JESAYA 48
48
Dibata si metehsa kerna wari si nandangi reh
1O bangsa Israel, kesusuren Juda, begikenlah!
Kam ersumpah i bas gelar TUHAN.
Ikatakenndu maka Dibata nu Israel kap si isembahndu;
tapi la kap i bas pusuhndu nari kai si ibelaskenndu;
2Amin bage gia, megah ka akapndu ngatakenca,
maka kam me penduduk kuta si badia,
janah kam ernalem kempak Dibata nu Israel saja,
TUHAN si Mada Kuasa, e kap gelarNa.
3Nina TUHAN kempak Israel,
“Nai enggo Kukataken kai si nandangi jadi;
jenari rempet Kujadiken si ndai.
4Kueteh maka pusuhndu mekeng bagi waja,
urat kudukndu piher bagi tembaga.
5E maka kejadin-kejadin enda nai nari enggo Kunubuatken,
ope denga jadi enggo leben Kuberitaken,
maka ola ikatakenndu
berhala ras gana-ganandu si mahanca jadi bandu.
6Genduari enggo me jadi kerina si kuturiken nai bandu;
e maka arus iakuindu, nubuatKu payo tuhu.
Genduari Kunubuatken ka perkara-perkara si mbaru,
e me kejadin-kejadin si langa Kupetangkas bandu.
7Enda denga nge Kubahan si e jadi,
perkara-perkara si bage la pernah jadi nai-nai nari.
Adi lit kin bage, tentu nindu ngerana,
‘Si e enggo me kueteh kerina.’
8Kueteh nge maka kam la terteki,
kam terberita kalak si pet nogani,
em sabapna maka si enda la pernah ibegindu,
sengkebabah kata pe la pernah seh ku cupingndu.
9Gelah ipuji kalak gelarKu,
Kusabari kal ukurKu.
RawangKu Kutahan,
maka ola keri kam Kukernepken.
10I bas api kiniseran, kam Kuuji,
bali ras pirak, iane i bas api.
Tapi kepeken si la erguna kepe kam.
11Si e Kulakoken guna Aku;
sabap gelarKu la ateKu jadi mbau.
Man ise pe la Kubere kemulianKu.”
Kores, raja pilihen TUHAN
12Nina TUHAN, “Begikenlah, o Israel, bangsa si enggo Kudilo.
Aku kap Dibata, si pemena ras si perpudina. #Jes 44:6; Ket 1:17; 22:13
13TanKu kap simahan palas doni enda,
tanKu, si kemuhen ngkimbangken langit enda.
Tupung Kudilo langit ras doni enda,
minter ia sikap ngadap kerina.
14Pulunglah kam kerina, jenari begiken;
la lit sada pe dibata-dibata si ernubuatken
maka Babil iserang kalak si enggo Kupilih;
ilakokenna me kasa kai si Kusuruh.
15Aku me si ngerana ras si ndilo ia,
Kubabai ia, janah Kupeseh sura-surana.
16Mari deheri Aku, jenari begiken.
Bena-benana nari pe Aku enggo ngerana terang-terangen.
Asum jadi si Kukataken e,
Aku pe lit i je.”
(Tuhan si Erdolat enggo mereken gegehNa man bangku janah nuruh aku.)
Rencana TUHAN nandangi bangsaNa
17Dibata si Badia nu Israel, TUHAN si ngkelini kam ngataken bandu,
“Aku kap TUHAN Dibatandu;
Aku ngajari kam guna kiniulinndu,
janah naruhken kam ku bas dalan si man dalanenndu.
18Bicara patuh kam man perentahKu,
tentu maler man bandu kemalemen ate desken lau;
janah kemenangen ku kam nepet,
desken galumbang si ergalun ku tepi lawit.
19Kesusurenndu pe bagi kersik teremna,
janah Kujaga maka la masap ia.”
20Ndaratlah i Babil nari, lompatkenlah;
beritakenlah alu surak meriah.
Momoken ku belang-belang doni kerina,
“TUHAN enggo ngkelini Israel, suruh-suruhenNa!” #Ket 18:4
21Asum itaruhken TUHAN nai bangsaNa arah gurun pasir si melas,
la sempat ia terketes perbahan muas.
Sabap ipedarat TUHAN lau man bana i bas lingling nari,
ibekakenNa batu, jenari erburak lau i bas nari.
22“La lit dame man kalak jahat,” nina TUHAN. #Jes 57:21
Currently Selected:
JESAYA 48: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
