2 KRONIKA 26
26
Ussia raja Juda
(2Raj 14:21-22; 15:1-7)
1Kerina rayat Juda milih anak Amasia, e me Ussia si umurna sepuluh enem tahun, lako nggantiken bapana jadi raja. ( 2Kenca enggo mate Amasia, italukenna mulihi kuta Elat jenari ipekenana mulihi kuta e.)
3Ussia jadi raja sanga umur sepuluh enem tahun jenari merentah ia i Jerusalem lit dekahna lima puluh dua tahun. Nandena e me Jekoha i Jerusalem nari. 4Ngikutken kai si ibahan bapana, ilakokenna kai si ngena ate TUHAN. 5Kidekah Sakaria nggeluh, e me si ngajarken ia erkemalangen man TUHAN, isembahna TUHAN alu bulat ukurna e maka ipasu-pasu Dibata ia.
6Ussia erperang ngelawan bangsa Pilisti. Iruntuhkenna tembok kuta Gat, Jamnia ras Asdot, jenari ipajekkenna kuta-kuta si erbenteng deher Asdot ras i bas daerah Pilisti si deban. 7Dibata nampati Ussia naluken bangsa Pilisti, bangsa-bangsa Arab si ringan i Gurbaal bage pe bangsa Meunim. 8Bangsa Amon nggalar pajak man Ussia. Kuasana reh belinna, gelarna terberita seh ku Mesir.
9Ipeteguhi Ussia kuta Jerusalem alu majekken menara i Pintu Gerbang Suki, i Pintu Gerbang Baluren dingen i datas Penjuru. 10Ipajekkenna ka pe menara-menara si erbenteng i mbalmbal jenari melala ikalina sumur, erkiteken lanai lang-lang buena asuh-asuhenna i ture-ture deleng ras i bas taneh kendit si arah Barat. Erkiteken meriah iakapna erjuma iajukna bangsa e nuan anggur i daerah si erdeleng-deleng dingen perjumai daerah si mehumur.
11Nterem tenterana si katawari pe sikap erperang. Kerna si e isuratken sekretarisna Jeiel ras Maseya i bas pengawasen Hananiah e me sekalak pegawai raja. 12Tentera e ipinpin 2.600 komendan. 13Anak buah kalak enda lit 307.500 kalak tentera si beluh kal erperang guna nampati raja i bas ngelawan musuh-musuhna. 14Tentera e iperlengkapi Ussia alu ampang-ampang, lembing, topi waja, baju besi, panah ras anak panahna, dingen batu guna kalimbawang. 15I Jerusalem lit tukangna si erbahan perkakas-perkakas guna manahken anak panah dingen menterken batu si galang i datas menara-menara nari dingen i datas suki-suki tembok kuta nari. Gelar Ussia terberita ku japa pe, bage pe ia enggo megegeh kal erkiteken penampat si ialokenna i bas Dibata nari.
Ussia iukum erkiteken meganjang ukurna
16Tapi kenca Raja Ussia enggo megegeh, turah ukurna meganjang, janah e erbahanca ia ndabuh. Ilawanna TUHAN Dibata alu bengket ku bas Rumah Pertoton guna nutung si merim-merim i babo batar-batar si merim-merim. 17Tapi Imam Asaria itemani waluh puluh imam-imam si megegeh dingen tegas ngikuti raja 18guna ngolang-ngolangi perbahanenna. Nina kalak ndai, “O Ussia! La kap kam banci nutung si merim-merim man TUHAN. Imam-imam kesusuren Harun kap ngenca si enggo itangkuhken ndahiken si enda. Tadingken ingan si badia enda. Enggo ilawanndu TUHAN Dibata e maka lanai kam dat pasu-pasu i bas IA nari.” #Kel 30:7-8; Bil 3:10
19Ussia sangana tedis i bas Rumah Pertoton i tepi batar-batar si merim-merim dingen sangana ijemakna sada perkakas guna nutung si merim-merim. Nembeh kal atena kempak imam-imam e. Jenari minter turah penakit kulit i bas perdempakenna. 20Asaria, bage pe imam-imam si deban sengget kal ngidah perdempaken raja. Jenari ipaksana Ussia nadingken Rumah Pertoton e. Kiam ia ndarat erkiteken TUHAN enggo ngukum ia.
21Erkiteken si e kidekah geluh Raja Ussia lalap lanai bersih rikutken aturen agama erkiteken penakitna e. Erkiteken lanai ia banci bengket ku bas Rumah Pertoton, ringan ia i bas rumahna jine janah kerina tugas-tugasna itangtangi tupung anakna Jotam merentah negeri e.
22Nabi Jesaya anak Amos nuratken kerina si debanna si ilakoken Raja Ussia kidekah ia merentah. 23Mate Ussia jenari ikuburken i bas taneh kuburen raja. Tapi erkiteken penakitna la ia ikuburken i bas kuburen raja-raja. Anakna Jotam nggantiken ia jadi raja. #Jes 6:1
Currently Selected:
2 KRONIKA 26: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
