JESAYA 47
47
Ukumen man Babil
1Nina TUHAN,
“O Babil, i bas kursi kinirajanndu nari, nusurlah,
kundullah kam i bas abu taneh.
Mbarenda kam desken singuda-nguda mejile dingen mberu,
tapi genduari enggo bene kap kinijilenndu. #Jes 13:1–14:23; Jer 50:1–51:64
2Gilinglah tepung alu batu penggilingen,
tudungndu pe cibalken.
Tangtangi uis alusndu,
singsing abitndu lako ngepari lau.
3Manjang-anjang me kam i lebe-lebe kalak,
ipemela-mela dingen ipeteruk.
Erbalas ateKu man bandu,
janah ise pe la ngasup ngambati Aku.”
4Dibata si Badia nu Israel mulahi kita,
gelarna e me TUHAN si Mada Kuasa.
5Nina TUHAN kempak Babil,
“I bas ingan si gelap, sinik kam i je kundul.
Kam lanai nari igelari kalak ‘Kemberahen nu bangsa-bangsa’.
6Mbarenda nembeh ateKu kempak bangsangKu,
e maka Kupelepas keliamen erta pusakangKu.
Kuendesken ia ku bas tanndu,
tapi la atendu mekuah man bana;
subuk tua-tua pe iberatindu.
7Akapndu mbarenda,
kam lalap jadi kemberahen.
La iukurindu kepeken,
kuga kedungenna.
8O kam si nggeluh pesenang-senangken bana, dengkehkenlah katangKu;
iakapndu maka la lit kai pe man kebiarenndu.
Iakapndu maka kam me si erkuasana,
nindu, ‘Aku kap Dibata, la lit ganjangen asa aku.’
Iakapndu maka kam la banci mbalu,
kepaten anak pe akapndu la banci inanamindu. #Ket 18:7-8
9Tapi rempet i bas sada wari,
kam kedabuhen si dua ndai.
Aminna lit pe tangkal ras tabasndu,
bene perbulangenndu ras anak-anakndu.
10Teneng kal kam i bas kejahatenndu;
sabap akapndu la lit ise pe ngidah perbahanenndu.
Kam enggo papak erkiteken kepentaren ras pemetehndu,
nindu, ‘Aku kap Dibata, la lit ganjangen asa aku.’
11Reh me ku kam cilaka;
tabas ras tangkalndu la ngasup ngambatisa.
Rempet kam kena mara,
mara si la iarapndu bage rehna.
12Teruslah pake tabas ras kinigurunndu,
si kitik-kitikndu nari enggo ipergunakenndu.
Mbera-mbera erguna e man bandu,
mbera-mbera mbiar ibahanna musuh-musuhndu.
13Ngelabuh nge kam, aminna pe melala si ngajari;
suruhlah guru-guru pertendungndu e nampati.
Ipelajarina bintang-bintang,
ibahanna sibar-sibar langit si meganjang.
Tep-tep pultak bulan si mbaru,
iturikenna kai si nandangi jadi bandu.
14Desken nggala keri ipan api si gara,
dirina jine pe la ngasup ikelinina.
Api si gurlah, lasna la teralang,
la banci man ingan cudu, bagi api arang.
15Bage me perasatna guru pertendung e man bandu,
aminna pe kitik-kitikndu nari enggo ia jadi penungkunenndu;
itadingkenna kam, idalanina dalanna,
la lit si engkelini kam, lawes ia kerina.”
Currently Selected:
JESAYA 47: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
