HOSEA 9
9
Imomoken Hosea ukumen man Israel
1Olanai kam ersurak-surak dingen ermeriah ukur, o kalak Israel, bali kam ras kalak perbegu. Kam enggo erlua-lua, e me nilah i bas Dibatandu nari. I belang-belang negeri e enggo idayakenndu dirindu desken diberu perlua-lua man dibata Baal, janah meriah kal akapndu ngaloken gandum si iakapndu jadi upahndu i bas ia nari. 2Tapi nandangi lanai bo cukup gandum ras minak saitunndu janah anggurndu pe lanai lit. 3Kalak Israel lanai pagi ringan i bas negeri TUHAN, tapi terpaksa mulih ku Mesir, dingen arus man pangan si pantang i Assur. 4I bas negeri-negeri e lanai bo pagi banci ipersembahkenna anggur man TUHAN, dingen lanai banci ibahanna persembahen. Panganna erbahanca keliamen kerina kalak si manca, bali ras pangan si ipan tupung paksa penguburen. Si e kerina mesuri beltekna ngenca lakonna, tapi la lit sitik pe si banci ibaba jadi persembahen ku Rumah Pertoton TUHAN. 5E maka adi enggo seh paksa wari raya si enggo itetapken guna kehamaten man TUHAN, lanai lit kai pe si banci ilakokenna. 6Adi paksa kecedan enggo reh, janah bangsa e ikerapken, ipepulung bangsa Mesir me ia, tapi ipepulung guna ikuburken i Mempis! Erta-ertana si meherga, e me pirak, bage pe pertapaken ingan rumahna pajek mbarenda, kerina pagi itamburi dukut ras rambah duri.
7Paksa ukumen seh me; tupung si e idat kalak me balasen perbahanenna. Tupung si e pagi ieteh Israel me! Nina, “Nabi enda motu kal. Kalak si iingani kesah enda adon kap.” Elem-elem kal atena kempak aku sabap bage kal belinna dosana. #Luk 21:22 8Dibata enggo nuruh aku jadi nabi lako mpersingeti bangsaNa Israel. Tapi ku ja pe aku lawes isidingi bangsa e atena aku desken perik. I bas negeri Dibata jine, bangsa e kap musuh nabi. 9Kejahatenna lanai tanggung i bas kerina perbahanenna, bali ras tupung ia i Gibea nai. Inget Dibata nge dosana e, janah la banci lang iukumNa me ia erkiteken si e. #Hak 19:1-30
Dosa Israel ras ukumenna
10Nina TUHAN, “Tangtangna Kujumpai nai Israel, bali kap ia ras anggur si turah i bas gurun pasir. Tangtangna Kuidah nai nini-ninina, bali kap ras ngidah buah ara si pemenana tasak i bas musimna. Tapi enggo kenca ia seh i Deleng Peor, mulai me ia nembah man Baal, janah minter kal ciga ateKu, bali ras cigana ateKu nandangi dibata-dibata si ikelengina e. #Bil 25:1-5 11E maka kiniulin Israel kabang me desken perik-perik, janah lanai pagi lit anak si ipupusna, lanai lit diberu si mehuli kulana, lanai lit anak i bas bertin. 12Janah aminna ipebelin-belinna pe anakna, Kubuat nge kerina, sada pe la lit Kutadingken nggeluh. Kenca Kutadingken bangsa enda, kena cilaka me ia.”
13O TUHAN, banci kuidah anak-anakna ipeburui jenari ibunuh. 14Kai ndia si kupindo man baNdu guna bangsa enda? Bahanlah maka pernanden-pernandenna la banci mupus, dingen la ngasup ia pepinemken anakna.
Ukumen TUHAN man Israel
15Nina TUHAN, “Kerina perbahanenna si jahat ibenaken i Gilgal. I je me bena-benana ateKu nembeh man bana. Janah erkiteken kejahaten si ibahanna, kupelawes me ia i bas tanehKu nari. Lanai ateKu keleng kempak ia, sabap kerina peminpin-peminpinna enggo berontak ngelawan Aku. 16Bangsa Israel igudam. Bangsa e bali kap ras sinuan-sinuan si enggo kerah urat-uratna, si lanai erbuah. Lanai lit tubuh anakna, janah aminna lit denga pe, Kubunuh me anak-anak kekelengenna e.”
Nabi ngerana kerna Israel
17Dibata si kusembah, itulakna nge bangsaNa, sabap la idengkehken bangsa e Ia. E maka lajang-lajang me ia i tengah-tengah bangsa-bangsa.
Currently Selected:
HOSEA 9: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
