JESAYA 37
37
Raja mindo pedah man Nabi Jesaya
(2Raj 19:1-7)
1Kenca ibegi Raja Hiskia cakap kalak ndai, icaingkenna uisna erkiteken cedana atena. Jenari ipakena uis guni, tanda ate ceda, e maka lawes ia ku Rumah TUHAN. 2Isuruhna Eliakim, e me pegawai si ngaturken istana raja, Sepna, sekretaris kerajan, ras imam-imam si enggo metua, gelah ndahi Nabi Jesaya anak Amos. Kalak enda pe kerina make uis guni. 3Enda me berita si itengeskenna man Jesaya, “Sendah me wari kiniseran; kita enggo iukum ras ijuruken. Kita desken sekalak diberu si nandangi mupus, tapi la cukup gegehta petubuhsa. 4Raja Assur nuruh puanglimana nggombangi Dibata si nggeluh. Mbera-mbera ibegi TUHAN Dibatandu kerina ranan si megombang e maka iukumNa kalak si melaskenca. E maka ertotolah man Dibata guna bangsanta si tading denga.”
5Kenca ialoken Jesaya berita si itenahken Raja Hiskia, 6itenahkenna mulihken jabapna nina, “Ikataken TUHAN man bandu maka ola kam mbiar megi cakap kalak Assur e, aminna gia ikatakenna maka TUHAN la ngasup ngkelini kam. 7Ibahan TUHAN pagi maka raja e megi berita-berita si erbahanca ia mulih ku negerina, janah i jah isuruh TUHAN kalak munuhsa.”
Kalak Assur nehken ancamen si deban
(2Raj 19:8-19)
8Ibegi pegawai Assur ndai maka rajana enggo lawes i Lakis nari janah sangana iserangna kuta si ndeher rassa, e me kuta Lipna. E maka lawes pegawai e ku je nungkunisa. 9Lit seh berita man kalak Assur maka tentera Mesir si ipinpin Raja Tirhaka i Sudan nari sangana reh nerang ia. Kenca ibegi raja Assur si enda, ikirimkenna sada surat man Hiskia raja Juda 10nina, “Dibata inganndu ernalem enggo ngataken man bandu maka labo kam tertaluken aku; tapi ola kam tertipu megi si e. 11Tentu enggo ibegindu kai si ibahan raja Assur man tiap negeri si enggo iputuskenna gelah ikernepken. Akapndu kin banci kam pulah? 12Nini-niningku ngeradasken kuta Gosan, Haran, ras Resep janah ibunuhina bangsa Bet-Eden si ringan i Telassar, janah la lit sada pe dibata-dibatana si ngasup ngkelinisa. 13I ja dage genduari raja kuta Hamat, Arpad, Separwaim, Hena, ras Iwa?”
14Ialoken Raja Hiskia surat e i bas persuruhen ndai nari, jenari iogena. Kenca bage lawes ia ku Rumah Pertoton, itamakenna surat e i adep-adepen TUHAN, 15e maka ertoto ia nina, 16“O TUHAN si Mada Kuasa, Dibata nu Israel, si kundul i bas kursi kinirajanNdu i babo Kerubim Kam kap ngenca Dibata, si merentah kerina kerajan-kerajan doni. Kam kap si nepa langit ras doni. #Kel 25:22 17TUHAN, dengkehkenlah kami, janah tataplah kai si jadi genduari i bas kami. Begikenlah kai si ikataken Sanherip nggombang-nggombangi Kam Dibata si nggeluh. 18Kerina kami metehsa TUHAN, maka raja-raja Assur enggo ngeradasken melala bangsa, ibahanna negerina terulang. 19Jenari icilukna dibata-dibatana, sabap si e kerina labo Dibata si tuhu-tuhu, tapi gana-gana kayu ras batu, bekas tan manusia erbahanca. 20Dage, o TUHAN Dibata, pulahi min kami i bas kalak Assur e nari, gelah kerina bangsa doni enda meteh maka Kam ngenca Dibata.”
