YouVersion Logo
Search Icon

JESAYA 14

14
Mulih i negeri pembuangen nari
1Mekuah ka pagi ate TUHAN man Israel bangsaNa, janah ipilihNa bangsa e jadi sikerajangenNa. ItamakenNa ka mulihken bangsa e ringan i bas negerina jine, jenari reh me bangsa-bangsa si deban janah ras ia tading i je. 2Melala pagi bangsa-bangsa nampati Israel lako mulih ku negeri si ibereken TUHAN man bana, janah i bas negeri e ia jadi budak kalak Israel. Itaban kalak Israel pe kalak si naban ia nai, janah kalak si nindih ia gelgel iperentahna me.
Raja Babil i bas doni kematen
3Ipengadi TUHAN pagi kerina si mesui ras kiniseran bangsa Israel, bage pe dahin si mberat si ipaksaken man bana. 4Tupung si e iuru-uru kalak Israel me raja Babil nina, “Raja si kejam enggo ndabuh! Ndigan pe lanai ia ngasup nindih kalak. 5Enggo ipeltepken TUHAN kuasa pemerentah-pemerentah si jahat, 6si nindih bangsa-bangsa alu rawana janah la erngadi-ngadi pesega-sega bangsa-bangsa si italukenna. 7Genduari kerina doni enggo banci teneng ras dame, janah kerina kalak rende alu meriah. 8Batang tusam ras cemara Libanon kerina ermeriah ukur erkiteken raja e enggo ndabuh, sabap arah kelawesenna lanai lit kalak reh nabahisa.
9Doni kematen enggo sikap ngalo-ngalo raja Babil. Begu kalak si nai erkuasa i doni enggo nggirgir, begu raja-raja keke i bas kursi kinirajanna nari. 10Nina begu e kerina man raja Babil, ‘Genduari kam pe enggo ka bali kotena ras kami. Kam pe enggo seri ras kami. 11Mbarenda kam ihamati alu ergendang, tapi genduari kam enggo ampar i bas doni kematen enda. Inganndu medem bernga janah cabinndu gaya.’
12O Raja Babil, nai kam bali ras bintang erpagi-pagi si terang tapi genduari kam enggo ndabuh i langit nari! Mbarenda italukenndu bangsa-bangsa, tapi genduari kam enggo idampesken ku taneh. #Ket 8:10; 9:1 13Mbarenda meganjang sura-surandu; inangkihindu atendu langit janah namaken kursi kinirajanndu i babo bintang-bintang si meganjang. Iakapndu banci kam kundul i das deleng si lit i Utara desken sekalak raja, i ja dibata-dibata pulung. #Mat 11:23; Luk 10:15 14Nindu, atendu inangkihindu embun-embun, gelah bali ras si Mada Kuasa. 15Kepeken genduari kam ipesusur ku doni kematen si mbagesna.”
16Kalak si ringan i bas doni kematen natap kam, janah alu ate mamang ipernehenna kam. Nungkun ia nina, “Enda kin kalakna si ngugur doni janah si mahanca kerajan-kerajan guntar? 17Enda kin kalakna si ngkernepken kuta-kuta janah si nalihken doni jadi gurun pasir? Enda kin kalakna si la pernah mulahi tabanenna, si la meresa mulih ku rumah? 18Kerina bekas raja-raja doni medem i bas kuburen si mejile, 19tapi kam la lit kuburenndu; maitndu iambekken janah ipelepas macik, itamburi salu mait tentera si mate i bas perang, ibenterken ku bas lubang si erbatu-batu, jenari iperjaki. 20Erkiteken icedakenndu negerindu, janah rayatndu ibunuhindu, e maka kam la ikuburken bagi raja-raja si deban. Keluargana si jahat pe la lit si tading. 21Benakenlah penggelehen! Anak-anakndu mate kerina erkiteken dosa nini-ninina. La lit sekalak pe anak-anakndu e jadi raja i doni tah majekken kuta.”
Dibata ngkernepken Babil
22Nina TUHAN si Mada Kuasa, “Kuperangi pagi Babil, jenari kukernepken. Kai pe la lit Kutadingken; la lit si terkelin, danak-danak pe lang. Aku, TUHAN, enggo ngataken si enda. 23Kusalihken Babil jadi paya-paya, alingkupa ngenca tading i je. Kuradasken Babil seh kai pe la lit si tading. Aku, TUHAN si Mada Kuasa enggo ngataken si enda.”
Dibata ngkernepken kalak Assur
24 TUHAN si Mada Kuasa enggo ersumpah nina, “Kai si Kurencanaken la banci lang jadi. KeputusenKu la banci lang idalanken. #Jes 10:5-34; Nah 1:1–3:19; Sep 2:13-15 25Kukernepken kalak Assur i bas negeringKu Israel janah Kudedehi ia kerina i das deleng-delengKu. Kutangtangi bangsangKu i bas pasangen ras baban si mberat si ipaksaken bangsa Assur man bana. 26Enda me keputusenKu kerna doni enda, janah tanKu enggo Kuawatken ngukum bangsa-bangsa.” 27TUHAN si Mada Kuasa enggo netapken ukurNa ngelakoken si enda; enggo iawatkenNa tanNa guna ngukum, janah ise pe la ngasup ngambatisa.
Dibata ngukum kalak Pilisti
28Enda me berita si imomoken i bas tahunna Raja Ahas mate. #2Raj 16:20; 2Kro 28:27
29Kalak Pilisti, ola akapndu meriah aminna gia perpalu si mekpek kam enggo penggel. Adi mate sada nipe, reh ka nge nipe si deban si rawan asa si lebe nggancihkenca. Naper me tinaruh nipe, janah anakna, e me naga si banci kabang. #Jer 47:1-7; Esek 25:15-17; Joel 3:4-8; Amos 1:6-8; Sep 2:4-7; Sak 9:5-7 30Ikernepken me kam alu kelihen si mesangat seh maka lanai lit sekalak pe tading nggeluh. Tapi TUHAN pagi si mpermakani bangsaNa si musil-musil janah iberena ia nggeluh alu teneng.
31Nderkuhkenlah janah serkolah kam mindo penampat, o kam kerina kuta-kuta Pilisti. Gentarlah kam kerina! Abu si nggebuk bagi embun reh i Utara nari tanda kerehen tentera, tentera si la lit kalak percikcik i bassa.
32Uga ninta ngaloisa persuruhen si reh i negeri Pilisti nari? Sikataken me man bana maka TUHAN enggo manteki Sion janah bangsaNa si lit i bas kiniseran ndat ketenengen i je.

Currently Selected:

JESAYA 14: BTX

Highlight

Copy

Compare

Share

None

Want to have your highlights saved across all your devices? Sign up or sign in