JESAYA 23
23
Berita kerna Tirus ras Sidon
1Enda me berita kerna Tirus.
Ngandungkenlah o kam anak kapal si sangana erlayar i lawit! Sabap kuta Tirus, kuta pelabuhenndu enggo ikernepken; rumah-rumah ras dermaga enggo runtuh kerina. Asum kapalndu mulih i Kiprus nari, ibegindu me beritana. #Esek 26:1–28:19; Joel 3:4-8; Amos 1:9-10; Sak 9:1-4; Mat 11:21-22; Luk 10:13-14 2Tangiskenlah o perbinaga Sidon! Isuruhndu kalak ngepari lawit, 3nukur ras ndayaken gandum si turah i Mesir janah erbinaga ku kerina negeri.
4O kuta Sidon, man kemelanken nge sikerajangenndu ena! Lawit ras lawit si mbelang enggo mersoken kam nina, “La pernah lit anakku. La pernah kupebelin-belin anak dilaki tah anak diberu.”
5Negeri Mesir pe sengget dingen kemamangen tupung tereteh man bana maka Tirus enggo kernep.
6Nderkuhlah kam alu dem ceda ate o kerina kalak si ringan i tepi lawit, janah lompatkenlah ku Sepanyol. 7Enda kin ndia kuta Tirus si meriah, si ipanteki i bas paksa si nuria? Enda kin kuta si enggo nuruh kalak ngepari lawit si mbelang lako majekken daerah-daerah jajahen? 8Ma enda kin kuta si saudagar-saudagar jadi raja janah ihamati kalak kal i belang-belang doni enda? Ise dage ngerencanakenca maka kuta e banci kernep? 9TUHAN si Mada Kuasa kap ngerencanakenca si e kerina! Irencanaken TUHAN si e gelah ngadi ukur meganjang erkiteken kemulianna, janah kalak si mehaga i bas kuta e ipeteruk.
10To perjumailah tanehndu o kalak Sepanyol, sabap lanai lit pelabuhenndu. 11Enggo iawatken TUHAN tanNa kempak lawit janah kerajan-kerajan enggo iruntuhkenNa. Enggo iperentahkenNa maka ingan-ingan perbinagan Punike iradasken. 12O kuta Sidon, kesenangenndu enggo keri, janah kalak si ringan i bas kam iayak-ayak. Aminna lompat pe ia ku Kiprus, i jah pe labo banci ia terkelin.
(13Kalak Babilon nge si merekenca kuta Tirus man rubia-rubia si merawa, labo kalak Assur. Kalak Babilon e ka nge simajekken menara-menara guna ngepung kuta Tirus, ngeruntuhken benteng-benteng kuta e, janah ngeradaskenca.)
14Nderkuhkenlah alu ceda ate, o kam anak-anak kapal si sangana erlayar i lawit. Kuta penalemenndu enggo ikernepken.
15Lit pagi paksana Tirus ilupaken pitu puluh tahun dekahna, e me asa umur geluh sekalak raja. Kenca paksa si pitu puluh tahun e enggo lepas, kuta Tirus bali me ras diberu si pencarinna erlua-lua bagi si tersinget i bas ende-enden enda nina: 16Buat kulcapindu, siar-siarlah kuta,
o diberu perdenggal si enggo ilupaken!
Kuitlah kulcapindu, endeken ka ende-endenndu,
gelah inget kalak ka kam mulihi.
17Kenca mentas si pitu puluh tahun e, iinget TUHAN ka mulihi Tirus, janah ibereNa ka ia mulihi ndahiken dahinna si ndekah; idayakenna me dirina i bas perbinagan man kerina kerajan-kerajan i babo doni enda. 18Upah ras duit si idatca arah perbinagan e ipersembahkenna me man TUHAN, duit e la isimpanna, tapi kalak si nembah man TUHAN me makesa nukur nakan ras uis si iperlukenna.
Currently Selected:
JESAYA 23: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
