HOSEA 8
8
TUHAN numpahi Israel erkiteken isembahna berhala
1Nina TUHAN, “Embuslah terompet! Musuh enggo reh desken rajawali muatna nangkis. BangsangKu enggo ngelanggar perpadanen si Kubahan ras ia, dingen enggo ilawanna pengajarenKu. 2Aminna gia ikatakenna Aku Dibatana, dingen iakukenna maka ia bangsangKu, ras itandaina Aku, 3tapi situhuna itulakna kai si mehuli. Erkiteken si e iayak-ayak musuhna me ia.
4Ipilihna rajana, tapi la Aku isungkunna. Iangkatna peminpin-peminpinna la arah senang ateKu. Ibuatna pirakna ras emasna, ijadikenna gana-gana, e maka kernep me ia. 5Ciga ateKu lembu emas si isembah penduduk kuta Samaria. Nembeh kal ateKu man bana kerina. Asa kai nari dekahna maka ia ngadi nembah man berhala-berhala? 6Sekalak tukang Israel kap si mahan gana-gana e, janah si e la kap dibata. Gana-gana lembu emas si i Samaria, kuga pe iripukken. 7Erkiteken ierdangkenna angin, e maka iperanina me angin kalinsungsung! Juma page si la lit ruhina, labo banci dat cimpa arah e. Tapi bicara lit pe, bangsa si deban nge ngkerikenca. 8Israel enggo bali kap ras bangsa si deban, janah lanai erguna desken pecah-pecah kudin taneh. 9Bangsa Israel bali kengna ras kelede si meliar, si ndalani dalanna jine. Lawes ia mindo penampat man Assur, janah iupahina bangsa-bangsa si deban jadi sekawalna. 10Tapi genduari Kupepulung me ia lako ngukumsa. E maka minter me itindih baban si mberat i bas raja Assur nari.
11Reh buena batar-batar si ipajekken Israel lako nangtangi dosana, reh buena kap inganna ngelakoken dosa! 12Aminna Kusuratken pe man bana pengajaren si lanai lang-lang buena, itulakna kerina desken barang si la itandaina. 13Ipersembahkenna persembahen gelehen man bangKu, jenari ipanna daging persembahen e. Tapi Aku, TUHAN, la erngena ate man bana; janah genduari Kuinget me dosana e, e maka Kuukum me ia erkite-kiteken si e. Kuulihken me ia ku Mesir.
14Kalak Israel enggo majekken istana-istana, tapi enggo ilupakenna Si Nepa ia. Kalak Juda enggo majekken kuta-kuta si erbenteng. Tapi Kupesusur me api lako engkeriken istana-istana ras kuta-kutana e.”
Currently Selected:
HOSEA 8: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
