JESAYA 24
24
TUHAN ngukum doni pagi
1Nehen me, iradasken TUHAN me doni enda, janah ibahanNa jadi melungen. Tempas taneh jadi mejin ibahanNa janah kalak si ngiani doni ikerapkenNa kerina. 2Kerina kalak ngenanami nasip si seri: imam-imam ras jelma si nterem, budak-budak ras tuan-tuan si nukur ras si ndayaken, si pepinjamken ras si minjam, kalak bayak ras kalak musil. 3Doni ipelume janah melinang kerina. TUHAN kap si ngatakenca, e maka la banci lang jadi bage.
4Doni kerah janah melus; kerina doni kote; subuk doni bage pe langit penakiten kerina. 5Manusia enggo ngeliami doni erkiteken ilawanna undang-undang Dibata janah ilanggarna perpadanen si arusna tahan rasa lalap. 6Erkiteken si e isumpahi Dibata doni enda, janah manusia si ngianisa iukum sue ras perbahanenna. IcilukNa manusia, janah piga-piga nari ngenca tading. 7Batang anggur jadi melus, janah anggur pe enggo mesera muatsa. Kasa kai kalak si gelgel e meriah akapna, genduari erndele ate. 8Sora kulcapi ras gendang si gelgel e meriah, genduari enggo ngadi. 9Lanai lit kalak si rende-rende janahna minem-minem lau anggur; kalak si nginem lau anggur pagit akapna. 10Kuta guntar; kalak si i bas rumah ngeruki bana sabap mbiar kerina. 11I bas pasar-pasar jelma si nterem serko-serko erkiteken lau anggur enggo keri. Kesenangen enggo masap seh rasa lalap; keriahen enggo iambekken i bas doni nari. 12Kuta enggo radas, janah pintu gerbangna enggo runtuh. 13Bagenda me si nandangi jadi i bas kerina bangsa i belang-belang doni enda. Kejadin e desken pendungi paksa rani; buah saitun enggo keri naktak erkiteken iugur, janah buah anggur si pengkeri-kerinna enggo iputikken i bas batangna nari.
14Kalak si terkelin rende meriah, kalak si ringan i Barat nuriken uga belinna TUHAN, 15janah kalak si ringan i Timur muji IA. Kalak si ringan i gedang-gedang tepi lawit ipujina TUHAN, Dibata nu Israel. 16I bas kerina tampuk doni nari terbegi pagi ende-enden pujin man Israel, bangsa si bujur e.
Tapi lanai lit pengarapen man bangku! Bene me aku! Kalak penipu tetap nipu, janah tetap reh kelekna ia nipu. 17Begikenlah o kalak si ngiani doni kebiaren, lubang si mbages, ras siding sangana nimai kam. 18Ise si lompat nilahken kebiaren, ndabuh ku bas lubang si mbages, janah ise ndarat i bas lubang si mbages e nari kena siding me. Udan meder ndabuh i langit nari, e maka palas doni mugur-ugur. 19Doni jadi regat, beka janah getem. 20Doni mbewat-mbewat desken kalak mabuk janah mundu-undu desken sapo-sapo iembus angin kaba-kaba. Doni jongkang itindih dosana si mberat; ampar janah ndigan pe lanai keke.
21Reh me paksana maka iukum TUHAN kerina kuasa-kuasa si lit i das langit bage pe pemerentah-pemerentah si i doni. 22Ipepulung Dibata me raja-raja i bas sada lubang desken kalak tabanen. ItutupNa i bas penjara seh paksana ia iukum. 23Bulan jadi gelap, janah matawari pe lanai ersinalsal, sabap TUHAN si Mada kuasa me jadi raja. IA raja i Jerusalem i das Deleng Sion, janah peminpin-peminpin bangsa e ngidah kemulian TUHAN.
Currently Selected:
JESAYA 24: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
