JESAYA 61
61
Berita keriahen kerna pembebasen
1Kesah TUHAN si Erdolat lit i babongku.
Enggo ipilihNa aku,
lako maba berita si mehuli man kalak musil.
Isuruhna aku pepalem kalak si getem pusuhna,
meritaken kebebasen man kalak si tertaban;
janah kalak si i bas penjara enggo banci ndarat ia. #Mat 11:5; Luk 7:22 #Luk 4:18-19
2IsuruhNa aku momokenca,
maka enggo seh kepe paksana
TUHAN ngkawali bangsaNa,
janah erbalas IA man musuh-musuhNa.
Kerina kalak si rate ceda,
isuruhNa aku ngapulisa. #Mat 5:4
3Man anak kuta Sion si erceda ate,
mereken keriahen gancih ndele ate,
ende-enden pujin gancih ukur si kote.
IA igelari Batang Kayu Kebenaren,
si isuanken TUHAN tama kemulianNa.
4Kuta si runtuh, si enggo ndekah mesuni,
ipajekkenna ka me pagi mulihi.
5O bangsangKu, erdahin pagi bangsa si deban man gunandu;
ipermakanina asuh-asuhenndu,
iperjumaina jumandu, janah iarak-arakna peken anggurndu.
6Kam igelari kap imam TUHANta,
suruh-suruhen nu Dibatanta.
Kebayaken bangsa-bangsa si deban kam ngenanamisa,
janah megah akapndu perban kam empuna.
7Dage perban kam ipemela-mela dua kali lipat
janah kam iciduri ras igombangi,
e maka i bas negerindu jine kebayakenndu erlipat ganda
janah keriahenndu lit asa si ndekah-ndekahna.
8Nina TUHAN, “Ngena ateKu kebujuren,
tapi ciga ateKu penindasen ras kejahaten.
Man bangsangKu la banci lang tetap Kubereken upahna,
janah Kubahan perpadanen si nteguh rasa lalap ras ia.
9I belang-belang doni, itandai kalak kesusurenna,
terberita i bas kerina bangsa-bangsa.
E maka kasa kai kalak si ngidahsa ngaku,
maka ia me bangsa si Kupasu-pasu.”
10Nina Jerusalem, “Meriah kal kuakap erkiteken TUHAN,
tendingku ersurak erkiteken perbahanenNa.
Desken penganten tupung kerja perjabunna,
make paken si seh kal jilena,
bage me TUHAN nguisi aku alu
keselamaten ras kemenangen. #Ket 21:2
11Bali ras benih si iamburken ku bas taneh la banci lang turah,
bage me la banci lang ikeliniNa bangsaNa,
janah ipeturahNa puji-pujin man baNa
i bas kerina bangsa-bangsa.”
Currently Selected:
JESAYA 61: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
