ULANGEN 23
23
Kalak si la banci atan jadi bangsa TUHAN
1“Dilaki si enggo ikebiri ntah pe si enggo ikeret kelaminna la banci iatanken i bas perpulungen bangsa TUHAN. 2Anak si tubuh la erkiteken perjabun, ras kerina sinursurna, seh ku sundut pesepuluhken la banci iatanken i bas perpulungen bangsa TUHAN.
3Bangsa Amon ntah bangsa Moap, ras kerina sinursurna, aminna pe sundut pesepuluhken, la banci iatanken i bas perpulungen bangsa TUHAN. #Neh 13:1-2 4Sabap sanga kam ndarat i Mesir nari la ia nggit mere kam man ras minem. Iupahina si Bileam anak Beor, i kuta Petor nari i Mesopotami guna numpahi kam. #Bil 22:1-6 5Tapi la ibegiken TUHAN Dibatandu si Bileam. E maka isalihkenNa sumpahna ndai jadi pasu-pasu erkiteken keleng ateNa man bandu. #Bil 23:7–24:9 6Kidekah kam sada bangsa denga, ola ndigan pe isampatindu bangsa-bangsa enda, ntah erbahanca maka senang akapna.
7Ola igombangindu bangsa Edom, sabap keluargandu denga kap e. Ola igombangindu bangsa Mesir, erkiteken i negerina kam mbarenda tading. 8Adi sinursur bangsa si dua e, mulai i bas sundut si peteluken nari banci ia bengket ku bas perpulungen bangsa TUHAN.”
Jagai kebadian ingan tentera erkemah
9“Sanga kam i bas ingan erkemah tupung paksa perang, jagai man bandu i bas asa kai si erbanca kam la bersih rikutken aturen agama. 10Adi sekalak dilaki lanai bersih erkiteken ernipi ia erlua-lua i bas berngi e, arus maka ndarat ia i bas ingan erkemah e nari, dingen tading i darat. 11Karabenna ridilah ia, janah kenca sundut matawari maka banci ia mulihken ku bas ingan erkemah.
12Sikapkenlah sada ingan man kakus i darat ingan erkemah e. 13Baba ciken, maka adi atendu ku ture, banci ikurukndu lubang ras itamburindu ka. 14Jaga lah maka tetap badia inganndu erkemah e, sabap TUHAN Dibatandu ras kam i bas inganndu erkemah ngampang-ngampangi kam, gelah menang kam ngelawan musuh-musuhndu. Ola ban si la metunggung maka ola kam itadingken TUHAN.”
Undang-undang si deban
15“Adi sekalak budak kiam i bas mpuna nari ndahi kam mindo gelah ia ikawali, ola ulihkenndu ka ia man empuna. 16Banci ia tading i bas kutandu si ipilihna, janah ola bahan si la mehuli man bana.
17La banci kalak Israel pendahinna erlua-lua i bas rumah pertoton kalak perbegu, subuk ia dilaki ntah diberu. #Im 19:29 18Duit si icariken alu dalan si bage pe, la banci ibaba ku rumah TUHAN Dibatandu jadi penggenepi sada sumpah. Ciga ate TUHAN man kalak si pendahinna erlua-lua i rumah pertoton kalak perbegu.
19Adi ipinjamkenndu sen ntah pangan, ntah kai gia si deban, man temanndu sapih-sapih kam bangsa Israel, ola bahan erbunga. #Kel 22:25; Im 25:36-37; Ul 15:7-11 20Kai si ipinjamkenndu e man bangsa si deban banci ibahanndu erbunga tapi la banci ibahanndu erbunga adi si minjam e sapih-sapih kam bangsa Israel. Ikutkenlah peraturen enda, maka TUHAN Dibatandu masu-masu kam i bas kerina si idahikenndu i bas negeri si nandangi iinganindu e.
21Adi kam erbahan perpadanen man TUHAN Dibatandu ola pelawen-lawen nehken perpadanenndu e, sabap lalap nge ituntut TUHAN padanndu e; e maka erdosa kam adi la isehkenndu padanndu e. #Bil 30:1-16; Mat 5:33 22Labo erdosa adi la pe kam erban perpadanen man TUHAN, 23tapi adi kam jine erpadan alu ukurndu ersuruh, inget nehken padanndu e.
24Adi kam mentas arah sada dalan i bas peken anggur kalak, banci ipanndu buah anggur e asa besurndu, tapi la banci ibabandu tare ragandu ndarat i bas peken e nari.
25Adi kam mentas arah dalan i bas juma kalak, banci iputikindu pagena man gugutenndu, tapi la banci sada ngkebena pe isabindu.”
Currently Selected:
ULANGEN 23: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
