JOP 12
12
Kenca bage erjabap Jop nina,
1-2“Kam me tuhu sora jelma si nterem.
Adi mate kam, kepentaren pe mate ras kam.
3Tapi kebeluhenku rukur bali kap ras kam.
Labo aku bodohen asa kam;
kerina kap kalak metehsa kai si enggo iturikenndu.
4Teman-temanku jine pe enggo nguncimi aku genduari;
itawaina aku, aminna aku benar dingen sitik pe la ersalah;
tapi pernah nge mbarenda pertotonku ialoi Dibata.
5Kam la lit kesusahenndu, tapi ipesega-segandu aku,
itukulndu kalak si nandangi guling.
6Tapi pinangko ras kalak si la erdibata nggeluh alu senang,
aminna gia si jadi dibatana e me gegehna saja.
7Perik-perik ras rubia-rubia si deban pe
melala banci iajarkenna bandu;
8pindolah kepentaren man rubia-rubia si nggeluh i babo doni enda
ras si ni i bas lawit.
9Kerina rubia-rubia e metehsa
tan TUHAN kap si nepa ia.
10Dibata kap si negu-negu kegeluhen tinepaNa;
kesah manusia lit i bas tan Dibata.
11Tapi bali ras dilahndu entabeh akapna ncecap pangan,
bage pe cupingndu entabeh akapna megi-megi ranan.
12-13I bas kalak si enggo metua lit kepentaren,
tapi i bas Dibata lit kepentaren ras gegeh.
Pengertin pe lit i bas kalak si enggo metua;
tapi i bas Dibata lit pengertin ras gegeh guna ndalankenca.
14Adi Dibata si ngeruntuhkenca, ise ngasup majekkenca mulihi?
Janah ise ngasup mulahisa kalak si ipenjaraken Dibata?
15Musim perlego reh adi Dibata natang udan;
tapi adi tambak lau iburtaskenNa, reh banjir.
16Dibata megegeh kap, janah IA tetap menang;
subuk si itebu-tebu bage pe si penebu-nebu lit i bas kuasaNa.
17Kepentaren penguasa itangtangina,
janah peminpin bagi kalak mehado ibahanNa.
18Kuasa raja-raja iruntuhkenNa,
janah ibahanNa raja-raja jadi tabanen;
19ipeterukNa imam-imam ras kalak si erkuasa.
20IpesinikNa kalak si terteki,
janah kepentaren tua-tua itangtangiNa.
21Mela akap kalak si erkuasa ibahanNa,
janah ipeltepkenNa gegeh si erkuasa.
22IbahanNa terang ersinalsal kempak doni kematen si gelap.
23IbahanNa bangsa-bangsa megegeh dingen ermulia,
tapi kedungenna italukenNa dingen ikernepkenNa bangsa-bangsa e.
24Peminpinna ibahanNa jadi motu
janah ipelepasNa mampa-mampa dingen papak;
25dadap-dadap ia i bas gelap
janah mbewat-mbewat bagi kalak mabuk.
Currently Selected:
JOP 12: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
