ULANGEN 19
19
Ban kuta-kuta ingan aman
(Bil 35:9-28; Jos 20:1-9)
1“Kenca enggo ikernepken TUHAN Dibatandu rayat negeri si iberekenNa ateNa man bandu e, janah kenca ibuatndu kuta-kuta ras rumah-rumahna dingen enggo kam tading i negeri e, #Jos 20:1-9 2-3bagi telukenlah daerah e. I bas tep-tep sada daerah litken sada kuta si la ndauhsa i bas kuta si deban nari, gelah adi lit kalak munuh banci ia kiam cebuni ku kuta e. 4Adi lit sekalak munuh alu la iarapna, janah si ibunuhna e labo musuhna banci ia kiam ku sada kuta i bas kuta si telu e, maka ia aman i je. 5Umpamana, lit dua kalak lawes ku kerangen nabah kayu. Sanga nabah kayu, sekalak i bas si dua e lepas kapakna i bas tangkena nari, dingen ngkenai temanna ndai seh mate; e maka banci ia kiam ku sada kuta i bas kuta si telu ndai gelah ia aman. 6Adi sada ngenca kuta ingan aman, banci jadi ndauhsa ku je, e maka keluarga si ertanggung jawab erbahan pembalasen i bas pembunuhen e banci kari nangkap si munuh e, janah perbahan rawana, ibunuhna kalak si la ersalah, sedangken kalak ndai munuh labo alu sengaja, sabap labo musuhna si ibunuhna e. 7Em sabapna maka kusuruh kam nerapken telu kuta.
8Adi ipebelang TUHAN Dibatandu daerahndu alu mereken man bandu kerina daerah si ipadankenNa sue ras si ikatakenNa man nini-ninindu, 9maka arus ipilihndu telu kuta nari. (Adi atendu keleng man TUHAN Dibatandu, nggeluh rikutken si iajarkenNa, janah ilakokenndu asa kai si kuperentahken man bandu wari enda, ibereken TUHAN man bandu kerina negeri e.) 10Lakokenlah e maka ola kam erdosa erkiteken ngukum mate kalak si la ersalah i negeri si ibereken TUHAN ateNa man bandu.
11Tapi umpamakenlah lit sekalak nggempangi imbang-imbangna, dingen alu sengaja munuh imbangna e jenari lompat ia ku salah sada kuta e guna ndatken perlindungen. 12Adi bage soalna, peminpin-peminpin kutana jine nuruhsa gelah ia itangkap, jenari iendeskenna man keluarga si ertanggung jawab erbahan pembalasen i bas pembunuhen e, gelah banci ia ibunuh. 13Ola cidahken perkuah ate man bana. Bersihkenlah Israel i bas pemunuh si bage, gelah kam selamat.”
Kerna baleng-baleng
14“Ola piser baleng juma temanndu si balengen, si enggo itentuken nai-nai nari i negeri si ibereken TUHAN Dibatandu man bandu.” #Ul 27:17
Kerna saksi-saksi
15“La cukup adi sekalak saksi ngenca mbuktiken kejahaten sekalak jelma; si sitikna arus lit dua kalak saksi. #Bil 35:30; Ul 17:6; Mat 18:16; Joh 19:31; 2Kor 13:1; 1Tim 5:19; Heb 10:28 16Adi lit sekalak jelma atena meneken kalak si deban alu erbahan pengadun palsu kerna sada kejahaten, 17arus maka duana ia iadapken ku ingan ersembah, gelah iadili imam ras hakim si sanga ertugas paksa e.
18Arus maka manjar-anjar iselidiki hakim persoalen e. Adi pengadunna kerna temanna kalak Israel e terbukti palsu, 19ia arus iukum sue ras ukumen si arusna kin ialoken kalak si iadukenna e. Alu bage ibersihkenndu me kejahaten si bage rupana. 20Kenca bage tentu kerina kalak si deban si megi kejadin e; mbiar ia, e maka ndigan pe lanai ilakoken kalak perbahanen si jahat e. 21Ola cidahken perkuah atendu i bas persoalen si bage rupana. Ukumen kalak si bage, e me kesah gancih kesah, mata gancih mata, ipen gancih ipen, tan gancih tan, ras nahe gancih nahe.” #Kel 21:23-25; Im 24:19-20; Mat 5:38
Currently Selected:
ULANGEN 19: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
