JESAYA 13
13
Iukum Dibata me bangsa Babil
1Enda me berita kerna Babil, si ialoken Jesaya anak Amos i bas Dibata nari: #Jes 47:1-15; Jer 50:1–51:64
2Penangkihlah bendera perang i datas uruk-uruk si salang! Lebuhlah tentera janah ewatken tanndu jadi tanda man bana maka iserangna pintun-pintun gerbang kuta si megombang e. 3TUHAN enggo ndilo tentera pilihenNa, tentera si banci iagahken, si la lit kebiarenna, guna nehken ukumen man kalak si nembeh ateNa.
4Dengkehkenlah sora gejek i datas deleng-deleng, sora gejek jelma si nterem, sora bangsa-bangsa ras kerajan si sangana pulung. TUHAN-nu-bala-Serdadu, sangana nikapken tenteraNa lawes erperang. 5Tentera e reh i negeri-negeri si ndauh i tampuk doni nari. Erkiteken rawaNa, reh TUHAN ngeradasken negeri e kerina.
6Nderkuhken, sabap wari TUHAN enggo ndeher; sanga si e, reh me si Mada Kuasa ngkernepkenca. #Joel 1:15 7E maka kerina kalak lanai ergegeh tanna, jenari bene ukurna. 8Mbiar ia janah mesui akapna, bagi suina iakap diberu si sangana mupus. Sinehenen ia sapih-sapih ia ban biarna, janah megara pe ayona nahanken suina. 9Reh me wari TUHAN, wari si dem alu pernembeh ras gara ate TUHAN lanai teralang. Doni enda ibahanNa jadi taneh mesawang, janah kerina kalak perdosa ikernepkenNa. 10Kerina bintang ras rarasen bintang-bintang ngadi ersinalsal, matawari mbiring tupung pultak erpagi-pagi, janah bulan pe la ersinalsal. #Esek 32:7; Mat 24:29; Mrk 13:24-25; Luk 21:25; Ket 6:12-13; 8:12
11Nina TUHAN, “Kuradasken me isi doni janah Kuukum kerina kalak jahat erkiteken dosana. Kasa kalak si meganjang rukur Kuperjak janah kalak megombang ras kejam Kuukum. 12Sunahen pagi muat emas asangken muat kalak si nggeluh denga. 13Kubahan pagi maka i bas wari e, tupung Aku, TUHAN si Mada Kuasa encidahken rawangKu maka langit mugur-ugur janah doni mistak i bas inganna nari.
14Bangsa-bangsa si deban si ringan i Babil kiam pagi mulihken ku negerina jine, merap marpar desken belkih si tersengget ibahan perburu, tah pe bagi biri-biri si la lit permakanna. 15Kasa kalak si tertangkap, minter itebak seh mate. 16I lebe-lebe matana anakna si kitik idampesken, rumahna irampasi janah ndeharana ipaksa kalak.”
17Nina TUHAN, “Kusuruh pagi kalak Medi nerang Babil. La diatena sitik pe ngenehen pirak, janah emas pe la morah atena. 18Munuhi anak perana saja ngenca atena alu panahna. Subuk kempak anak gara-gara, bage pe danak-danak, la sitik pe atena mekuah. 19Babilon e me kerajan si mejilena i babo kerina kerajan-kerajan, janah e me jadi kemegahen rayatna. Tapi Aku, TUHAN, Kuruntuhken me Babil, bali ras pengeruntuhkenKu Sodom ras Gomora. #Kej 19:24 20Ndigan pe lanai lit kalak nggeluh i je. Kalak Arab pe lanai majekken kemahna i je, bage pe kalak permakan lanai mpermakani asuh-asuhenna i bas ingan e. 21Kuta e pagin jadi ingan rubia-rubia gurun pasir, janah ingan alingkupa erbahan asarna. Perik unta tading i je janah kambing kerangen lompat-lompat arah runtuhenna. #Jes 34:14; Sep 2:14; Ket 18:2 22Janah serigala terbegi sorana erloling i bas menara-menara ras istana-istanana nari. Paksana nandangi seh. Wari-wari Babil enggo menam keri.”
Currently Selected:
JESAYA 13: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
