ULANGEN 27
27
Undang-undang TUHAN itulis i babo batu
1Kenca bage, Musa ras peminpin-peminpin Israel ngerana man bangsa e, “Ikutkenlah kerina perentah-perentah si kubereken man bandu wari enda. 2Sanga kam ngepari Lau Jordan, bengket ku negeri si ibereken TUHAN Dibatandu man bandu, pajekkenlah piga-piga batu galang, lapisi alu pelester, #Jos 8:30-32 3kenca bage suratken i je undang-undang ras pengajaren enda. Adi kam enggo bengket ku bas negeri si mehumur dingen dem kebayaken si ipadanken TUHAN Dibata nu nini-ninindu man bandu, 4janah adi enggo ikeparindu Lau Jordan e, pajekken batu si bage i das Deleng Ebal, bagi si kuperentahken man bandu i bas wari enda, jenari lapisi alu pelester. 5Pajekken lah sada batar-batar batu, alu la make perkakas besi. #Kel 20:25 6Sabap kasa kai batar-batar si ipajekkenndu man TUHAN Dibatandu arus maka ibahan i bas batu si langa ipahat. I je arus ipersembahkenndu persembahen tutungen, 7janah i je ka pe arus ipersembahkenndu ras ipanndu persembahen persadanndu, janah ermengkahlah atendu i adep-adepen TUHAN Dibatandu. 8I babo batu si ipelester ndai suratken lah terang-terang tep-tep perkatan undang-undang Dibata.”
9E maka Musa, ras imam-imam kalak Lewi, ngerana man kerina bangsa Israel, “Perdiateken ras begikenlah, o bangsa Israel. Sendah kam enggo jadi bangsa TUHAN Dibatandu. 10E maka ikutken IA, cikep kerina undang-undangNa si kubereken man bandu i bas wari enda.”
Sumpah man kalak si nimbak Dibata
11Ngerana Musa man bangsa Israel, 12“Kenca enggo kam ngepari Lau Jordan, tedislah suku Simeon, Lewi, Juda, Isakar, Jusup, ras suku Benyamin i datas Deleng Gerisim tupung pasu-pasu e ibelasken. #Ul 11:29; Jos 8:33-35 13Tapi suku Ruben, Gat, Aser, Sebulon, Dan ras suku Naptali tedis lah i datas Deleng Ebal tupung sumpah kebilangen e ibelasken. 14Ibelasken kalak Lewilah kata-kata enda alu sora megang,
15‘Dibata numpahi kalak si erbahan berhala batu, kayu, ntah logam, janah si ersembah ku je erbuni-buni. Sabap nembeh ate TUHAN adi nembah man berhala.’
E maka kerina bangsa e ngaloisa, ‘Amin!’ #Kel 20:4; 34:17; Im 19:4; 26:1; Ul 4:15-18; 5:8
16‘Dibata numpahi tep-tep kalak si la mehamat man nande ras bapana.’
E maka kerina bangsa e ngaloisa, ‘Amin!’ #Kel 20:12; Ul 5:16
17‘Dibata numpahi kalak si ngasak juma temanna si balengen.’
E maka kerina bangsa e ngaloisa, ‘Amin!’ #Ul 19:14
18‘Dibata numpahi kalak si erbanca papak kalak si pentang.’
E maka kerina bangsa e ngaloisa, ‘Amin!’ #Im 19:14
19‘Dibata numpahi kalak si ngerampas hak kalak pertandang, hak anak-anak melumang, ras hak diberu balu-balu.’
E maka kerina bangsa e ngaloisa, ‘Amin!’ #Kel 22:21; 23:9; Im 19:33-34; Ul 24:17-18
20‘Dibata numpahi kalak si njuruken bapana alu ersada kula ras sekalak diberu bapana e.’
E maka kerina bangsa e ngaloisa, ‘Amin!’ #Im 18:8; 20:11; Ul 22:30
21‘Dibata numpahi kalak si ersada kula ras rubia-rubia.’
E maka kerina bangsa e ngaloisa, ‘Amin!’ #Kel 22:19; Im 18:23; 20:15
22‘Dibata numpahi kalak si ersada kula ras turangna sada nande sada bapa, ntah turangna sada nande pedauh bapa.’
E maka kerina bangsa e ngaloisa, ‘Amin!’ #Im 18:9; 20:17
23‘Dibata numpahi kalak si ersada kula ras mamina.’
E maka kerina bangsa e ngaloisa, ‘Amin!’ #Im 18:17; 20:14
24‘Dibata numpahi kalak si munuh erbuni-buni.’
E maka kerina bangsa e ngaloisa, ‘Amin!’
25‘Dibata numpahi kalak si ngaloken upah guna munuh kalak si la ersalah.’
E maka kerina bangsa e ngaloisa, ‘Amin!’
26‘Dibata numpahi kalak si la ngikutken kerina undang-undang ras pengajaren Dibata.’
E maka kerina bangsa e ngaloisa, ‘Amin!’ ” #Gal 3:10
Currently Selected:
ULANGEN 27: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
