Popular Bible Verses from JESAYA 60

Share

Kekekenlah, o Jerusalem, ersinalsallah, terangndu enggo reh sabap kemulian TUHAN enggo ersinalsal i babondu.

Bangsa-bangsa reh ku terangndu, raja-raja pe reh ndahi terang warindu si mbaru.

Doni itutupi kegelapen, bage pe kerina bangsa la erpilihen. Tapi i babondu ersinalsal terang TUHAN, i babondu teridah kemulian TUHAN.

Subuk keluarga si kitik ras si musilna, jadi pagi bagi bangsa si mbelin dingen erkuasa. Aku, TUHAN, mahanca pedas jadina si enda, adi enggo payo paksana.”

Matawari lanai nerangi kam sanga suari, tah pe terang bulan sanga berngi. Aku, TUHAN, Aku kap terangndu seh rasa lalap; sabap sinalsal kemulianKu ersinalsal i babondu.

Wari-wari atendu ceda enggo keri, sabap Aku, TUHAN, Aku kap terangndu seh rasa lalap, ngelebihi bulan ras matawari si la sundut seh rasa lalap.

Ngidah si e, ayondu siang perban riahna ukurndu, pusuhndu debet-debet, perban gedangna atendu. Kebayaken bangsa-bangsa itaruhken man bandu, rehen i kepar lawit nari maler man bandu.

Tatap ku sekelewetndu, perdiateken kai si jadi; bangsandu kerina pulung atena reh ku kam mulihi. Anak-anakndu si dilaki reh i negeri si ndauh nari, anak-anakndu si diberu pe iangkipi.

Kerina kalak si ngiani kam bujur perbahanna, janah negeri e rasa lalap ia empuna. Aku si nepa ia, Aku si nuankenca, gelah arah ia tangkas kemulianKu man kerinana.

Berita kerna perbahanen merawa lanai lit terbegi, negerindu lanai iradasken, lanai ikernepken. Desken tembok Kukawali dingen Kuampang-ampangi kam, e maka ipujindu Aku, perban enggo Kukelini kam.

Suari ras berngi talang pintu gerbangndu, maka raja-raja banci erbaris maba ertana man bandu.

Arak-araken unta melala reh ku kam, subuk i Midian bage pe i Epa nari. I Syeba nari reh kalak maba emas ras kumenen, iberitakenna berita si mehuli kerna perbahanen TUHAN.

Nina TUHAN man Jerusalem, “Bangsa si deban pagi majekken tembokndu raja-rajana pagi si ngidangi kam. Mbarenda Kuukum kam perban nembehna ateKu, tapi genduari kucidahken bandu lias ras perkuah ateKu.

Kam lanai ilupaken, lanai ate kalak segat, lanai itadingken, janah lanai ipediat melungen. Kubahan kam jadi kuta mbelin ras mejile, ingan keriahen rasa lalap seh rasa lalap.

Bangsa-bangsa ras raja-raja ngepkep kam, bali ras nande ngepkep anakna. Ietehndu maka TUHAN enggo ngkelini kam, Dibata si mbisa nu Israel enggo mulahi kam.