Tenah Nabi Jesaya man raja
(2Raj 19:20-37)
21Kenca bage itenahken Jesaya tenah man Raja Hiskia. I bas tenah e ikataken Nabi Jesaya maka guna ngaloi pertoton raja, 22TUHAN enggo ngataken, “O Sanherip, itawai dingen igombangi kuta Jerusalem kam. 23Ise kin akapndu si ihina ras itokoh-tokohindu e? Dibata si Badia nu Israel kap si ilawanndu e. 24Isuruhndu suruh-suruhenndu gelah meganjang pengeranana i lebe-lebengKu, nindu, ‘Gereta perangku enggo naluken deleng-deleng Libanon si meganjang. I das deleng e enggo kutabah batang kayu ingul si meganjangna ras batang tusam si mejilena, janah enggo aku seh ku tengah kerangen si mbagesna. 25Enggo kukali sumur-sumur i negeri kalak si deban janah enggo kuinem launa. Enggo iperjaki tenterangku Lau Nil seh kerah.’
26La kin enggo ibegindu maka kerina si enda ndekah me enggo Kurencanaken? Janah genduari enggo Kulakoken sue ras rencanangKu e. Enggo Kubereken man bandu gegeh lako nalihken kuta-kuta si erbenteng jadi gun-gunen batu. 27Kalak si ringan i bas kuta-kuta e la ergegeh, mbiar dingen jengang kerina. Ia desken rih i bas sada juma tah pe dukut si turah i datas tarum rumah, melus iembusken angin Timur si melas.
28Tapi Kueteh nge kerinana kerna kam, kai si ilakokenndu ras ku ja perlawesndu. Kueteh nge kuga nembehna atendu ngenehen Aku. 29Enggo Kualoken berita kerna pernembeh ate ras kiniganjangen ukurndu. E maka genduari Kukiling igungndu, janah Kusangam babahndu, jenari Kutegu kam mulih arah dalanndu reh mbarenda.”
30Kenca bage nina Jesaya man Raja Hiskia, “Enda me tandana kerna kai si nandangi jadi. I bas tahun enda ras tahun si reh, buah dukut si turah-turah bana ngenca lit man panganndu, tapi i bas tahun si peteluken enggo banci kam man gandum, jenari iperanindu, bage pe nuan anggur jenari man buahna. 31Kalak si tading si nggeluh denga i Juda turah ka mulihken desken sinuan-sinuan si rurat mbages ku teruh taneh jenari erbuah. 32Lit nge si tading nggeluh i Jerusalem ras i Deleng Sion, sabap bage ate TUHAN si Mada Kuasa ibahanNa.
33Enda me si ikataken TUHAN kerna raja Assur e, ‘Labo ibengketina kuta enda, janah labo ipanahkenna sada anak panah pe ku je, labo lit sekalak pe tentera si rampang-ampang reh ndeheri kuta e, janah labo lit taneh ipegun-gun jadi benteng guna ngepung kuta e. 34Mulih me ia arah dalanna reh mbarenda, dingen labo ia sempat bengket ku bas kuta e. Aku, TUHAN, enggo ngatakenca. 35Aku mpertahanken kuta Jerusalem ras ngkawalisa, guna kehamaten man bangKu bage pe erkiteken perpadanen si Kubahan ras suruh-suruhenKu Daud.’ ”
36Sekalak malekat TUHAN lawes ku perkemahen kalak Assur. I je ibunuhna 185.000 tenterana. Pepagina, nandangi mbincar matawari teridah amparen i je kerina maitna! 37E maka mundur me Sanherip, raja Assur, mulih ku Niniwe. 38I bas sada wari, asum ia ersembah i bas rumah pertoton dibata-dibatana Nisroh, reh anakna dua kalak. Adramelek ras Sareser, munuh ia alu pedang jenari lompat anakna e ku taneh Ararat. Anakna si deban, e me Esarhaddon, nggantiken ia jadi raja.
Currently Selected:
JESAYA 37: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
