ULANGEN 18
18
Bagin imam-imam
1“Suku Lewi, e me suku imam, sitik pe la ngalo taneh i bas Israel jadi baginna. Tapi ia nggeluh i bas pemere ras persembahen si ibereken man TUHAN. 2La lit taneh sikerajangenna, bagi suku-suku si deban; baginna e me kinihamaten jadi imam TUHAN sue ras si ipadanken TUHAN. #Bil 18:20
3Adi lit kalak mpersembahken lembu ntah biri-biri, maka imam-imam ngaloken paha lebena, tulan rahangna, ras beltekna. 4Bagin si pemena i bas gandum, anggur, minak saitun ras mbulu biri-biri, e pe jadi bagin imam-imam. 5TUHAN milih suku Lewi i tengah-tengah suku-sukundu si deban gelah suku e ndahiken ndahin TUHAN selaku imam seh asa lalap.
6Tiap kalak Lewi banci reh i bas tep-tep kuta Israel nari ku ingan ersembah si sada e, adi bage atena, 7dingen pe banci erdahin i je selaku imam TUHAN Dibatana bali ras kalak Lewi si deban si erdahin i je. 8Pangan si man alonkenna bali buena ras imam-imam si deban. Banci isimpanna kai pe si itenahken keluargana man bana.”
Pertenget nandangi perbahanen kalak perbegu
9“Kenca kam seh ku negeri si ibereken TUHAN Dibatandu man bandu, ola ikutken perbahanen-perbahanen si mbau i bas bangsa-bangsa si lit i je. 10Ola persembahken anak-anakndu i bas api i babo batar-batar persembahenndu. Ola pelepas bangsandu ertenndung, ngoge tanda-tanda, ntah mpergunaken mangmang, #Kel 22:18; Im 19:26 11ntah make guna-guna, janah ola pediat ia nungkun man begu kalak si enggo mate. #Im 19:31 12Nembeh ate TUHAN Dibatandu man kalak si ngelakoken perbahanen si mbau e. E me pe sabapna maka ipelawesNa bangsa-bangsa e i bas negeri e nari sanga kam ngasak ku je. 13Setialah man TUHAN alu bulat ukurndu.” #Mat 5:48
Padan TUHAN kerna kerehen sekalak nabi
14Kenca bage nina Musa, “I bas negeri si nandangi iinganindu e, rayat si i je ngikutken pedah-pedah kalak ertenndung, ngoge tanda-tanda. Tapi ilarang TUHAN kam ngelakoken si bage. 15Tapi isuruh TUHAN pagi man bandu sekalak nabi bali ras aku, i bas bangsandu nari, janah arus iikutkenndu ia. #Perb 3:22; 7:37
16I bas wari sanga kam pulung i Deleng Sinai mindo kam maka olanai ibegindu TUHAN ngerana tole, bage pe olanai min iidahndu api kemulianNa, sabap mbiar kam mate perban si e. 17Erkiteken si e nina TUHAN man bangku, ‘Mehuli kal pemindonna e. 18Kusuruh pagi man bana sekalak nabi si seri ras kam i bas tengah-tengah bangsana nari; Kukataken pagi man bana kai si man katankenna. Janah iturikenna pagi man bangsa e asa kai si Kuperentahken. 19Ngerana ia i bas gelarKu, janah Kuukum asa kai kalak si la nggit ngikutken ia. #Perb 3:23 20Tapi adi lit sekalak nabi si pang ngerana i bas gelarKu sedangken la Kuperentahken ia ngerana, arus maka mate ia erkiteken si e. Bage ka pe, asa kai nabi si ngerana i bas gelar dibata-dibata si deban arus mate erkiteken si e.’
21Nggit maka nungkun pusuhndu, kuga nge metehsa maka si iberitaken sekalak nabi la i bas TUHAN nari. 22Adi lit sekalak nabi ngerana i bas gelar TUHAN, tapi la jadi bagi si ikatakenna e, tentu beritana e labo berita TUHAN. Nabi e ngerana i bas gelarna jine, e maka ola kam mbiar man bana.”
Currently Selected:
ULANGEN 18: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
