JEREMIA 7
7
Jeremia erkhotbah i bas Rumah Pertoton
1-3 TUHAN nuruh aku ku pintu gerbang Rumah Pertoton; arah e me bangsa Juda bengket ersembah. IkatakenNa man bangku maka tedis aku i je meritaken man bangsa e kai si ikataken TUHAN si Mada Kuasa, Dibata Israel man bana nina, “Ubahlah lagu langkah ras perbahanenndu, e maka Kupediat kam terus ringan i jenda. 4Olanai itekindu ranan penipu si ngatakenca, ‘Terkelin kap kita! Enda kap Rumah Pertoton TUHAN, enda kap Rumah Pertoton, enda kap Rumah Pertoton TUHAN!’
5Ubahlah lagu langkahndu, olanai perusur-usur perbahanenndu. Bahanlah si bujur sapih-sapih kam, 6olanai idehkenndu kalak asing, anak-anak melumang ras diberu balu-balu. Olanai iamburkenndu dareh kalak si la ersalah i bas negeri enda. Olanai kam nembah man dibata-dibata si deban si erbahanca kam ceda. 7Adi kam robah, Kubere kam terus ringan i jenda, i bas negeri si enggo Kubereken jadi sikerajangen nini-ninindu rasa lalap seh rasa lalap.
8Nehenlah! Pengarapenndu itamakenndu man ranan si la tuhu. 9Kam nangko, munuh, erlua-lua, melasken sumpah si la tuhu, nutung persembahen man Baal, nembah man dibata si la itandaindu. 10Ilakokenndu kerina si ciga ateKu e, kenca bage reh kam dingen tedis i adep-adepenKu, i bas Rumah PertotonKu, jenari nindu, ‘Terkelin kap kita!’ 11Iakapndu kin maka RumahKu e ingan penamun? Enggo Kuidah kerina kai si ibahanndu. #Mat 21:13; Mrk 11:17; Luk 19:46 12Laweslah ku Silo, ingan si pemena Kupilih man inganKu isembah. Nehenlah kai si Kubahan man ingan e erkiteken dosa-dosa bangsangKu Israel. #Jos 18:1; Msm 78:60; Jer 26:6 13Enggo ilakokenndu kerina dosa si enda, aminna pe enggo Kuulih-ulihi ngerana man bandu, tapi la kam nggit megikenca. Adi Kulebuh kam la kam ngaloi. 14E maka kai si enggo Kubahan kempak Silo, Kubahan ka me kempak Rumah PertotonKu, penalemenndu e. I jenda i bas ingan si enggo Kubereken man nini-ninindu ras man bandu seri perbahanenKu bagi si Kubahan man Silo. 15Kupelawes kam i adep-adepenKu nari, bali ras pemelawesKu sima-simandu Israel. Aku kap TUHAN si enggo ngerana man bandu.”
Israel la patuh
16Nina TUHAN, “O Jeremia, ola ertoto guna bangsa enda. Ola kam erlebuh entah ertoto guna ia, ola sekseki Aku, sabap labo kam Kubegiken. 17La kin idahndu kai si ibahanna i bas kuta-kuta Juda ras i gedang-gedang dalan Jerusalem? 18Anak-anak pepulung ranting, dilaki-dilaki pegara api, diberu-diberu erbahan cimpa guna ipersembahken man dibata-dibata si igelarina Kemberahen Langit. Ipirpirkenna pe lau anggur kempak dibata si deban, gelah arah e mesui ateKu ibahanna. #Jer 44:17-19 19Tapi ateKu kin mesui? Lang! Bana jine nge ijurukenna dingen ia nge si erbahanca akapna mela. 20Dage Aku TUHAN si Erdolat Kutungkasken me pernembeh ateKu si gara ku Rumah Pertoton e. Kutungkasken e ku babo manusia ras ku asuh-asuhenna, ku batang-batang kayu, ras ku ulih jumana. NembehKu bali ras api si gara, janah la ise pe ngasup nimpetisa.
21O bangsangKu, deba itutungndu persembahenndu i babo batar-batar, deba banci ipan kam. Tapi Aku TUHAN ngatakenca maka labo lit lainna bicara kerina gia ipanndu. 22Tupung nini-ninindu ndarat i Mesir nari labo perentah-perentah kerna persembahen tutungen si Kubereken entah aturen-aturen kerna persembahen si deban. 23Tapi perentah si Kubereken e me maka erkemalangen man bangKu, gelah Aku jadi Dibatana dingen ia jadi bangsangKu. Kukataken man bana maka ia nggeluh rikutken si enggo Kuperentahken, alu bage si mehuli jadi man bana. 24Tapi la ia patuh, la diatena pe. Alu merawa ilakokenna rikutken ate-atena, dingen sura-surana si jahat nge iikutkenna. Lagu langkahna reh jahatna, labo reh ulina. 25Menaken kin tupung nini-ninindu ndarat i Mesir nari seh ngayak paksa enda la erngadi-ngadi. Kusuruh persuruhenKu nabi-nabi ku tengah-tengahndu. 26Tapi ise pe la lit si erdiate. Ise pe la lit megikenca. Tapi reh kam ngelawan lebihen asa nini-ninindu nai.
27E maka, o Jeremia, kam me melasken kerina ranan enda man bangsangKu, tapi labo kam idengkehkenna. Ilebuh kam ia tapi labo kam diatena pe. 28Turikenlah man bana maka bangsana la ngikutken Aku, TUHAN Dibatana; la ia erlajar arah ukumen si ialokenna. Kepatuhen man TUHAN lanai lit i bas ia. Si e kerina lanai sitik pe icakapken.”
Dosa si ilakoken i Baluren Hinnom
29“Erceda atelah, o kalak Jerusalem;
guntinglah bukndu, ambekkenlah.
Endekenlah ende-enden ate ceda i datas ancuk-ancuk deleng,
erkiteken Aku TUHAN sangana keke rawangKu,
enggo Kutulak bangsangKu.
30Kalak Juda enggo ngelakoken si jahat. Iamparkenna gana-ganana si ciga ateKu i bas Rumah Pertoton, enggo iliamina e. 31I Baluren Hinnom ipajekkenna batar-batar si ibahanna gelarna Topet, gelah banci ipersembahkenna anakna si diberu ras si dilaki i datas api si gara. La lit perentahKu man bana lako erbahan bage – labo lit sitik pe e i bas ukurKu. #Im 18:21; 2Raj 23:10; Jer 32:35 32Janah seh me paksana ingan e lanai igelari Topet entah Baluren Hinnom, tapi Baluren Penggelehen, sabap i je ikuburina jelma erkiteken lanai lit ingan si deban ingan ngkuburkenca. 33Bangke-bangke e ipangani perik-perik dingen rubia-rubia si meliar janah ise pe la lit si nggurbasa. 34Negeri e jadi taneh mesawang. I kuta-kuta Juda dingen i dalan-dalan i Jerusalem lanai Kubahan lit i je sora surak-surak dingen sora keriahen. Lanai lit i je sora pesta erdemu bayu si meriah. #Jer 16:9; 25:10; Ket 18:23
Currently Selected:
JEREMIA 7: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
