JESAYA 15
15
Dibata ngkernepken Moap
1Enda me berita kerna Moap. Kuta Ar ras Kir ikernepken i bas sada berngi saja, janah i bas berngi e ka me Moap iradasken. #Jes 25:10-12; Jer 48:1-47; Esek 25:8-11; Amos 2:1-3; Sep 2:8-11 2Kalak Dibon nangkih ku das uruk lako tangis i bas ingan sembah-sembahen. Kuta Nebo ras Medeba ingandungi kalak Moap; buk takalna ras janggutna enggo icukurna tanda atena ceda. 3Kalak si erdalan-dalan i pasar make uis guni, i tiga ras i datas tarum rumah, tangis ngandung kerina. 4Kalak Hesbon ras Eleale nderkuh, janah sorana nderkuh terbegi seh ku Jahas. Serdadu-serdaduna pe nggirgir, janah enggo bene ukurna.
5Megogo kal ateku ngenehen Moap. Rayatna enggo kiam ku kuta Soar, bage pe ku Eglat-Selisia. Janahna tangis deba nangkeng arah dalan si ku Luhit. Deba ka kiam ku Horonaim, iherna tangis belin. 6Lau Nimrim enggo kerah, dukut-dukut i duruna melus, lanai lit tading bulung-bulung si meratah. 7Jelma sienterem lawes ngepari Baluren Tusam, atena gelah banci pulah rikut ras erta-ertana. 8I bas kerina perbalengen Moap terbegi sora nderkuh. Sora nderkuh e terbegi ka pe i kuta Eglaim ras Beerelim. 9I kuta Dibon lau belin enggo megara erkiteken dareh. Janah si terkeleken asa si e tole ibahan Dibata man kalak si ringan denga i je. IsuruhNa ku je singa ngerigep kerina kalak Moap si tading denga.
Currently Selected:
JESAYA 15: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
