HAKIM-HAKIM 17
17
Gana-gana si Miha
1Lit sekalak dilaki, Miha gelarna. Ia ringan i deleng-deleng Eperaim. 2-4I bas sada wari nina man nandena, “Nande, sanga bene senndu seribu seratus duit pirak, kubegi maka isumpahindu si nangkosa. Aku kap si nangkosa, nande, enda duitndu e.” Jenari iulihken Miha duit e man nandena.
Nina nande Miha, “Ipasu-pasu TUHAN kam anakku!” I bas si seribu seratus duit pirak e nari, ibuat nande Miha dua ratus, jenari iberekenna man sekalak tukang pirak. E maka ibahan tukang pirak ndai sada gana-gana kayu, jenari ilapisina alu pirak. Patung e ibereken nandena man Miha nina, “Duit pirak ndai enggo kupake erbahan gana-gana enda. Sabap aku erpadan ngendesken duit pirak e man TUHAN, gelah kam anakku, pulah i bas sumpah si enggo kubelasken.” E maka itamaken Miha gana-gana e i bas rumahna.
5Si Miha ndai lit ingan sembah-sembahenna. Ibahanna piga-piga gana-gana, ras sada baju epod, kenca bage itangkuhkenna sada anakna dilaki jadi imamna. 6La lit raja i Israel i bas paksa e, e maka tiap kalak erbahan bagi atena ngena. #Hak 21:25
7I bas paksa e ka lit sekalak anak perana i bas suku Lewi nari. Ia ringan i kuta Betlehem i daerah Juda. 8Itadingkenna Betlehem, ndarami ingan i ja ia banci nggeluh. I bas perdalanenna e, seh ia i rumah Miha i deleng-deleng Eperaim. 9Isungkun Miha ia nina, “I ja nari kam?”
Nina anak perana e njabapsa, “Aku sekalak Lewi i Betlehem i daerah Juda nari. Aku ndarami ingan i ja aku banci nggeluh.”
10E maka nina Miha, “Ras kita i jenda gelah kam jadi penasehat ras imamku. Kubereken man bandu sepuluh duit pirak sada tahun, piga-piga baju ras nakanndu.” 11Anak perana suku Lewi e nggit tading ras Miha e maka enggo ia seri ras anakna si dilaki. 12Itangkuhken Miha anak perana e jadi imam, janah i rumah Miha ia ringan. 13Nina Miha, “Genduari enggo lit sekalak suku Lewi jadi imamku, erkiteken si e ugapa pe ijujurken TUHAN nge si mehuli man bangku.”
Currently Selected:
HAKIM-HAKIM 17: BTX
Highlight
Share
Compare
Copy
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
