JESAYA 46
46
1Dewa Bel enggo mbengkung, Nebo enggo njerunuk;
nai dibata-dibata Babil e isembah,
tapi genduari iampeken ku gurung asuh-asuhen
baban si mberat man asuh-asuhen si enggo latih.
2Gana-gana e la ngasup engkelini dirina,
tapi itaban jenari ibaba kerina,
bage me jadina man gana-gana Babilon.
3O kesusuren Jakup, dengkehkenlah Aku,
kam kerina si tading denga i bas bangsangKu.
Enggo kutatang-tatang kam mulai i bas bertin nari,
tangtang tubuhndu nari enggo kam Kuembahi.
4Aku kap Dibatandu, e maka Kuembah-embah kam,
seh kam metua janah ubanen.
Aku si njadiken kam, e maka Kutatang-tatang,
Kuangkip-angkip, janah Kukelini kam.
5Ras ise kin Aku banci ipeserindu?
Lit kin si deban bali ras aku?
6Italangi kalak dompetna, jenari itungtungkenna emasna;
janah itimbangna pirak i bas neraca.
Iupahina tukang emas lako erbahan gana-gana,
kenca bage nembah erjimpuh ia i lebe-lebena.
7Iampekenna gana-gana e ku babo barana, ipersanna lawes;
jenari itamakenna ka ku inganna.
I je me lalap gana-gana e tedis,
la ngasup miserken bana.
Adi lit kalak ertoto ku ia, la ia ngasup ngaloi
la ngasup pe ia ngkelinisa i bas cilaka nari.
8Ingetlah enda, o perdosa,
ukurilah si enggo-enggona.
9Peinget-ingetlah kai si jadi nai.
Akuilah maka Aku ngenca Dibata,
janah la lit si bali ras Aku enda.
10Bena-benana nari enggo Kunubuatken kerna kedungenna,
nai-nai nari enggo Kuturiken kai si nandangi jadi.
Enggo Kukataken maka rencanangKu la terolangi,
janah sura-surangKu la banci lang Kudalanken.
11Kudilo sekalak jelma i Timur nari,
ia reh desken perik rajawali.
Kerina sura-surangKu idalankenna,
sue ras kata si Kubelasken, bage me jadina.
12Begikenlah Aku o bangsa si mekeng pusuhna;
iakapndu maka kemenangen ndauh denga.
13Aku erbahanca maka ndeher kemenangen,
janah kemenangenKu la Kupelawen-lawen.
Kuta Jerusalem Kuselamatken,
janah man Israel Kubereken kemulianKu.”
Currently Selected:
JESAYA 46: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
