HAKIM-HAKIM 18
18
Miha ras suku Dan
1I bas paksa e la lit raja i Israel, janah i bas suku-suku Israel suku Dan langa ndat taneh. Dage suku Dan sangana ndarami taneh jadi daerahna. 2E maka ipilihi kalak Dan lima kalak dilaki si mbisa i bas ia nari. Kenca bage isuruhna berkat i kuta Sorah ras Estaol alu perentah niari negeri e. Kenca ia seh i deleng-deleng Eperaim, ngadi ia i bas rumah Miha. 3Sanga ia i je itandaina logat cakap anak perana suku Lewi e. E maka isungkunna ia nina, “Erkai kam i jenda? Ise maba kam seh ku jenda?”
4Nina njabapsa, “Lit arih kami ras Miha, maka igalarina gajingku gelah aku jadi imamna.”
5Nina kalak ndai man anak perana e, “Cubaken sungkun Dibata ntah lit ntah lang gunana perdalanen kami enda.”
6Nina imam e, “Ola aru atendu. TUHAN si ngarak-ngarak kam i bas perdalanenndu.”
7E maka lawes si lima kalak e nadingken ingan ndai ku kuta Lais. Iidahna kuga sikapna kegeluhen kalak si i je seri ras kalak Sidon. Dame, rayatna mehuli, la rubat-rubat, kai atena e lit. Ndauh ia i bas bangsa Sidon nari, janah la lit hubungenna ras kalak si deban. 8Kenca si lima kalak enda mulih ku Sorah ras Estaol, ngalo-ngalo kalak si sada suku ras ia janahna nungkun kai si ijumpaina. 9“Mari nina kalak e. Ota siserang Lais. Enggo idah kami negeri e, janah tuhu-tuhu kal mejile. Erkai kam i jenda? Ota! Lawes kita, gelah sibuat man banta negeri e! 10Kenca enggo kam seh i jah, tentu itehndu maka rayat negeri e sitik pe la curiga. Negeri e sada negeri si mbelin. I je kai atendu e lit, janah enggo ibereken Dibata negeri e man bandu.”
11E maka lit enem ratus kalak dilaki i bas suku Dan nari nadingken Sorah ras Estaol, enggo sikap erperang. 12Berkat ia ibahanna perkemahenna i Kiryat Jearim i Juda. E me sabapna maka ingan e igelari denga Perkemahen Dan. 13Kenca bage lawes ia i jenari e maka seh ia i rumah Miha i deleng-deleng Eperaim.
14Kenca e nina si lima kalak si enggo niar-niar i sekelewet Lais man rombongenna, “Ietehndu kang maka lit i jenda i bas rumah e gana-gana kayu si ilapisi alu pirak? Lit ka pe gana-gana si deban ras sada epod. Kai akapndu si arus sibahan?” 15E maka lawes kalak e ku rumah Miha, ingan anak perana suku Lewi e, janah ikatakenna mejuah-juah man bana. 16Sanga e tentera Dan si enem ratus si enggo ersikap ku peperangen, paksana tedis i pintu gerbang. 17Tapi mata-mata si lima kalak e erdalan terus ku bas rumah e, ibuatna gana-gana kayu si ilapisi alu pirak e, bage pe gana-gana si deban, ras epod, sedangken imam e tading i pintu gerbang ras tentera si enem ratus kalak e.
18Asum si lima kalak e lawes ku rumah Miha janah muati barang-barang si badia e, nungkun imam e nina, “Erkai kena e?”
19Nina kalak e erjabap, “Sinik saja kam, ola ngerana. Ikutken kami gelah kam jadi imam ras si ngajari kami. Apai akapndu ulin jadi imam man sada suku i bas bangsa Israel asangken jadi imam man keluarga sada jelma?” 20E erbahan meriah kal akap imam e, e maka ibuatna barang-barang si badia e, kenca bage iikutkenna kalak ndai.
21Kenca bage erkusur kalak e mulai ia erdalan ras anak-anakna, asuh-asuhenna, ras kerina sikerajangenna erdalan arah lebe. 22Enggo ndauh kalak ndai erdalan maka ilebuh Miha teman-temanna sada kesain gelah erperang. Kenca itundukna kalak Dan e, 23e maka erlebuh ia man bana. Erkusur kalak Dan, e maka isungkunna Miha nina, “Kai e? Man kai kerina rayat ena?”
24Nina Miha njabapsa, “Ola pekulah-kulahndu la ietehndu! Ibabandu imamku ras gana-gana si kubahan, jenari lawes kam! Kai nari i bas aku tading?”
25Nina kalak Dan, “Madin kam olanai ngerana adi la atendu reh rawa kalak enda, ola kam kari iserangna. Kenca bage mate kari kam ras kerina keluargandu.” 26Kenca bage iteruskenna perdalanenna. Perbahan idah Miha maka gegehen kalak Dan asangken ia, erkusur ia e maka mulih ia ku rumahna.
27-28Kenca kalak Dan enggo maba imam ras barang-barang bahanen Miha, lawes ia, iserangna Lais, kuta si dame ras rayatna mehuli si ringan i Baluren Bet Rehop. Ibunuhna kerina rayat i bas ingan e, jenari icilukna kutana. Sada pe la lit nampatisa, erkiteken Lais ndauh i Sidon nari, janah la lit hubungen kalak enda ras rayat si deban. Kalak Dan manteki kuta e mulihi, e maka i je ia ringan. 29Isambarina gelar Lais jadi Dan rikutken gelar nini-ninina anak-anak Jakup; 30Ipajekken kalak Dan gana-gana e man sembahenna, e maka Jonatan, anak Gersom, kempu Musa erdahin jadi imam man suku Dan, janah sinursurna tetap jadi imam seh ngayak rayat Dan ibaba ku pembuangen. 31Gana-gana Miha tetap tading i jah kidekah rumah Dibata lit denga i Silo.
Currently Selected:
HAKIM-HAKIM 18: BTX
Highlight
Share
Compare
Copy
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
