ULANGEN 17
17
1Ola persembahken man TUHAN Dibatandu lembu tah biri-biri si lit cacatna; ciga ate TUHAN persembahen si bage rupa. 2Adi lit ibegindu maka i bas sada kuta, lit kalak, subuk dilaki ntah diberu erdosa man TUHAN janah enggo ngelanggar perpadanenna ras TUHAN, 3alu nembah dingen erdahin guna dibata-dibata si deban, ntah matawari ntah bulan, ntah bintang-bintang, sada perbahanen si ertentangen ras perentah TUHAN. #Kel 22:20 4Adi lit ibegindu berita si bagenda rupana, selidiki lah lebe mehuli-mehuli. Adi payo maka si jahat e enggo jadi i Israel, 5babalah kalak si bage ndarat kuta, batu-batui ngayak mate. 6Tapi, kalak si bage banci iukum mate adi lit dua kalak tah lebih saksi; ia la banci iukum mate adi sada ngenca saksi. #Bil 35:30; Ul 19:15; Mat 18:16; 2Kor 13:1; 1Tim 5:19; Heb 10:28 7Saksi-saksi e mbatu-batuisa si pemena, e maka kenca bage kalak si deban kerina, alu bage enggo iambekkenndu kejahaten enda. #1Kor 5:12-13
8Banci jadi maka lit perkara-perkara si meserasa mutuskenca i bas sada ingan umpamana: kalak sibunuh-bunuhen, situntut-tuntuten kerna erta-erta, siluka-lukan, bage pe perkara pembunuhen tapi la ieteh sengaja ntah lang, e maka laweslah ku ingan ersembah si sada e si enggo itentuken TUHAN. 9Adapkenlah perkara e man imam-imam kalak Lewi ras man hakim si ertugas paksa e, suruhlah ia erbahan keputusen. 10IA mutusken perkara e, janah lakokenlah rikutken keputusenna e. 11Aloken lah keputusenna ras ikutken lah kai nina seh ku bas soal si kitik-kitikna pe. 12Ise si pang nimbak hakim ntah imam si sanga ertugas paksa si e arus ibunuh. Alu bage iaguindu kejahaten enda i bas Israel nari. 13E maka kerina kalak megi si enda jadi mbiar, janah ise pe lanai pang ngelakoken si bage.”
Pedah-pedah kerna milih sekalak raja
14“Kenca enggo idatndu taneh si ate TUHAN Dibatandu ibereken man bandu, janah kam enggo tading i je, nggit mawen maka merincuh ka kam lit rajandu bagi bangsa-bangsa sekelewetndu. #1Sam 8:5 15Jaga maka kalak si ipilihndu atendu jadi raja e, kalak si enggo ipilih TUHAN. Arus maka ia ipilih i bas bangsandu nari, ola bahan bangsa si deban jadi rajandu. 16Raja e la banci melala kudana guna ipake tenterana, la banci isuruhna rayat nukur kuda ku Mesir, sabap enggo ikataken TUHAN maka bangsaNa ndigan pe lanai banci mulihken ku Mesir. #1Raj 10:28; 2Kro 1:16; 9:28 17La banci melala ndeharana, sabap e banci erbahanca ia nundalken TUHAN. La banci ipebayakna bana alu pirak ntah emas. #1Raj 10:14-22,27; 11:1-8; 2Kro 1:15; 9:27 18Sanga ia jadi raja arus maka lit ibahanna sada salinen kitap undang-undang ras pengajaren Dibata si isalin i bas aslina nari si isimpan imam-imam kalak Lewi. 19Kitap e arus ndeher rusur ras ia ras iogena gedang-gedang geluhna, gelah alu bage erlajar ia pehaga TUHAN ras ngikutken perentah-perentah si lit i bas kitap e alu tutus. 20Si enda guna njagai ia maka ola iakapna ia ganjangen asang temanna kalak Israel si deban. Tole pe njagai ia gelah ola sitik pe la ikutkenna perentah-perentah TUHAN. Alu bage maka banci ia erkuasa ertahun-tahun, dingen kesusurenNa merentah Israel ersundut-sundut.”
Currently Selected:
ULANGEN 17: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
