JESAYA 38
38
Raja Hiskia sakit janah malem ka
(2Raj 20:1-11; 2Kro 32:24-26)
1Kira-kira i bas paksa si e, sakit Raja Hiskia janah nandangi mate. Nabi Jesaya anak Amos reh ndahi ia, janah nina man raja, “TUHAN nuruh kam maka ikatakenndu pedahndu si perpudina man kerina isi jabundu, sabap labo kam malem. Ersikaplah kam ngaloken kematenndu.”
2Itukupken Hiskia ayona ku dingding, jenari ertoto ia nina, 3“Ingetlah min TUHAN, maka enggo kusembah Kam alu tutus dingen patuh, janah tetap ngelakoken kai ateNdu ngena.” Kenca bage tangis Hiskia, megogo kal atena.
4Kenca bage iperentahken TUHAN man Jesaya 5gelah mulihken ndahi Hiskia lako ngataken man bana, “Aku, TUHAN, Dibata nu nini-ninindu Daud enggo megi pertotonndu janah ngidah iluhndu mambur. Kupegedang umurndu sepuluh lima tahun nari. 6Kupulahi kam ras kuta Jerusalem enda i bas raja Assur nari, janah tetap Kukawali kuta enda.”
21Kenca bage isuruh Jesaya gelah idampelken sada buah ara si medakdak ku bareh raja, gelah malem. 22Nungkun Raja Hiskia nina, “Kai dage tandana maka ngasup pagi aku lawes ku Rumah Pertoton?” #Ayat 21-22 biasana inganna ibas ujung pasal 38, tapi ipindahken ku jenda gelah turi-turinna ertorosen.
7Ngaloi Jesaya nina, “Ibereken TUHAN man bandu tanda maka isehkenNa me padanNa. 8Awih-awih si lit i bas tangga si ipajekken Raja Ahas, ibahan TUHAN surut sepuluh jingkang.” E maka surut me awih-awih e sepuluh jingkang.
9Kenca Hiskia malem i bas penakiten nari, ibahanna ende-enden pujin enda:
10“Kuakap kin mbarenda, tupung aku setengah umur denga,
berkat me aku ku doni kematen,
janah i je me tahun-tahunku kukeriken.
11Kuakap kin mbarenda, i bas doni kegeluhen enda,
TUHAN lanai ndigan pe kuidah,
bage ka pe jelma si nggeluh.
12Peltep me kesahku, enggo seh sipatku,
desken sapo-sapo permakan si iruntuhken,
desken uis si ikeret i bas pertenunen nari,
kuakap kin ipengadi Dibata me geluhku.
13Gedang-gedang berngi nderkuh aku ban suina,
tempa-tempa tulan-tulanku iripukken singa,
janah kuakap kin maka geluhku ipengadi Dibata.
14Sorangku kote desken sora kalimpines,
ndehereng aku bagi nderapati.
Matangku latih nare ku datas;
TUHAN, pulahi min aku bas kesusahen enda nari.
15Kai nari banci kubelasken? Enda perbahanen TUHAN.
Ngilas kuakap, e maka lanai tertunduhken.
16 TUHAN, geluhku kupersembahken man bandu saja;
pepalem aku, janah berelah aku nggeluh.
17Ateku ngilas salih me jadi dame,
sabap ikeliniNdu geluhku i bas kerina cilaka nari;
ialemiNdu kerina dosa-dosangku.
18I bas doni kematen, la lit ise pe si banci muji Kam,
kalak mate la banci ngarapken kesetianNdu.
19Jelma si nggeluh nge si muji Kam,
bagi aku muji Kam genduari.
Bapa-bapa nuriken kesetianNdu man anak-anakna.
20 TUHAN, enggo ipepalemNdu aku.
Ikuit kami me kulcapi dingen ngendeken puji-pujin baNdu.
I bas Rumah PertotonNdu iendeken kami puji-pujin, kidekah umur geluh kami.”
Currently Selected:
JESAYA 38: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
