HOSEA 10
10
1Bangsa Israel bali kap ras batang anggur si meramis buahna. Reh senangna akapna, reh buena ipajekkenna batar-batar. Reh buena idatca ulih jumana, reh jilena ka ibahanna tiang batu si man sembah-sembahenna. 2Bangsa si pusuhna dem alu guak e, genduari la banci lang ngenanami kiniseran erkiteken dosana. Iperperken Dibata me batar-batarna e dingen batu sembah-sembahenna e ikernepkenNa.
3E maka ikatakenna me genduari nina, “La lit rajanta erkiteken la kita mbiar man TUHAN. Tapi kai kin lakonna raja man banta?” 4Ibelaskenna kata la tuhu, dingen padan si ipadankenna la erguna. Kebujuren enggo salih jadi kejahaten, janah turah desken dukut si erbisa i bas juma si enggo itenggalai.
5Kalak si ringan i kuta Samaria mbiar dingen suhsah erkiteken kebenen lembu emas si i Betel. Ia ras imam-imam berhala e tangis perban si e. Ngandung ia kerina erkiteken emas mulia si lit i bas gana-gana e itangtangi. 6Gana-gana e ibaba ku Assur jadi persembahen man raja si mbelin e. Israel igombangi dingen ipemela-melaken erkiteken ajar si la uli si iikutkenna. 7Rajana ibabaken desken karap-karap iombakken lau. 8Pajuh-pajuhen Israel si i datas uruk-uruk i Awen, ikernepken me. Rambah duri ras dukut turah me i babo batar-batarna. Erlebuh me bangsa e kempak deleng-deleng nina, “Tamburi min kami!” janah man uruk-uruk nina, “Tutupi min kami!” #Luk 23:30; Ket 6:16
TUHAN ndabuhken ukumen man Israel
9Nina TUHAN, “Bangsa Israel la erngadi-ngadi erdosa mulai kin i Gibea nari. E maka pecah me perang i Gibea ngkenai ia. #Hak 19:1-30 10Kuelis-elis me bangsa si perdosa enda dingen Kuukum ia. Bangsa-bangsa pulung ngelawanca dingen iukum me ia erkiteken dosana si mbue e.
11Mbarenda Israel desken lembu jarah-jarah si terajar; katawari pe sikap dingen nggit ngerik gandum. Tapi enggo Kutetapken namaken pasangen ku kudukna si mejile e gelah idahikenna dahin si terberaten. Kubahan Juda ngerintak tenggala dingen Israel ngeroka. 12Ningku man bana, ‘Tenggalailah juma si mbaru, suankenlah kebenaren, dingen peranilah ulihndu erkemalangen man bangKu. Enggo seh paksana kam mulih ku Aku, TUHAN, maka Aku reh dingen encurcurken kebenaren man bandu.’ #Jer 4:3 13Tapi kepeken isuanndu kejahaten dingen iperanindu buahna. Enggo ipanndu buah guakndu.
Perban ernalem kam man gereta perang ras tenterandu si mbue, 14e maka reh me perang ku tengah-tengah bangsandu, janah kerina bentengndu ikernepken. Bali me e pagi ras paksa Raja Salman, tupung ikernepkenna kuta Bet-Arbel i bas perang. Nande ras anak-anakna idampeskenna seh mate. 15Si e me pagi jadi man bandu, o anak kuta Betel, erkite-kiteken kejahaten si mejin si enggo ilakokenndu. Enggo kenca pagi perang ibenaken, raja Israel minter mate.”
Currently Selected:
HOSEA 10: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
