JESAYA 22
22
Berita kerna Jerusalem
1Enda me berita kerna Baluren Pengenehenen.
Engkai maka kerina kam si ringan i bas kuta enda nangkih ku tarum rumahndu erpesta-pesta? 2Labo patut kam tawa-tawa dingen ersurak-surak alu meriah.
Sabap tenterandu si mate i bas perang labo mate erkiteken ngelawan musuh. 3Kerina puanglimandu enggo kiamen jenari itangkap ope denga ipanahkenna anak panahna. Kerina si mbisandu itaban aminna pe ia enggo lompat ku ingan si ndauh. 4E maka genduari pelepaslah aku sisada rate ceda nangisi kerina bangsangku si enggo mate. Ola cubakenndu ngapuli aku. 5Sabap si tuhuna, TUHAN si Mada Kuasa si Erdolat enggo netapken paksa enda sada paksa ketalun, keguntaren ras keguluten i Baluren Pengenehenen. Benteng kutanta enggo iruntuhken, janah sora nderkuh enggo terbegi erloling i uruk-uruk.
6Tentera i negeri Elam nari reh ngersak kuda ras make panah. Tentera i negeri Kir nari enggo nikapken ampang-ampangna. 7Baluren Juda si mehumur enggo dem alu gereta perang; tentera si ngersak kuda tedis i lebe-lebe gerbang Jerusalem. 8Kerina pertahanen Juda enggo runtuh.
Tupung kejadin e, ipedaratndu me senjata i bas gudang senjata nari. 9-10Iidahndu maka i bas piga-piga ingan, tembok kuta Jerusalem perlu ipekena. Ipepayondu kerina rumah-rumah i Jerusalem, jenari iruntuhkenndu deba-deba lako muat batuna guna pekena tembok kuta e. Guna nimpan lau, 11ibahanndu sada tambak i bas kuta e gelah banci itambakna lau si maler i bas kolam si ndekah nari. Tapi la iperdiatekenndu TUHAN, si enggo nuraken si enda nai-nai nari, janah IA mahanca si e jadi kerina.
12Tupung si e TUHAN si Mada Kuasa si Erdolat nuruh kam gelah tangis dingen erceda ate, ncukur buk takalndu ras make uis guni. 13Tapi kepeken tawa-tawa ras erpesta-pesta nge kam. Igelehndu biri-biri ras lembu man panganndu, janah minemi lau anggur kam. Nindu ngerana, “Marilah kita man ras minem, sabap pagi mate nge kita.” #1Kor 15:32
14 TUHAN si Mada Kuasa si Erdolat ngatakenca man bangku niNa, “Kidekah geluhna, kejahaten enda la teralemi i bas ia nari.” Bagenda me nina TUHAN si Mada Kuasa si Erdolat.
Kata pertenget man Sebna
15 TUHAN si Mada Kuasa si Erdolat nuruh aku njumpai Sepna, pengulu si ngaturken isi jabu raja, lako ngataken man bana bagenda, 16“Ise kin akapndu kam? Kai kin hakndu nukak kuburen man dirindu jine i bas lingling batu? 17Banci jadi kam kalak si mehaga, tapi itangkap TUHAN kam jenari ibenterkenNa ku ingan si ndauh. 18ItangkapNa kam desken bola jenari ibenterkenNa ku negeri si ndauh terbelinen. I je me kam mate i duru gereta perang si iagahkenndu e. Sabap kam kap erbahanca maka mela iakap isi jabu tuanndu. 19Iagui TUHAN kam i bas jabatenndu nari jenari idabuhkenNa pangkatndu si meganjang e.”
20Nina TUHAN man Sepna, “Adi si enda jadi, kudilo pagi suruh-suruhenKu Eliakim anak Hilkia. 21Kupakeken jubah ras gendit tanda jabatenndu man bana jenari Kubereken bana kerina kuasa si lit i bas kam. Ia desken sekalak bapa nandangi kalak Jerusalem ras Juda. 22Ia me si mbelinna kuasana i teruh raja kesusuren Daud. Ia me si njemak kunci kerajan; kai si italangina, la banci ise pe nutupsa, janah kai si itutupna, la banci ise pe nalangisa. #Ket 3:7 23Kupetetap ia alu paguh i bas inganna desken paku si ipakuken ku bas dingding. Kerina keluargana ihamati kalak erkite-kiteken ia.
24Tapi kerina kade-kadena ras kalak si man tanggungenna jadi baban si mberat man bana. Kerina kalak si ngarapken geluh man bana desken kudin ras belanga si sangkut i bas sada paku. 25Kenca si enda jadi, paku si nteguh ndai jadi longgar, jenari ndabuh. Janah e me kedungenna nandangi kerina kalak si erpengarapen ku je.” Bagenda me nina TUHAN.
Currently Selected:
JESAYA 22: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
