HAKIM-HAKIM 14

Simson ras singuda-nguda i Timna nari

1I bas sada wari lawes Simson ku Timna. I je idahna sekalak singuda-nguda Pilisti. 2Mulih ia ku kuta, e maka ikatakenna man nande ras bapana nina, “Lit sekalak singuda-nguda Pilisti i Timna leket ukurku man bana. Sungkuni ia man bangku; erjabu ateku ras ia.” 3Tapi isungkun nande bapana ia nina, “Engkai maka kam lawes njumpai singuda-nguda i bas kalak Pilisti si la sada kiniteken ras kita? La kin lit idahndu singuda-nguda i bas terpukta, i tengah-tengah kerina bangsanta?”

Tapi nina Simson man bapana, “Ia ngenca ateku ngena, sungkunndulah ia man bangku.”

4La ieteh orang tuana maka TUHAN nge si mabaisa maka bage pengelako Simson, sabap TUHAN sangana ndarami dalan ngelawan bangsa Pilisti. Paksa e bangsa Pilisti merentah i Israel.

5Simson lawes ku Timna ras bapana ras nandena. Sanga ia mentasi peken anggur, ibegina sada singa nguda erdengum. 6Rempet Simson megegeh perbahan kuasa TUHAN, e maka icaingkenna singa e, alu tanna saja, desken ncaingken anak kambing. Tapi la iturikenna man orang tuana kai si enggo ibahanna.

7E maka lawes Simson janah icakapina singuda-nguda e sabap ngena kal atena. 8Kenca piga-piga wari mulihken ka ia ndahi singuda-nguda e lako ngempoisa. I bas dalan sanga si e nilah ia ngenen singa si enggo ibunuhna mbarenda, kepeken i je enggo lit cambang wani ras tenggulina. 9Ikurakna tengguli e ku tanna, e maka ipanganina janahna erdalan. E maka idahina bapana ras nandena janah iberekenna deba tengguli e. Ipan orang tuana tengguli e, tapi la ituriken Simson maka tengguli e ibuatna i bas bangke singa nari.

10Lawes bapana ku rumah singuda-nguda e, e maka ibahan Simson sada perpulungen man-man i je sue ras kebiasan i bas kalak si nguda denga.

11Kenca enggo idah bangsa Pilisti, isuruhna telu puluh kalak anak perana guna mperdiateken Simson. 12-13Nina Simson man si telu puluh kalak ndai, “Aku lit sada kuning-kuningenku. Adi idatndu jabapna kuning-kuningenku enda ope denga dung kerja si pitu wari enda, kubereken bandu telu puluh kemeja ras baju lantang. Tapi adi la idatndu jabapna sekalak-sekalak kam arus mereken man bangku sada kemeja ras baju lantang.” “Turiken man kami kuning-kuningenndu,” nina kalak ndai, “gelah ibegiken kami.”

14Nina Simson,

“I bas si mangani nari reh si man pangan;

i bas si megegeh nari reh si ntebu.”

Kenca telu wari langa denga dat kalak enda erti kuning-kuningen e.

15I bas wari si peempatken nina kalak enda man ndehara Simson, “Endik-endiklah perbulangenndu maka ikatakenna erti kuning-kuningen e. Adi la terendik-endikndu iciluk kami rumah bapandu ras kam. Ma labo kami itenahkenndu gelah jadi musil?”

16Ngandung ndehara Simson ndahi perbulangenna, e maka nina, “Labo atendu ngena aku! Nembeh nge atendu ngenen aku! Isungkunndu man teman-temanku kuning-kuningen tapi la iturikenndu ertina man bangku!” Nina Simson, “Idahndu nge, man nande ras bapangku pe la kukataken. Engkai maka man bandu kuturiken?” 17Tangis lalap ndehara Simson kidekah kerja si pitu wari e, e maka i bas wari si pepituken ikatakenna erti kuning-kuningen e man ndeharana perban denge-denge ia lalap. E maka ikataken ndeharana ka man bangsa Pilisti. 18E maka i bas wari pepituken, ope Simson lawes ku ingan medem nina anak kuta ndai man bana,

“Kai banci tebun asang tengguli?

Kai banci gegehen asang singa?”

Ijabap Simson nina,

“Adi la itenggalakenndu lembungku,

labo itehndu jabapna!”

19Rempet Simson megegeh perbahan kuasa TUHAN, e maka lawes ia ngincuah ku Askelon. I je ibunuhna telu puluh kalak jelma si mejile pakenna, janah itangtangina uis si telu puluh kalak e, jenari iberekenna man kalak si meteh kuning-kuningenna. E maka mulih ia ku rumah, merawa kal atena kerna kejadin e. 20Jenari ndehara Simson iserehken bapana man dilaki si jadi sikembarna tupung perjabunna e.

Currently Selected:

HAKIM-HAKIM 14: BTX

Highlight

Compare

Copy