JESAYA 35
35
Dalan si Badia
1Gurun pasir ras taneh kerah-kerah meriah pagi iakapna,
taneh mesawang ersurak janah erbunga.
2Gurun pasir bungana mbue, ersurak meriah janahna rende.
Gurun pasir e bali pagi jilena ras Deleng Libanon,
bali mehumurna ras juma-juma Karmel ras Saron.
Tep-tep kalak ngidah kehagan TUHAN-ta,
ngidah kuasa Dibata ras kemulianNa.
3Tan si enggo latih pegegehilah,
tiwen si enggo nggirgir bahanlah maka enteguh. #Heb 12:12
4Katakenlah man si tumpat ukur,
“Piherken ukurndu ola kam mbiar,
Reh me Dibata, ipulahiNa me kam,
musuh-musuhndu kerina iukum.”
5E maka kalak pentang erpengidah pagi,
kalak pasek erpemegi. #Mat 11:5; Luk 7:22
6Kalak cempang lompat-lompat desken belkih,
kalak si la beluh ngerana ersurak-surak alu meriah.
Pultak me sumbul lau i bas gurun pasir,
i bas taneh mesawang turah lau maler.
7Kersik si melas salih jadi dano,
i bas taneh kerah erburak-burak ulu lau.
Taneh si gelgel nari ingan biang kerangen nggeluh,
genduari turah i je rengo.
8Lit pagi sada pasar i je,
si igelari “Dalan si Badia”.
Kalak perdosa la lit sada pe erdalan arah e,
kalak motu la ibabaina papak kalak si erdalin rassa.
9La lit i je singa,
la lit mentas arah e rubia-rubia si merawa.
Kasa kalak si enggo ipulahi TUHAN,
tupung mulih arah e me ia kerina erdalan.
10Alu dem keriahen seh ia i Jerusalem kerina,
rende ras ersurak meriah kal akapna.
Seh rasa lalap malem me atena,
asa ndigan pe lanai atena ndele, lanai atena ceda.
Currently Selected:
JESAYA 35: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
