JEREMIA 8
8
1I bas paksa si e, ipedarat kalak me i bas kuburenna nari kerina tulan raja-raja Juda, tulan pegawaina, tulan imam-imamna, tulan nabi-nabi, ras kerina tulan kalak si ringan i Jerusalem. 2Kerina tulan-tulan e lanai ipepulung, lanai ikuburken, tapi marpar-merap bagi sampah-sampah i babo taneh, i teruh matawari, bulan ras bintang-bintang, si nai ikelengi, itami-tami ras isembah bangsa enda. 3Janah kerina kalak si tading denga ibas bangsa si jahat enda, madin iakapna mate asangken nggeluh i bas ingan i ja ia Kukerapken. Aku, TUHAN si Mada Kuasa enggo ngerana.”
Dosa dingen pengukumen
4Isuruh TUHAN aku melasken kata enda kempak bangsaNa, “Adi guling sekalak jelma lanai kin ia keke mulihi? Adi sekalak jelma papak lanai kin ia mulihken? 5Dage ngkai maka bangsangKu kenca ia erkusur nadingken Aku, lanai mulihken? Leket ukurndu kempak gana-ganandu, e maka la atendu mulihken man bangKu. 6Megermet Kubegiken, tapi la kam ngerana kerna si bujur. Sekalak pe kam la lit erkadiola kerna kejahatenndu; ise pe kam la lit nungkun, ‘Kesalahen kai kin si enggo kubahan?’ Sekalak-sekalak ndalani dalanna desken kuda kiam ku peperangen. 7Perik ondan pe ietehna katawari paksana mulih; nderapati ras kalimpines tehsa katawari paksana miser, tapi kam o bangsangKu la itehndu undang-undang TUHAN. 8Uga banci maka nindu kam pentar, dingen itehndu undang-undangKu? Nehenlah, undang-undang enggo iganti kalak si beluh nuratken undang-undang. 9Kalak pentar si lit i bas kam enggo juru, sengget dingen kena siding. Enggo itulakna katangKu. Kepentaren si kuga kin kepentarenna e genduari? 10Dage Kubereken me ndeharana man kalak si mbaru reh, erkiteken kerina kalak subuk i bas si kitikna nari terus ku si mbelinna, kerina encari arah dalan si la bujur. Sabap subuk imam-imam bage pe nabi-nabi kerina nipu bangsa e. #Jer 6:12-15 11Ibahanna tempa-tempa penakit bangsangKu la mekelek. ‘Dame’ nina ia situhuna la bo dame. #Esek 13:10 12Erkiteken ilakokenna perbahanen si macik e kin maka mela akapndu? Lang! La sitik pe ietehndu mela, ayondu pe la sambar. E maka guling kam bagi kalak si deban. Tupung Kuukum kam, e me pengkeri-kerin geluhndu. Aku TUHAN kap si ngerana.
13Kupepulung ateKu bangsangKu desken sekalak pepulung ulih peranin; tapi bangsangKu bali ras batang anggur si la erbuah, desken batang ara si la erbuah, bulungna pe enggo melus. E maka Kupelepas bangsa si deban engkuasai negeri e.”
14Nina bangsa Dibata, “Engkai maka kita kundul saja? Ota kiam kita ku kuta-kuta si erbenteng janah i jah me kita mate. Sabap TUHAN Dibatanta enggo mereken ukumen man banta. Enggo iberekenNa racun man inementa, erkiteken dosa-dosanta man baNa. 15Siarapken lit dame ras paksa juah-juahen tapi kebiaren kap si jadi. 16Imbang-imbangta enggo seh i kuta Dan. Sora kudana ngengkus enggo terbegi. Kerina negeri-negeri nggirgir tupung kudana erngih-ngih. Imbang-imbangta enggo reh ngkernepken negerinta dingen kerina si lit i je, subuk kuta-kutana bage pe kalak si ringan i je.”
17“Jagalah!” nina TUHAN, “Kusuruh nipe ku tengah-tengahndu, nipe si erbisa si la terpelemuk, janah itagutina kam.”
Ceda ate Jeremia erkiteken bangsana
18Ceda ateku la tertambari,
mesui kal pusuhku.
Dengkehkenlah! I negeri si ndauh nari,
kubegi sora bangsangku tangis.
19“Lanai kin TUHAN i Sion?
Lanai kin i jah raja Sion?”
Ngaloi TUHAN, Rajana nina,
“Engkai kin maka ilegindu rawangKu alu nembah man dibata-dibatandu,
dingen erjimpuh man dibata si deban si sia-sia?”
20Serko bangsa e nina,
“Paksa perudan enggo lepas, paksa rani enggo seh,
tapi kami lalap la isampati.”
21Getem kal pusuhku
erkiteken bangsangku enggo getem.
Ceda ateku; sengget kal aku.
22La kin lit tambar i Gileat?
La kin lit i jah dokter?
Dage ngkai maka bangsangku la itambari?
Currently Selected:
JEREMIA 8: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
