2 SAMUEL 19
19
Joap mandang Daud
1Enggo ituriken man Joap maka Raja Daud ngandung erceda ate sabap Absalom. 2E maka keriahen kemenangen tentera Daud salih jadi ceda ate. Sabap ibegi tenterana raja rate ceda erkiteken anakna. 3Mulihken ia ku kuta alu sinik-sinik, desken tentera si mela iakapna, kiam i bas peperangen nari. 4Itutupi raja e ayona janah megang sorana serko, “O anakku! Anakku Absalom! Absalom anakku!”
5Idahi Joap ku rumah raja nina “Sendah enggo peterukndu si ngikutken kam, kalak si enggo nelamatken geluhndu, kegeluhen kerina anakndu dilaki ras diberu, ndeharandu ras gundikndu. 6Ilawanndu kalak si rate keleng janah ikelengindu kalak si rate nembeh man bandu! Tangkas ibahanndu maka pegawaindu ras kalak si ngikut ras kam la kai pe ertina man bandu. Kueteh maka meriah kal iakapndu adi Absalom nggeluh denga wari enda janah kerina kami enggo mate. 7Genduari, to petetaplah ukur anak buahndu kerina. Ersumpah aku i bas gelar TUHAN adi la kin ipetetapndu, pagi erpagi-pagi sekalak pe lanai ngikutken kam. E me cilaka si mbelinna kal si inanamindu kidekah geluhndu.” 8Kenca bage keke raja, lawes ia kundul deher gerbang kuta. Ibegi kalak ndai kerina maka ia i jah, e maka pulung ia ngkeleweti raja.
Daud berkat mulih ku Jerusalem
Paksa si e, kerina bangsa Israel enggo kiam ku kutana. 9Belang-belang negeri, rayat mulai erjengili sapih-sapih ia nina, “Raja Daud nelamatken kita i bas musuh-musuhta nari. Ipulahina kita i bas bangsa Pilisti nari, tapi genduari ia enggo kiam i bas Absalom nari janah itadingkenna negeri enda. 10Sitangkuhken Absalom, tapi ia enggo mate i bas peperangen. Dage ngkai maka la lit ise pe si maba Raja Daud mulih?”
11Berita kerna kai si ikataken bangsa Israel e seh man Raja Daud. E maka isuruhna Imam Sadok ras Abiatar nungkun peminpin Juda, “Engkai maka kam si perpudina nampati raja maba mulih ku istana? 12Kam kerina keluargangku, dareh dagingku jine. Engkai maka arus kam si perpudina maba aku mulihken?” 13Isuruh Daud pe kalak e ngataken man Amasa, “Kam keluargangku. Genduari kuangkat kam jadi puanglima perang nggantiken Joap. Dibatalah si ngukum aku adi la kulakoken e!” 14Alu ranan si bage ibuat Daud ukur kerina kalak Juda, e maka itenahkenna kata man Daud gelah ia mulih ras kerina pegawaina.
15I bas perdalanenna mulih ngalo-ngalo kalak Juda i tepi Lau Jordan. Kalak Juda reh ku Gilgal ngarakken Daud ngepari lau e. 16I bas paksa e Simei anak Gera i Bahurim nari, pedas-pedas ku Lau Jordan njumpai Raja Daud. #2Sam 16:5-13 17Ikut ras ia 1.000 kalak dilaki i bas suku Benyamin nari. Bage pe Siba, pelayan keluarga Saul reh ras sepuluh lima anakna dilaki ras dua puluh suruh-suruhenna. Seh ia kerina i Lau Jordan i lebe-lebe raja. 18Ikepari kalak ndai lau e ngarakken rombongen raja janah ndahiken kai saja ate raja.
Icidahken Daud kiniulinna man Simei
Sanga raja muat ngepar erjimpuh Simei i lebe-lebena, 19nina, “O Tuanku Raja ngarap aku maka ilupakenndu kerina kesalahen si kubahan sanga kam nadingken Jerusalem. Ola min itak-takindu kesalahenku, olanai min ingetndu si e kerina. 20Enggo kueteh lepakku Tuan. Janah e me sabapna aku si lebena i bas suku i Utara nari reh ngalo-ngalo kam, o Tuanku Raja.”
21Ngerana Abisai anak Seruya nina, “Simei arus ibunuh sabap isumpahina kalak si enggo ipilih TUHAN jadi raja.”
