HOSEA 7
7
1Katawari ateKu Kupepalem bangsangKu Israel janah Kupesenang ka ia mulihi, i je ka minter Kuidah kejahaten ras dosa si ibahanna. Sitipu-tipun ia sapih-sapih ia; ibongkarna rumah kalak, nangko ia; irampokna kalak i bas pasar-pasar. 2La pernah tersinget i bas ukurna maka Kuinget nge kerina kejahaten enda; tapi dosa-dosana ngkeleweti ia, e maka terpaksa rusur Kuidah.”
Pertakin i bas istana
3Nina TUHAN, “Rayat muat ukur raja ras pegawai-pegawaina alu pertakin ras guak. 4Kerina ia penipu dingen la patuh. I bas pusuhna dem elem-elem bali ras api i bas ginuhur si gara; tukang roti la perlu nggestungi rantingna, mulai roti ituang seh roti e enggo kembang. 5I bas pesta si ibahan raja, ibahanna raja ras pegawai-pegawaina mabuk alu anggur, seh maka ilakokenna perbahanen si man kemelanken. 6Tuhu, pusuhna bali ras ginuhur si gara, dem alu pertakin. Gedang-gedang berngi pernembeh atena merara, janah erpagi-pagi gurlah jadi api si gara.
7I bas pernembeh atena si gara, ibunuhna peminpin-peminpinna. Raja-rajana ibunuhna sada-sadai, tapi la lit sada pe si erlebuh man bangKu mindo penampat.”
Israel ras bangsa-bangsa si deban
8Nina TUHAN, “Bangsa Israel bali kap ras roti si meseng sembelah. Ernalem ia man bangsa-bangsa sekelewetna, 9janah la iangkana maka bangsa si deban e nge si engkeriken gegehna. Wari-warina enggo ibeligai, tapi la sitik pe igejapna. 10Kiniganjangen ukur bangsa Israel desken sada saksi si ngelawan Israel. Tapi aminna kai gia enggo jadi man bana, lalap ia la mulih man bangKu, TUHAN Dibatana. 11Israel bali kap ras ndukur si motu; mula-mula erlebuh ia man Mesir mindo penampat, jenari lawes ka ia ku Assur! 12Tapi Kukimbangken me bantongKu maka Kutangkap ia bagi perik sangana kabang. Kuukum me ia erkiteken kejahaten si enggo ilakokenna.
13Cilaka me ia! Enggo itadingkenna dingen ilawanna Aku. E maka kernep me ia. Kukelini ateKu ia, tapi ilawanna Aku alu kata guak. 14Pertotonna la i bas pusuhna nari, tapi idampes-dampeskenna bana janahna ngandung i bas ingan medem bali ras kalak perbegu. Tupung ia ertoto mindo gandum ras anggur ilukaina bana bagi kalak perbegu. Tuhu-tuhu kal ia pemberontak! 15Aminna Aku nge si mpebelin-belinca ras si mpegegehi ia, tapi iukurkenna nge mahan si la mehuli man bangKu. 16La erngadi-ngadi itundalkenna Aku, jenari ngadap ia man dibata-dibata si la ergegeh. La sitik pe ia terteki, bali ras panah si enggo baling. Erkiteken peminpin-peminpinna meganjang ukurna, e maka mate me ia kena pedang, janah tawa-tawa kalak Mesir ngidahsa.”
Currently Selected:
HOSEA 7: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
