HAKIM-HAKIM 15
15
1Piga-piga dekah kenca si e, e me tupung rani gandum, Simson lawes ndahi ndeharana. Ibabana sada anak kambing man luahna. Nina Simson man mamana, “Kudahi ateku anakndu ku kamarna.”
Tapi la ipediat mamana. 2Nina man Simson, “Kuakap kin mbarenda elem-elem atendu kempak ia, e maka kuserehken ia man dilaki si deban, e me temanndu jine. Tapi jilen kap agina. Banci ia buatndu jadi gantina.”
3Nina Simson, “Genduari la aku ersalah erkiteken kai si kubahan man kalak Pilisti!” 4E maka itangkapna telu ratus serigala. Tiap dua serigala ipudunkenna ikurna, janah itamakenna sada obor ku je. 5Kenca bage isaganina obor e, jenari ipulahina ku juma kalak Pilisti. E maka meseng kerina gandum si enggo iperani. Gandum si langa iperani ras peken anggur pe keri kerina meseng. 6Kenca isungkuni kalak Pilisti ise kalakna si ngelakoken si enda, ibegina maka Simson si ngelakokenca erkiteken mamana kalak Timnah enggo nerehken ndehara Simson man teman Simson jine. Erkiteken si e lawes kalak Pilisti nutung diberu e ras kerina isi rumah bapana seh keri.
7Jenari nina Simson kempak kalak Pilisti e, “Erkiteken bagenda perbahanendu, ersumpah aku maka la aku sinik adi langa aku erbalas man bandu kerina.” 8Simson merangi kalak Pilisti alu kejam dingen munuh nterem kalak. Jenari lawes, dingen ringan ia bas gua i datas sada deleng batu i Etam.
Simson naluken kalak Pilisti
9Reh kalak Pilisti erkemah i Juda, jenari iserangna kuta Lehi. 10Nungkun kalak Juda nina, “Engkai maka kami iserangndu?”
Jabap kalak Pilisti, “Kami reh ku jenda lako nangkap Simson, gelah banci ilakoken kami bagi pengelakona kempak kami.” 11E maka lawes 3.000 kalak Juda ku gua deleng batu i Etam. Nina man Simson, “O Simson, la kin ietehndu maka kalak Pilisti ngkuasai kita? Nehenlah kuga jadina perbahanenndu e man kami!”
Ngaloi Simson nina, “Kubahan man bana bagi perbahanenna man bangku.”
12Nina kalak Juda, “Kami reh ku jenda nangkap kam dingen ngendeskenca man kalak Pilisti.”
Nina Simson, “Erpadan kam lebe maka la ibunuhndu aku.” 13“Ue,” nina kalak Juda. “Ate kami pe nangkap kam ngenca dingen ngendeskenca kempak kalak Pilisti. Labo ate kami munuh kam.” Kenca bage iiketna Simson alu dua tinali si mbaru denga, jenari ibabana ndarat i bas gua e nari.
14Kenca seh i Lehi, reh kiam kalak Pilisti ngalo-ngalosa janahna ersurak-surak. Rempet reh kuasa TUHAN mereken gegeh man bana. Tinali si ngiket tanna iretapina, tempa meseng ipan api. 15Kenca bage idahna tulan isang kelede si mbaru denga. Ibuatna alu e ibunuhna 1.000 kalak Pilisti. 16E maka rende Simson,
“Alu isang kelede kugudam 1.000 kalak,
alu isang kelede kupegun-gun bangke-bangkena.”
17Kenca bage iambekkenna tulan isang kelede e. E me sabapna ibahan gelar ingan e Ramat-Lehi.
18Kenca bage muas kal Simson, e maka erlebuh ia man TUHAN, “O TUHAN, e denga kal iberekenNdu kemenangen si mbelin man bangku. Genduari arus kin aku mate muas, seh maka itangkap kalak Pilisti si la nandai Kam e aku?” 19E maka ipulka TUHAN lubang i bas uruk batu i Lehi e. Minem Simson, kenca bage senang ka iakapna. E me sabapna sumbul lau e ibahan gelarna Lau Hakor. Sumbul e lit denga genduari i Lehi.
20Dua puluh tahun dekahna Simson merentah kalak Israel, tupung e Israel ikuasai kalak Pilisti.
Currently Selected:
HAKIM-HAKIM 15: BTX
Highlight
Share
Compare
Copy
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
