JOP 11
11
Kenca bage ibenaken Sopar ka ngerana nina,
1-2“La kin lit ise pe njabapsa cakapndu si sea-sea e?
Banci kin cakap gedang mahan kalak jadi benar?
3O Jop, akapndu kin la kami ngasup njabap kam?
Ntah rananndu si meganjang e erbahanca kami lanai ngasup sumekah?
4Ikatakenndu maka benar kerina si ikatakenndu;
janah kam la erpandangen i adep-adepen Dibata.
5Ijabap Dibata kam min, maka itehndu!
6Gelah iturikenNa bandu kepentaren melala damparna;
melala perkara si la ngasup manusia ngantusisa
ukumen si ibahan Dibata kurangsa denga asa si patut ialokenndu.
7Ngasup kin kam nibarisa uga belinna kemulian Dibata?
Dingen uga belinna kuasaNa?
8Dibata ganjangen asa langit,
tapi kam, langit pe la terjakandu.
Dibata meteh doni kematen,
tapi kam la ietehndu.
9Kemulian Dibata belinen asa doni enda,
belangen asa lawit.
10Adi itangkap Dibata kam, jenari iadiliNa kam,
ise kin si banci ngambatisa?
11Itandai Dibata apai kalak si la erguna;
iidahNa kerina perbahanenna si jahat.
12Adi indung kelede kerangen petubuh kelede si melemuk,
e maka kalak motu banci jadi pentar.
13Pehulilah perukurenndu, o Jop.
Dadakenlah tanndu ertoto man Dibata.
14Asa kai si jahat dingen salah,
pedauhlah i bas rumahndu nari.
15Jenari alokenlah doni enda
alu tetap ukur dingen la biar-biaren.
16E maka kerina kesusahenndu jadi lupa,
bali ras banjir si enggo lepas lanai inget.
17Kegeluhenndu jadi terang, terangen asa las matawari sanga pantek ciger,
janah paksa-paksa kegeluhenndu si gelapna kal,
jadi ersinalsal desken matawari mbincar erpagi-pagi.
18Senang akapndu nggeluh, dem pengarapen;
Dibata ngkawali kam janah mereken ketenangen man bandu.
19Nandangi musuh-musuhndu la kam mbiar,
janah nterem kalak mindo penampat man bandu.
20Tapi mata kalak jahat jadi meriben,
itatapna kelewet tapi la lit dalanna pulah.
Pengarapenna sada nari ngenca: Kematen.”
Currently Selected:
JOP 11: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
