ULANGEN 26
26
Kerna persembahen ulih juma si pemena
1“Adi enggo ikuasaindu negeri si ibereken TUHAN Dibatandu man bandu janah enggo kam ringan i je, 2tep-tep iperanindu jumandu, bagin si pemena si iperanindu arus itamakenndu ku bas sumpit, jenari arus ibabandu ku ingan ersembah si sada e. #Kel 23:19 3Dahilah imam si sanga erdahin i bas paksa si e, janah kataken man bana, ‘Ngaku aku man TUHAN Dibatangku maka enggo aku bengket ku negeri si ipadankenNa man nini-nini kami maka iberekenNa man kami.’
4Ialoken imam sumpit si babandu e, iamparkenna i lebe-lebe batar-batar persembahen TUHAN Dibatandu. 5Kenca bage arus ibelaskenndu kata-kata enda i lebe-lebe TUHAN, ‘Nini-niningku e me bangsa Aram, kalak perlajang, kalak si la lit tetap inganna tading, si maba keluargana ku Mesir. Sanga e sitik ngenca beliganna, tapi dungna ia jadi bangsa si mbelin ras megegeh. 6Kejam kal perbahanen bangsa Mesir man kami, ipaksana kami erdahin jadi budak. 7Dungna serko kami mindo penampat man TUHAN, Dibata nu nini-nini kami. Ibegi TUHAN perserko kami, idahNa kiniseran, kelatihen, ras kesuhsahen kami. 8Alu gegehNa si mbelin ipulahiNa kami i Mesir nari. IlakokenNa tanda kuasa, ibanNa kejadin-kejadin si mejin. 9IbabaNa kami i jah nari ku jenda, iberekenNa man kami negeri si mehuli ras mehumur enda. 10E maka genduari kubaba man TUHAN, bagin si pemena i bas ulih juma si enggo iberekenNa man bangku.’
Kenca bage amparken sumpit e i adep-adepen TUHAN janah ersembahlah kam i je. 11Ermengkahlah atendu kerna kerina si mehulina si ibereken TUHAN Dibatandu man bandu ras man keluargandu. Bere maka kalak Lewi ras kalak pertandang pe ikut ras kam i bas pesta si meriah e.
12Tiap tahun peteluken bereken persembahen persepuluhenndu, e me sepersepuluh i bas ulih jumandu, man kalak Lewi, kalak pertandang, anak-anak melumang, ras man diberu balu-balu, maka i bas tep-tep perpulungen bias nakan si iperlukenna. Kenca enggo ibanndu bage, #Ul 14:28-29 13kataken lah man TUHAN, ‘Lanai lit tading persembahen persepuluhen e i bas rumahku erkiteken enggo kubereken e man kalak Lewi, kalak pertandang, anak-anak melumang, ras man diberu balu-balu rikutken si iperentahkenNdu maka kulakoken e. La kusimbak, ras la aku lupa sada pe perentah-perentahNdu kerna persembahen persepuluhen e. 14Sanga aku erceda ate pe labo e kupan. Sanga aku la bersih rikutken peraturen agama pe labo sitik pe kubaba persembahen persepuluhen e ndarat i bas rumahku nari. La kubereken sitik pe man persembahen kalak mate. Enggo kuikutken kam o, TUHAN. Enggo kulakoken kerina perentahNdu kerna persembahen persepuluhen e. 15Nehenlah ku teruh i bas inganndu si badia nari i Surga janah pasu-pasulah bangsandu Israel. Bereken pe pasu-pasuNdu man negeri si dem kebayaken ras mehumur enda sue ras si ipadankenNdu man nini-nini kami.’ ”
Kam jadi bangsa pilihen Dibata
16“I bas wari enda TUHAN Dibatandu merentahken kam ngikutken kerina undang-undangNa; e maka ikutkenlah alu tutus ras alu bulat ukurndu. 17I bas wari enda enggo iakuindu TUHAN jadi Dibatandu. Enggo kam erpadan ngikutken IA, make kerina undang-undangNa, ras ngikutken kerina perentah-perentahNa. 18I bas wari enda enggo ialoken TUHAN kam jadi bangsaNa, sue ras si ipadankenNa man bandu, janah iperentahkenNa kam ngikutken kerina undang-undangNa. #Kel 19:5; Ul 4:20; 7:6; 14:2; Tit 2:14; 1Pet 2:9 19IjadikenNa kam jadi sada bangsa si belinen asang kerina bangsa-bangsa si deban si enggo ijadikenNa, janah arah kam gelarNa terpuji dingen ermulia. Kam jadi bangsaNa sue ras si ipadankenNa.”
Currently Selected:
ULANGEN 26: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
