JESAYA 60
60
Kiniulin Jerusalem si mbaru
1Kekekenlah, o Jerusalem, ersinalsallah, terangndu enggo reh
sabap kemulian TUHAN enggo ersinalsal i babondu.
2Doni itutupi kegelapen, bage pe kerina bangsa la erpilihen.
Tapi i babondu ersinalsal terang TUHAN,
i babondu teridah kemulian TUHAN.
3Bangsa-bangsa reh ku terangndu,
raja-raja pe reh ndahi terang warindu si mbaru.
4Tatap ku sekelewetndu, perdiateken kai si jadi;
bangsandu kerina pulung atena reh ku kam mulihi.
Anak-anakndu si dilaki reh i negeri si ndauh nari,
anak-anakndu si diberu pe iangkipi.
5Ngidah si e, ayondu siang perban riahna ukurndu,
pusuhndu debet-debet, perban gedangna atendu.
Kebayaken bangsa-bangsa itaruhken man bandu,
rehen i kepar lawit nari maler man bandu.
6Arak-araken unta melala reh ku kam, subuk i Midian bage pe i Epa nari.
I Syeba nari reh kalak maba emas ras kumenen,
iberitakenna berita si mehuli kerna perbahanen TUHAN.
7Biri-biri i Kedar ras Nebayot nari ibaba ku kam,
itutung i babo batar-batar jadi persembahen man TUHAN.
Erkiteken si e meriah ukur TUHAN
janah Rumah PertotonNa tambah ermulia.
8Kai kin ah ndia si bali ras embun perkabangna,
desken nderapati kabang mulih ku karangna?
9E me kapal-kapal si reh i negeri si ndauh nari,
maba bangsa Dibata mulih ku kutana.
Pirak ras emas ikut ibabana,
gelah gelar TUHAN ipehaga.
IA me kap Dibata Israel si Badia,
si mahan bangsa-bangsa mpehaga bangsaNa.
10Nina TUHAN man Jerusalem,
“Bangsa si deban pagi majekken tembokndu
raja-rajana pagi si ngidangi kam.
Mbarenda Kuukum kam perban nembehna ateKu,
tapi genduari kucidahken bandu lias ras perkuah ateKu.
11Suari ras berngi talang pintu gerbangndu,
maka raja-raja banci erbaris maba ertana man bandu. #Ket 21:25-26
12Tapi bangsa-bangsa ntah kerajan si la nggit erdahin man gunandu,
ikernepken seh keri tuhu-tuhu.
13Kayu eru, kayu ingul, ras kayu cemara,
kayu si mejilena i bas kerangen Libanon.
Ibaba lako milasi kam, o Jerusalem,
maka Rumah PertotonKu mejile, kutangKu ermulia.
14Kerina anak kalak si ndedeh kam mbarenda,
reh erjimpuh ku lebe-lebendu.
Janah kerina kalak si nai megombang man bandu, nembah ku tapak-tapak nahendu.
Igelarina me kam ‘Kuta TUHAN’,
‘Sion, Kuta Dibata si Badia nu Israel’. #Ket 3:9
15Kam lanai ilupaken, lanai ate kalak segat,
lanai itadingken, janah lanai ipediat melungen.
Kubahan kam jadi kuta mbelin ras mejile,
ingan keriahen rasa lalap seh rasa lalap.
16Bangsa-bangsa ras raja-raja ngepkep kam,
bali ras nande ngepkep anakna.
Ietehndu maka TUHAN enggo ngkelini kam,
Dibata si mbisa nu Israel enggo mulahi kam.
17Kubaba man bandu emas gancih tembaga,
janah pirak gancih besi.
Kubereken man bandu tembaga gancih kayu,
janah besi gancih batu.
Si erkuasa lanai ndedeh kam,
negerindu iperentah alu kebujuren ras dame.
18Berita kerna perbahanen merawa lanai lit terbegi,
negerindu lanai iradasken, lanai ikernepken.
Desken tembok Kukawali dingen Kuampang-ampangi kam,
e maka ipujindu Aku, perban enggo Kukelini kam.
19Matawari lanai nerangi kam sanga suari,
tah pe terang bulan sanga berngi.
Aku, TUHAN, Aku kap terangndu seh rasa lalap;
sabap sinalsal kemulianKu ersinalsal i babondu. #Ket 21:23; 22:5
20Wari-wari atendu ceda enggo keri,
sabap Aku, TUHAN, Aku kap terangndu seh rasa lalap,
ngelebihi bulan ras matawari si la sundut seh rasa lalap.
21Kerina kalak si ngiani kam bujur perbahanna,
janah negeri e rasa lalap ia empuna.
Aku si nepa ia, Aku si nuankenca,
gelah arah ia tangkas kemulianKu man kerinana.
22Subuk keluarga si kitik ras si musilna,
jadi pagi bagi bangsa si mbelin dingen erkuasa.
Aku, TUHAN, mahanca pedas jadina si enda,
adi enggo payo paksana.”
Currently Selected:
JESAYA 60: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
