JESAYA 36
36
Jerusalem iancam Assur
(2Raj 18:13-27; 2Kro 32:1-19)
1I bas tahun pesepuluh empatken pemerentahen Hiskia, raja Juda reh Sanherip, raja Assur, nerang kuta-kuta Juda si erbenteng janah italukenna kerina. 2Kenca bage iperentahken Sanherip puanglimana ras tentera si nterem gelah berkat i Lakis nari ku Jerusalem, guna maksa Raja Hiskia nerah. Kenca seh i Jerusalem, minter ikuasaina pasar ingan erdahin tukang tenun, deherken parik si pepalerken lau i bas kolam si arah gugung nari. 3Jenari ndarat telu kalak Juda njumpai puanglima Assur ndai. Kalak Juda si telu ndai e me: Eliakim anak Hilkia, ia me si ngaturken istana raja; Sepna, ia sekretaris kerajan, ras Joa anak Asap, bendahara kerajan. 4Puanglima e nehken penungkunen raja Assur ndai man kalak Juda si telu e nina, “Engkai maka Raja Hiskia megegeh iakapna man bana? 5Akapndu kin banci ranan saja nggancihken kebeluhen erperang ras kembisan? Ise kin iakapndu banci nampati maka kam berontak ngelawan Assur? 6Terarapkenndu kin raja Mesir nampati kam? Tapi adi e kin, bali me e ras make sanggar jadi ciken – penggel me cikenndu e, jenari itustusna tanndu. Bage me tempasna raja Mesir adi kalak ernalem man bana.” #Esek 29:6,7
7Tole nina puanglima Assur e, “Ntahsa nindu kam ernalem man TUHAN Dibatandu? Ingan-ingan ersembah man TUHAN ras batar-batarNa nge kap si icedaken Hiskia. Sabap rikutken pengakap Hiskia maka kalak Juda ras Jerusalem sada batar-batar saja ngenca inganna ersembah man TUHAN. 8E maka genduari i bas gelar raja pang aku ertaruh, adi terbuatndu dua ribu kalak si ngasup ngersak kuda, banci ibereken man bandu kudana. 9Tentera Assur si meterukna kal pe labo kam ngasup ngelawanca. Janah iarapkenndu denga kin atendu Mesir ngiremken gereta perang ras tentera si erkuda man bandu? 10Akapndu kin la arah penampat TUHAN aku nerang ras ngkernepken negerindu enda? TUHAN kap jine si nuruhsa.”
11Kenca bage nina Eliakim Sepna, ras Joa man puanglima ndai, “I bas cakap Aram min kam ngerana man kami. Iantusi kami nge cakap e. Ola kam ngerana i bas cakap Heber, sabap kerina kalak si lit i datas tembok ah sangana megi-megi.”
12Erjabap puanglima ndai nina, “Akapndu kin man bandu ras man rajandu saja ngenca aku isuruh rajangku ngataken si enda kerina? Lang; tapi aku pe ngerana man kerina kalak si kundul i datas tembok ah. Kerina kalak ah ras kam pe terpaksa pagi ipanndu kotorndu dingen i inemndu pipisndu.”
13Kenca bage tedis puanglima ndai, jenari erlebuh ia alu sora megang i bas cakap Heber nina, “Begiken kai si ikataken raja Assur man bandu! 14Ipersingetina kam kerina maka ola kam nggit itipu Hiskia. Hiskia labo ngasup engkelini kam. 15Janah ola kam nggit iendik-endikna gelah ernalem man TUHAN. Ola iakap kam nggit TUHAN ngkelini kam, ras ngambati tentera Assur maka ola talu kutandu. 16Ola begiken kata Hiskia. Raja Assur merentahken kam gelah ndarat i bas kuta e nari, jenari nerah. Adi bage, ipelepas kam man buah anggur ras buah ara bekasndu nuanca, ras minem lau malem i bas sumurndu nari, 17seh ipindahken raja inganndu ku sada negeri si menam bali kal ras negerindu enda, i je lit peken anggur mereken lau anggur, ras gandum guna erbahan roti. 18Ola berendu Hiskia nebu-nebu kam. Ola kam nggit ibabaina rukur maka ipulahi TUHAN kam. Lit kin dibata-dibata bangsa si deban mulahi negerina i bas raja Assur nari? 19I ja genduari dibata-dibata Hamat ras Arpad? I ja genduari dibata-dibata negeri Separwaim? Lit kin si engkelini Samaria? 20Pernah kin dibata-dibata negeri-negeri enda ndai kerina engkelini negeri e i bas raja kami nari? Dage ngkai maka iakapndu banci TUHAN engkelini kuta Jerusalem?”
21Sinik kalak kerina, sue ras si enggo iperentahken Raja Hiskia sengkebabah ranan pe la lit ibelaskenna. 22Kenca bage, Eliakim, Sepna, ras Joa ncaingken uisna perban ceda atena, jenari lawes ia pesehsa man raja kerina si enggo ikataken puanglima Assur ndai.
Currently Selected:
JESAYA 36: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
