ULANGEN 24
24
Kerna ndehara si enggo iulihken perbulangenna
1“Adi sekalak dilaki ngempoi sekalak diberu, dungna isirangkenna atena, erkiteken ndeharana e ngelakoken lagu langkah si man kemelanken, isuratkenna surat mulih, iberekenna man ndeharana e, jenari isuruhna ia lawes. #Mat 5:31; 19:7; Mrk 10:4 2Kenca kalak ndai sirang diberu si ndai sereh ka man dilaki si deban, 3tapi dilaki si e ka pe isirangkenna ka atena ia, e maka ibahanna ka surat mulih, iberekenna man diberu e, e maka isuruhna ia lawes i bas rumahna nari. Ntah pe umpamaken dilakina si peduaken e mate. 4I bas soal si dua enda, lanai banci iempoi dilakina si pemena ndai ka diberu e. Arus maka ianggapna diberu e enggo cemar. Adi iempoina denga ka diberu e, perbahanenna e enggo ncurnaken TUHAN. La banci ibanndu dosa si bage belinna i bas negeri si ibereken TUHAN Dibatandu man bandu.”
Erbage-bage undang-undang
5“Sekalak si mbaru erjabu la banci ipaksa jadi tentera ntah ndahiken dahin guna jelma si nterem. Arus maka ia bebas sada tahun dekahna, gelah banci ia tading i rumah dingen mereken kemalemen ate man ndeharana.
6Adi kai-kai gia ipinjamkenndu man kalak, ola buatndu kudinna jadi jaminen, sabap adi bage enggo ibuatndu kegeluhenna jadi jaminen.
7Ise si nculik temanna sapih-sapih bangsa Israel, jenari ijadikenna budakna, ntah idayakenna jadi budak la banci la iukum mate. Alu bage ibersihkenndu me kejahaten si bagenda. #Kel 21:16
8Adi kam kena penakit kulit si banci langket, arus maka payo-payo ilakokenndu kai si iperentahken imam-imam Lewi man bandu. Ikutken perentah-perentah si enggo kubereken man bana. #Im 13:1–14:54
9Inget kai si ibahan TUHAN Dibatandu man si Miriam sanga kam reh i Mesir nari. #Bil 12:10
10Adi kai-kai gia ipinjamkenndu man kalak, ola kam bengket ku rumahna muat paken si iberekenna atena man bandu jadi jaminen; #Kel 22:26-27 11timai i darat; pelepas maka ia jine merekenca man bandu. 12Adi ia kalak musil ola sempat keberngin paken e i bas kam. 13Ulihkenlah man bana tep-tep karaben maka banci ipakena medem. E maka ngataken bujur ia man bandu, janah meriah ukur TUHAN Dibatandu ngenehen kam.
14Ola tipundu kalak upahen si musil dingen mesera akapna, subuk ia sapih-sapih kam bangsa Israel, ntah pe bangsa si deban si tading i bas kutandu. #Im 19:13 15Galarilah upahna tep-tep wari ope matawari sundut. Perlu kal ia duit e janah enggo iarapkenna kal. Adi la igalarindu upahna e, erlebuh ia ngadu man Dibata kerna kam; janah kam erdosa kerna si e.
16Orang tua la banci iukum mate erkiteken kejahaten anak-anakna, bage pe anak-anak la banci iukum mate erkiteken kejahaten orang tuana. Sekalak jelma banci iukum mate erkiteken si ibanna jine saja ngenca. #2Raj 14:6; 2Kro 25:4; Esek 18:20
17Ola rampas hak-hak kalak pertandang ras hak anak-anak melumang; bage pe ola buat uis diberu balu-balu jadi jaminen pinjamenna. #Kel 23:9; Im 19:33-34; Ul 27:19 18Inget maka budak kap kam nai i Mesir, janah TUHAN Dibatandu si mbebasken kam; e me sabapna maka kubereken man bandu perentah enda.
19Adi kam rani, kenca bage adi tading bandu deba gandum si enggo isabindu, ola legindu mulihi si tading e; si e man kalak pertandang, anak melumang, ras diberu balu-balu, maka ipasu-pasu TUHAN Dibatandu kam i bas kerina pendahinndu. #Im 19:9-10; 23:22 20Adi enggo iperanindu sekali buah saitunndu, olanai legindu mulihi si tading e; si e man kalak pertandang, anak-anak melumang, ras man diberu balu-balu. 21Adi enggo iperanindu sekali buah anggurndu, olanai legi sekali nari, buah anggur si tading-tading e man kalak pertandang, anak-anak melumang, ras man diberu balu-balu. 22Ola ndigan pe ilupakenndu maka nai kam jadi budak i Mesir. E me sabapna maka kubereken man bandu perentah enda.
Currently Selected:
ULANGEN 24: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
