected:
JOP 13: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
