ULANGEN 22
22
1“Adi idahndu lembu ntah biri-biri sapih-sapih kam kalak Israel pulah, ola pekulah-kulahndu la ietehndu, tapi tangkap, tegu man empuna. #Kel 23:4-5 2Tapi adi ndauh ingan empuna, ntah la ietehndu ise empuna, tegulah asuh-asuhen e ku rumahndu. Adi reh empuna ndaramisa bereken man bana. 3Bage ka lah perbahanndu adi ijumpaindu kelede, uis, ntah kai-kai si debanna si banci jadi bene i bas sapih-sapih kam kalak Israel.
4Adi guling kelede ntah lembu temanndu sapih-sapih kam kalak Israel; ola pelepas saja; sampatilah ia petedis asuh-asuhenna e mulihken.
5Diberu la banci make paken dilaki, bage pe dilaki la banci make paken diberu; sabap nembeh ate TUHAN Dibatandu man kalak si ngelakoken si bage.
6Adi jumpa kam asar perik i das batang kayu ntah i babo taneh, indungna sangana ngkeremken naruhna ntah anakna, ola tangkapndu indungna e. 7Banci ibuatndu anak perik e, tapi arus maka ipulahindu indungna, maka gedang umurndu ras malem atendu usur.
8Adi ipajekkenndu rumah mbaru, arus maka ibanndu bide ngkeleweti tarum rumah e. Adi bage la kam salah adi lit gia kalak mate ndabuh i das nari.
9Ola suan sinuan-sinuan si deban i bas peken anggurndu. Adi isuanndu, la banci ibuatndu ulih anggur ntah ulih sinuan-sinuan si deban ndai. #Im 19:19
10Ola tenggalaken lembu radu ras kelede i bas sada pasangen.
11Ola pake uis si ibahan tenunen wool campur benang.
12Tama rambu-rambuna i bas empatna suki pakenndu.” #Bil 15:37-41
Undang-undang kerna perjabun
13“Banci jadi lit sekalak dilaki ngempoi sekalak singuda-nguda, tapi dungna lanai atena bage ndeharana ndai. 14E maka ibahanna tuduhen palsu kerna ia, alu ngataken maka lanai bersih diberu e sanga ia erjabu.
15Adi jadi bage, ibuat orang tua diberu e lah sprei si kena dareh sanga kalak enda tang-tangna ersada kula. Icidahkenna e man runggun peminpin-peminpin kuta e jadi bukti maka diberu e bersih denga nge sanga ia erjabu. 16Bagenda lah nina bapa diberu e, ‘Kubere mbarenda anakku erjabu ras dilaki enda, tapi genduari lanai atena bage anakku. 17Ibanna tuduhen palsu kerna anakku, alu ngataken maka anakku enggo cemar maka ia erjabu. Tapi enda kap tandana maka anakku e la cemar; nehen lah bekas dareh i bas sprei sanga perjabunna e!’ 18Kenca bage, ibuat peminpin-peminpin kuta e lah dilaki e, gelah ibalbali. 19Peminpin-peminpin kuta e ndenda dilaki e alu seratus duit pirak, janah duit e ibereken man bapa diberu e, sabap enggo ijuruken dilaki e sekalak singuda-nguda kalak Israel. I babo si e, diberu e tetap ka jadi ndeharana, janah la banci isirangkenna seh mate.
20Tapi adi payo tuduhen e, janah la lit buktina maka diberu e langa cemar, 21ibaba peminpin-peminpin kuta e lah diberu ndai ku lebe-lebe rumah bapana, gelah i je ibenteri anak kutana ia seh mate. Sabap diberu e enggo ngelakoken perbahanen si erbanca mela akap bangsanta, erkiteken ia enggo ersada kula ras dilaki ope erjabu, sanga ia tading denga i rumah bapana. Alu bage me ibersihkenndu kejahaten si bagenda rupana.
22Adi sekalak dilaki itunduk sangana ersada kula ras diberu kalak, arus maka duana ia ibunuh. Alu bage me ibersihkenndu kejahaten si bagenda.
23Umpamakenlah lit sekalak dilaki tunduk i bas sada kuta sangana ersada kula ras sekalak singuda-nguda si enggo ertunangen ras kalak si deban. 24Babandulah duana ku darat kuta, benteri alu batu ngayak mate. Singuda-nguda e arus mate sabap la ia serko mindo penampat, aminna gia ia lit i bas kuta, dingen banci minter ibegi kalak. Dilaki e arus mate erkiteken ersada kula ia ras sekalak singuda-nguda si enggo ertunangen. Alu bage me ibersihkenndu kejahaten si bagenda.
25Umpamakenlah lit sekalak dilaki mperkosa sekalak singuda-nguda si enggo ertunangen i darat kuta. Adi bage si dilaki ngenca ibunuh. 26Si diberu la banci ikekai pe, sabap si diberu e la erbahan dosa si patut iukum mate. Soal enda seri kap ras sekalak si ngerigep dingen munuh kalak si deban. 27Dilaki e mperkosa diberu si enggo ertunangen e ndauh i bas ingan jelma nari, e maka adi serko pe ia mindo penampat labo lit si nampatisa.
28Umpamakenlah lit sekalak dilaki terdat mperkosa sekalak singuda-nguda langa ertunangen. #Kel 22:16-17 29Arus maka igalari dilaki e, emas unjuken lima puluh duit pirak man bapa diberu e, janah diberu e jadi ndeharana, sabap ipaksana singuda-nguda e ersada kula ras ia. La banci isirangkenna diberu e asa gedang geluhna.
30Ise pe la banci njuruken bapana alu ersada kula ras ndehara bapana.” #Im 18:8; 20:11; Ul 27:20
Currently Selected:
ULANGEN 22: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