22Tapi nina Daud man Abisai ras seninana Joap, “Kai man campurenndu e? Engkai maka igulutindu ukurku? Sendah aku enggo ka jadi raja Israel, e maka la lit sekalak pe bangsa Israel si ibunuh i bas wari enda.” 23Jenari nina Daud man Simei, “Ersumpah aku maka la kam ibunuh.”
Icidahken Daud kiniulinna man Mepiboset
24Mepiboset kempu Saul reh njumpai raja. Kidekah raja nadingken Jerusalem seh mulih alu kemenangen, Mepiboset la pernah murihi nahena, janggutna la icukurna, pakenna la itaptapina. #2Sam 9:1-13; 16:1-4 25Sanga Mepiboset reh i Jerusalem nari njumpai raja nungkun raja man bana, “Engkai maka la kam mbarenda ikut ras aku, Mepiboset?”
26Ngaloi Mepiboset, “Bagi ietehndu o Raja, aku kalak cempang. Kusuruh mbarenda suruh-suruhenku make pelana keledengku, gelah kuersak ngikutken kam, tapi ihianatina aku. 27Ikatakenna kata guak kerna aku. Tapi kam desken Malekat Dibata, e maka lakokenlah kai akapndu payo. 28Kerina keluarga bapangku patut iukum mate i lebe-lebe Tuanku Raja, tapi iberendu maka aku banci man ras kam. E maka lanai bo lit hakku mindo tole perkuah atendu.”
29Erjabap raja, “Lanai bo perlu ikatakenndu tole man bangku. Enggo kuputusken maka kam ras Siba erbagi tading-tadingen Saul.”
30“Bereken gia man bana kerina,” nina Mepiboset. “Enggo malem ateku erkiteken Tuanku Raja enggo mulih alu mejuah-juah.”
Kiniulin Daud man Barsilai
31Barsilai i Gileat nari pe reh i Rogelim nari ngarakken raja ku lepar Lau Jordan. #2Sam 17:27-29 32Barsilai enggo seh kal tuana, umurna enggo waluh puluh tahun. Ia sekalak si seh kal bayakna, janah enggo isikapkenna pangan raja kidekah raja tading i Mahanaim. 33Nina raja man Barsilai, “Ota ras kita ku Jerusalem, aku si pekena-kena kam.”
34Tapi nina Barsilai njabapsa, “Lanai bo ndekah aku nggeluh. Dage kai gunana kuikutken kam ku Jerusalem Tuanku Raja? 35Umurku enggo waluh puluh tahun, janah lanai kai pe banci erbahanca aku senang. Lanai tercecap aku kai si kupan ras kai si kuinem, lanai kubegi sora kalak rende. Jadi babanndu saja nge ngenca aku pagi, o Raja. 36Lanai aku patut ndatken pemere si bage belinna, e maka kutaruhken saja kam terjeng ngepari Lau Jordan. 37Jenari pelepaslah aku mulih janah mate deherken kuburen orang tuangku. Enda anakku Kimham, jadi suruh-suruhenndu. Baba ia ras kam, janah kuga akapndu si mehulina bage lah bahan man bana.”
38Erjabap raja, “Kubaba dage ia ras aku janah kubahan man bana rikutken sura-surandu. Janah kai atendu minter kubahan.” 39Kenca bage Daud ras kerina anak buahna ngepari Lau Jordan. Ikatakenna mejuah-juah man Barsilai jenari ipasu-pasuna, e maka mulih Barsilai ku kutana.
Juda ras Israel erjengil kerna raja
40Sanga ngepari Lau Jordan, kerina kalak Juda ras setengah kalak Israel ngarakken raja. Kenca seh i lepar lawes ia ku Gilgal, Kimham pe ikut ras ia. 41Kenca bage kerina rayat Israel reh ndahi raja nina man Daud, “O Raja, ngkai maka senina kami kalak Juda erpengakap ia nge si erhak ngalo-ngalo ras ngarakken kam, keluargandu, ras kerina anak buahndu ngepari Lau Jordan?”
42Nina kalak Juda njabapsa, “Ilakoken kami e sabap Raja sada suku ras kami. Dage ngkai maka kam merawa? Labo igalarina nakan kami bage pe labo iberekenna man kami kai pe.”
43Ibalas kalak Israel nina, “Kami sepuluh kali lipat asa si e lit hak kami nandangi Raja Daud aminna pe kam sada suku ras raja. Engkai maka kitik idahndu kami? Ola lupa maka kami nge si perlebena ncakapken kerna maba raja mulih!”
Tapi sekseken kalak Juda asangken kalak Israel.
Currently Selected:
2 SAMUEL 19: BTX
Highlight
Share
Copy
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
