2 SAMUEL 21
21
Kesusuren Saul ibunuh
1Sanga pemerentahen Daud jadi me kelihen mesangat si dekahna telu tahun. E maka isungkun Daud me TUHAN kerna kejadin e jenari nina TUHAN, “Saul ras keluargana enggo ersalah munuh; ibunuhna kalak Gibeon.” ( 2Kalak Gibeon la bengket bangsa Israel. Kalak enda sada terpuk si kitik i bas bangsa Amori. Bangsa Israel enggo erpadan ngkawali kalak enda, tapi icubaken Saul ngkernepkenca erkiteken bage tutusna atena ngukurken kepentingen Israel ras Juda.) #Jos 9:3-15 3E maka ipepulung Daud kalak Gibeon jenari nina man kalak e, “Kai si banci kubahan man bandu kerina? Ateku nebusi kerina kesalahen si enggo ibahan man bandu, gelah ipasu-pasundu bangsa TUHAN.”
4Jabap kalak enda, “Perubaten kami ras Saul ras keluargana la terdungi alu emas ntah pirak, bage pe la ate kami munuh bangsa Israel sekalak pe.” “Kai dage atendu si arus kubahan man bandu kerina?” nina Daud nungkun.
5Nina kalak enda, “Ate Saul maka ikernepkenna kami, gelah lanai lit kami tading nggeluh i japa pe i Israel. 6Dage endeskenlah pitu kalak kesusurenna si dilaki jenari igantung kami ia pituna i adepen TUHAN i Gibeah, kuta Saul, raja pilihen TUHAN.”
“Aku merekenca man bandu,” nina raja.
7Tapi erkiteken sumpah si enggo ibahanna ras Jonatan, e maka Mepiboset kempu Saul la iendesken Daud. #1Sam 20:15-17; 2Sam 9:1-7 8Si ibuat Daud e me Armoni ras Mepiboset, duana anak Saul si ipupus gundik Rispa anak Aya; bage pe ibuatna ka anak Merap si lima kalak, e me anak si ipupus Merap ras Adriel anak Barsilai i Mehola nari. Merap e me anak Saul si diberu. #1Sam 18:19 9Iendesken Daud kalak si pitu e man rayat Gibeon. Igantung rayat Gibeon pituna i adepen TUHAN, e maka pituna ras mate. Kalak enda pituna iukum mate sanga nandangi rani jaba.
10Gundik Saul, Rispa, nandena gelarna Aya erbahan uis guni jadi lape-lapena i bas batu ingan mait e. I je me ia tading mulai paksa rani seh reh paksa perudan. Suari ijagana mait e gelah ola ipangani perik-perik, janah berngi ikawalina gelah ola ipan rubia-rubia si meliar.
11Kenca ieteh Daud kai si ibahan Rispa, 12lawes Daud muat tulan-tulan Saul ras anakna Jonatan i bas rayat Jabes i Gileat nari. (Kalak Jabes enggo nangko tulan-tulan e i bas kesain kuta Bet-San nari, ingan kalak Pilisti nggantungsa mbarenda, asum munuh Saul i Deleng Gilboa.) #1Sam 31:8-13 13Ibuat Daud tulan-tulan Saul ras Jonatan jenari ipepulungna ka tulan-tulan kalak si pitu si enggo igantung e. 14E maka tulan-tulan Saul ras Jonatan ikuburken i bas kuburen bapa Saul, Kis, i Sela, i daerah Benyamin. Kerina si enda ilakoken rikutken perentah raja. Kenca si e maka enggo ijabap Dibata pertoton kerna negeri e.
Perang ngelawan manusia raksasa-raksasa bangsa Pilisti
(1Kro 20:4-8)
15Sekali jadi erperang ka bangsa Pilisti ras bangsa Israel. E maka Daud ras tenterana lawes erperang ngelawan bangsa Pilisti. Sanga erperang e, enggo latih iakap Daud. 16Tupung bage reh sekalak manusia raksasa gelarna Isbibenob. Ibabana sada lembing tembaga beratna kira-kira telu setengah kilo. Janah ibabana ka sada pedang si mbaru. Iakapna ia banci munuh Daud. 17Tapi reh Abisai anak Seruya nampati Daud, iserangna raksasa e, jenari ibunuhna. Kenca si e isuruh anak buahna Daud erpadan maka lanai ia ikut erperang ras. “Kam kap pengarapen Israel, e maka la ate kami kebenen kam,” nina kalak ndai.
18Kenca si e lit ka sada perang ras bangsa Pilisti i Gob. Sanga e, Sibekai, i Husa nari munuh sekalak manusia raksasa gelarna Sap.
19Lit ka perang si deban ras bangsa Pilisti i Gob. E maka Elhanan anak Jair i Betlehem nari, munuh Goliat i Gat nari. Goliat ndai tangke lembingna asa tangke cangkul e galangna.
20Kenca bage lit ka perang si deban i Gat. I jah lit sekalak raksasa si pet kal erperang. Jari-jari tanna ras nahena enem sembelah. 21Megombang ia man bangsa Israel. E maka Jonatan anak si Sammah senina Daud munuh manusia raksasa e.
22Manusia raksasa si empat e, e me kesusuren manusia raksasa i Gat nari. Janah empatna enggo ibunuh Daud ras tenterana.
Currently Selected:
2 SAMUEL 21: BTX
Highlight
Share
Copy
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
