2 SAMUEL 20
20
Pemberontaken Syeba
1I kuta Gilgal lit sekalak gutul, anak Bikri, gelarna Syeba. Ia bas suku Benyamin nari. Iembusna terompet, janah erlebuh nina, “Labo kap kadenta pe Daud! Man kadenta ngikutken ia? O kalak Israel, ota mulihlah kita.” #1Raj 12:16; 2Kro 10:16 2Itadingken kalak Israel Daud jenari lawes ia kerina ngikutken Syeba, tapi kalak Juda tetap setia ngikutken Daud i Lau Jordan nari seh ku Jerusalem.
3Kenca Daud seh i istanana i Jerusalem, ilegina gundikna si sepuluh kalak si itadingkenna ngiani istana. Itamakenna i bas sada ingan si ijagai pengawal. Icukupina kerina keperlun gundikna e, tapi la ia pernah ras medem. Kerina gundik e i bas gedang-gedang geluhna tetap serap i bas kalak si deban nari, janah nggeluh bagi diberu balu-balu. #2Sam 16:22
4Nina raja man Amasa, “Pepulung kerina kalak Juda reh kam ras ku jenda kedun.” 5Lawes Amasa ngelebuh kalak Juda, tapi langa ia mulih, i bas wari si itetapken raja. 6E maka nina raja man Abisai, “Buen kari kesusahenta ibahan Syeba asangken Absalom. Baba tenterangku ngayaki ia. Adi lang nggit me pagi maka ikuasaina piga-piga kuta si erbenteng jenari pulah i bas kita nari.” 7E maka tentera Joap, pengawal keluarga raja ras tentera si debanna, nadingken Jerusalem ras Abisai, ngayaki Syeba. 8Kenca seh ku batu mbelin i Gibeon, ijumpai Amasa kalak enda. Joap make baju perang. Pedangna si ersembung leket i bas genditna. Sanga Joap erdalan pedangna ndabuh ku tanna si kawes. 9Nina Joap man Amasa, “Uga berita senina?” Jenari tan Joap si kemuhen ncikep janggut Amasa gelah ngema Amasa. 10La iperdiateken Amasa pedang si enggo icikep Joap alu tanna si kawes. E maka itebak Joap si Amasa, ndarat isi beltekna mambur ku taneh. Minter mate Amasa, e maka lanai perlu itebak Joap sekali nari.
Kenca bage iterusken Joap ras seninana Abisai ngayaki Syeba. 11Sekalak tentera Joap tedis i deher mait Amasa, jenari erlebuh ia, “Ise arah Joap ras Daud, ikutkennalah Joap!” 12Mait Amasa, alu dareh erkumpa-kumpa, terdang i tengah dalan. Idah anak buah Joap maka kerina kalak ngadi, e maka irintakkenna mait e i bas dalan e nari ku mbalmbal, jenari itutupina alu lembut. 13Kenca mait e enggo ipiser i bas dalan e nari, kerina kalak ngikutken Joap ngayaki Syeba.
14Ibentasi Syeba kerina daerah suku Israel, dungna seh ia i kuta Abel Bet Makah. Kerina terpuk Bikri pulung ngikutken Syeba ku kuta e. 15Ibegi anak buah Joap maka Syeba enggo i bas kuta e, e maka lawes ia ku je, ikepungna kuta e. Ipegun-gunna taneh deherken tembok si arah darat, janah ikalina lubang arah teruh tembok e, gelah runtuh. 16I bas kuta e lit sekalak diberu pentar erlebuh i datas tembok e nari, “Begiken! Begiken! Kataken Joap ku jenda, ngerana ateku ras ia.” 17Reh Joap, jenari nina diberu e, “Kam kin si Joap?”
“Ue aku,” nina Joap.
“Begiken aku Tuan,” nina diberu e.
“Ue, kubegiken,” nina Joap.
18Nina diberu e, “Nai lit kuan-kuan ngataken, ‘Laweslah ku kuta Abel maka dat kam jabapna.’ E maka bage me si ilakoken kalak. 19Kuta kami enda kuta si mbelin, kuta si damena ras si patuhna i Israel. Engkai maka icedakenndu atendu? Iruntuhkenndu kai sikerajangen TUHAN?”
20“Ndigan pe lang!” nina Joap njabapsa. “Ndigan pe la kuruntuhken ntah kucedaken kutandu! 21Labo e sura-sura kami. Sekalak dilaki gelarna Syeba, anak Bikri, asalna i taneh deleng-deleng Eperaim nari, erbahan pemberontaken ngelawan Raja Daud. Adi iendeskenndu ia, minter kutadingken kuta enda.”
“Ibenterken kami kari takalna man bandu arah babo tembok e,” nina diberu e. 22Kenca bage lawes diberu e, isehkenna rencanana man jelma si nterem, e maka itampul kalak ndai Syeba, ibenterkenna takalna man Joap arah babo tembok. Iembus Joap terompet jadi tanda man teman-temanna gelah nadingken kuta e mulih kerina ku kutana. Joap mulih ku Jerusalem ndahi raja.
Pegawai-pegawai Daud
23Joap puanglima tentera Israel.
Benayah anak Joyada ertugas ngaturken pengawal peribadi Daud.
24Adoniram ertugas ngaturken kalak kerja paksa. Josapat anak Ahilut ertugas jadi bendaharawan istana;
25Sepa jadi sekretaris istana;
Sadok ras Abiatar jadi imam.
26Ira i kuta Jair nari, ia pe sekalak imam Daud.
Currently Selected:
2 SAMUEL 20: BTX
Highlight
Share
Copy
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
