ULANGEN 25
25
1Mungkin lit dua kalak Israel lawes ku pengadilen ngaduken perkarana. Kenca iadili ieteh maka sekalak ersalah sekalak nari lang. 2Adi ukumen si ersalah ndai ukumen balbal, ipelangkem hakim ia lebe, e maka ibalbali. Piga kali ia arus ibalbali e, ngenen kesalahenna. 3Banci ia ibalbali empat puluh kali, tapi la banci lebih. Adi lebih asang si e, ia enggo ipekitik i lebe-lebe jelma si nterem. #2Kor 11:24
4Ola sompel babah lembu si sangana ngerik.” #1Kor 9:9; 1Tim 5:18
Utang nandangi senina si enggo mate
5“Adi dua kalak si ersenina tading ras-ras, sekalak i bas si dua e mate alu la lit nadingken sada pe anak dilaki; adi bage ndehara si enggo mbalu e la banci sereh man kalak si deban, i darat keluarga e. Rutang seninana ndai ngelakomanganisa. #Mat 22:24; Mrk 12:19; Luk 20:28 6Anakna sintua si dilaki si ipupus kalak enda, ikira jadi anak seninana si enggo mate ndai; alu bage tetap lit sinursurna i Israel. 7Tapi adi seninana ndai la nggit ngelakomanganisa, iadap diberu e lah peminpin-peminpin kuta alu ngataken, ‘Senina perbulangenku la nggit ertanggung jawab. La ia nggit mereken sinursur man seninana i tengah-tengah bangsa Israel.’ #Rut 4:7-8 8Kenca bage peminpin-peminpin kuta ndilo ia jenari ngerana man bana. Adi tetap denga ia la nggit ngelakomangani diberu seninana e, 9ijumpai diberu si enggo mbalu e lah i adep-adepen peminpin-peminpin kuta, ibuatna sembelah selopna, icidurina ayo senina perbulangenna e nina, ‘Enda me jadina man kalak si la nggit mereken sinursur man seninana.’ 10Keluargana e itandai i Israel ‘keluarga kalak si enggo itangtangi selopna.’ ”
Undang-undang si deban
11“Adi dua dilaki sangana rubati, jenari sekalak i bas si dua e reh ndeharana nampatisa alu mecek kelamin imbang dilakina e, 12ola cidahken perkuah ate man ndeharana e; keret saja tanna.
13-14Ola kam nipu adi kam mpergunaken timbangen ntah sukat-sukat. #Im 19:35-36 15Pakelah timbangen tah sukat-sukat si bujur, gelah gedang umurndu i negeri si ibereken TUHAN Dibatandu man bandu. 16Nembeh ate TUHAN man kalak penipu.”
Perentah munuh bangsa Amalek
17“Inget kuga perbahanen bangsa Amalek sanga kam reh i Mesir nari. #Kel 17:8-14; 1Sam 15:2-9 18La ia mbiar ngenen Dibata, e maka sanga kote dingen latih iakapndu iserangna kam i pudi nari, janah ibunuhina kerina kalak si merap arah pudi. 19E maka, adi enggo ibereken TUHAN Dibatandu man bandu negeri e, janah enggo aman kam ibahanna i bas kerina musuh-musuhndu si lit i kelewetndu, arus maka ibunuhndu kerina bangsa Amalek, gelah ise pe ola nari ngingetsa. Ola lupa si e!”
Currently Selected:
ULANGEN 25: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
