ULANGEN 20
20
Kerna perang
1“Adi lawes kam erperang ngelawan musuh-musuhndu ola kam mbiar, aminna gia idahndu gereta kuda ras kudana, dingen tenterana teremen asang kam. TUHAN Dibatandu, si enggo mulahi kam i Mesir nari, si nemani kam. 2Ope kam lawes erperang, sekalak imam reh ku lebe ngerana man tentera e, 3‘Begiken o kalak Israel! I bas wari enda lawes kam ku peperangen. Ola kam mbiar man musuhndu, ola kam gentar, ola bene ukurndu. 4TUHAN Dibatandu si ngarak-ngarak kam ras si mereken kemenangen man bandu.’
5Kenca bage maka ngerana me komendan pasuken man tentera e nina, ‘Lit kang i jenda si mbaru denga majekken rumah, tapi langa ibengketna i bas gelar TUHAN? Adi lit, arus ia lawes ku rumah. Banci jadi mate ia kari i peperangen; adi bage kalak si deban kari si mengket rumahna e i bas gelar TUHAN. 6Lit kang i jenda si mbaru denga nuan peken anggurna, tapi langa sempat iperanina? Adi lit, banci ia mulih ku rumah. Sabap nggit maka mate ia i peperangen erbanca kalak si deban ersenang-senang ngaloken lau anggurna. 7Lit kang i jenda si nandangi erjabu atena? Adi lit mulihlah ia ku rumah. Nggit maka mate ia ipertempuren, kalak si deban kari erjabu ras diberu si nandangi jadi ndeharana e.’
8Tole arus maka ikataken komendan pasuken man kalak e, ‘Lit i jenda si lanai ersemangat ban biarna? Adi lit mulih saja ia ku rumah. Nggit maka ilangketina kari maka mbiar ka temanna si deban.’ 9Adi enggo dung komendan-komendan e ngerana, ipilih me peminpin-peminpin man tep-tep terpuk.
10Adi lawes kam merangi sada kuta, berekenlah lebe kesempaten man rayatna mindo ampun. 11Adi italangina pintu gerbangna, mindo ampun ia, kerina ia jadi budakndu, janah ngelakoken kerja paksa man bandu. 12Tapi adi penduduk kuta e la nggit mindo ampun, tapi ilawanna kam, kepung lah kuta e alu tenterandu. 13Jenari, kenca ipelepas TUHAN Dibatandu kam naluken kuta e, bunuhilah asa kai dilaki si lit i je. 14Tapi diberu-diberu, danak-danak, asuh-asuhen, ras kerina barang-barang si deban si lit i je banci ibuatndu man bandu. Banci ipakendu kerina sikerajangen musuhndu; enggo kap ibereken TUHAN Dibatandu e man bandu. 15Bage me arusna perbahanenndu man tep-tep kuta si ndauh i bas negeri si nandangi iinganindu e.
16Tapi sanga kam naluken kuta-kuta i bas negeri si nandangi ibereken TUHAN Dibatandu bandu, bunuhlah kerina jelma si lit i je. 17Kernepken kerina rayatna: bangsa Heti, bangsa Amori, bangsa Kanaan, bangsa Peris, bangsa Hewi ras bangsa Jebusi, sue ras si isuruh TUHAN maka ilakokenndu. 18Bunuhlah rayat e kerina, gelah ola kam ibabaina erdosa man TUHAN alu ngajari kam ngelakoken perkara-perkara si mbau bagi si ilakokenna i bas ia ersembah man dibata-dibatana.
19Sanga iperangindu sada-sada kuta, ola tabah batang kayuna si buahna man pangan, aminna pe ndekah kam ngepung kuta e. Panlah buahna tapi ola tabah batangna, sabap batang kayu e labo musuhndu.
20Batang kayu si deban banci itabahndu guna ipakendu jadi bide guna ngepung kuta e, seh kuta e tertalukenndu.”
Currently Selected:
ULANGEN 20: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
