2 KRONIKA 27
27
Jotam raja Juda
(2Raj 15:32-38)
1Jotam jadi raja i bas umur dua puluh lima tahun, jenari merentah ia i Jerusalem lit sepuluh enem tahun dekahna. Gelar nandena e me Jerusa anak Sadok. 2Ilakokenna kai si ngena ate TUHAN sue ras si ibahan bapana; tapi ia la seri ras bapana, la ibahanna dosa alu nutung si merim-merim i bas Rumah Pertoton. Amin bage pe bangsa e lalap nge erbahan dosa.
3Ipajekken Jotam Pintu Gerbang Utara Rumah Pertoton dingen ipekenana tembok kuta Jerusalem si igelari Opel. 4I deleng-deleng Juda, ipantekina kuta-kuta jenari ipajekkenna benteng-benteng ras menara-menara i bas kerangen-kerangen. 5Iperang Jotam raja Amon ras tenterana. Talu ibahanna kalak e. Ipaksana bangsa Amon nggalar upeti tiap tahun lit dekahna telu tahun. Upeti si man galaren bangsa Amon tiap tahun e, e me: 3.400 kilo pirak, 1.000 ton gandum, 1.000 ton jaba. 6Jotam jadi tuhu-tuhu megegeh, erkiteken patuh ia ngikutken TUHAN Dibatana. 7Kejadin-kejadin si deban si jadi kidekah Jotam merentah, peperangen-peperangenna kerina, e isuratken i bas Sejarah Raja-raja Israel ras Raja-raja Juda. 8Sanga Jotam jadi raja umurna duapulu lima tahun jenari merentah ia i Jerusalem lit dekahna sepuluh enem tahun. 9Mate ia jenari ikuburken i Kuta Daud. E maka anakna Ahas nggantiken ia jadi raja.
Currently Selected:
2 KRONIKA 27: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
