2 KRONIKA 28
28
Ahas raja Juda
(2Raj 16:1-4)
1Ahas jadi raja asum umurna dua puluh tahun. Ia merentah i Jerusalem sepuluh enem tahun dekahna. La iikutkenna usihen si mejile si ibahan nini-ninina Raja Daud. Tapi ilakokenna si la ngena ate TUHAN 2dingen iusihna si ibahan raja-raja Israel.
Ibahanna gana-gana Baal i bas logam nari. 3Itutungna si merim-merim i Baluren Hinom. Janah lebih asang si e anak-anakna pe ijadikenna jadi persembahen tutungen man berhala-berhala ngusih perbahanen si macik si ibahan bangsa-bangsa si enggo ipelawes TUHAN i bas negeri e nari tupung bangsa Israel bengket ku je. 4Ipersembahken Ahas persembahen dingen nutung si merim-merim i bas ingan ersembah kalak perbegu, i datas uruk-uruk ras i teruh tiap batang kayu si mbur bulungna.
Juda erperang ngelawan Siria ras Israel
(2Raj 16:5)
5-6Erkiteken dosa Raja Ahas, TUHAN Dibatana pelepas raja Siria naluken Ahas. Nterem kal bangsa Juda jadi tabanen ibaba raja Siria mulih ku Damaskus. TUHAN pe pelepas raja Israel Pekah anak Remalia, naluken Ahas. E maka ibunuh Pekah tentera Juda si mbisana teremna lit 120.000 kalak i bas sada wari saja. Si enda ipelepas TUHAN Dibata jadi, erkiteken kalak Juda enggo nadingken IA. #2Raj 16:5; Jes 7:1 7Sekalak tentera Israel gelarna Sikri, munuh anak Ahas si dilaki e me Maaseia; munuh kepala si ngaturken istana gelarna Asrikam; munuh Elkana, e me tangan kanan raja. 8Aminna pe kalak Juda teman sada bangsa kalak Israel, itangkap tentera Israel 200.000 diberu ras danak-danak jadi tabanen jenari ibabana ku Samaria radu ras barang-barang si seh kal buena.
Nabi Oded
9Lit sekalak dilaki gelarna Oded ringan i kuta Samaria. Ia sekalak nabi TUHAN. Tentera Israel si sangana mulih maba kalak Juda jadi tabanen, nandangi bengket ku bas kuta e. Ijumpai Oded kalak e nina, “TUHAN Dibata nini-ninindu merawa kempak Juda, e maka ipelepasna kam naluken kalak e. Tapi genduari enggo idah TUHAN Dibata kuga kejamna kam munuhi kalak Juda. 10Janah genduari atendu njadiken dilaki-dilaki dingen diberu-diberu Jerusalem ras Juda e jadi budakndu. La kin ietehndu maka kam pe enggo erbahan dosa ngelawan TUHAN Dibatandu. 11Begikenlah! Tabanen enda kerina turang ras seninandu kap. Suruhlah ia mulih! Adi lang iukum TUHAN kam perban merawa IA.”
12Empat peminpin Israel pe la setuju kerna perbahanen tentera e. Kalak si empat e, e me: Asaria anak Johanan, Berekia anak Mesilemot, Jehiskia anak Salum dingen Amasa anak Hadlai. 13Nina peminpin si empat e, “Ola baba tabanen e ku jenda. Enggo erdosa kita kempak TUHAN, janah kita enggo patut iukum erkiteken belinna dosanta. Genduari ilakokenndu ka atendu si bagena guna nambahi kesalahenta?” 14Erkiteken si e iendesken tentera e tabanen ras barang-barang rampasen e man rayat ras peminpin-peminpinna. 15Jenari peminpin si empat kalak e itugasken lako mbagiken man tabanen e uis si nibuat i bas barang rampasen e nari. Iberekenna man paken tabanen e baju ras sepatu. Iberekenna cukup pangan ras inemenna, janah luka-lukana itambarina alu minak saitun. Kalak si lanai ngasup erdalan itamaken ku das kelede, janah kerina tabanen e ibaba mulihken ku daerah Juda, ku Jeriho, kuta si igelari kuta batang kurma e. Kenca bage mulih kalak Israel ku Samaria.
Ahas mindo penampat man Assur
(2Raj 16:7-9)
16-17Kalak Edom enggo ka mulai merang Juda dingen idatca nterem tabanen. Erkiteken si e Raja Ahas mindo man Tiglat Pileser raja Assur gelah mereken penampat. 18I bas paksa e ka bangsa Pilisti sangana merang kuta-kuta si lit arah Barat ture-ture deleng-deleng Juda ras arah Selatan. Italukenna kuta Bet Semes, Ayalon, bage pe Gederot, ras kuta-kuta Soko, Timna, bage pe Gimso rikut ras kuta-kuta sekelewetna, jenari bangsa Pilisti tetap ringan i je. 19Erkiteken Ahas, raja Juda pediat jadi si nggesuh i bas daerah e, dingen la ia setia man TUHAN, itamaken TUHAN kiniseran man Juda. 20Raja Assur la nggit nampati Ahas. Janah lebih asa si e ilawanna pe Raja Ahas, e maka mberat kal iakapna. 21E maka ibuat Ahas emas i bas Rumah Pertoton ras i bas istana raja nari, dingen i bas rumah-rumah peminpin bangsa e, jenari iberekenna emas e man raja Assur, tapi si enda pe la lit gunana.
Dosa-dosa Ahas
22I bas kiniseran si bage beratna, erkelekna dosa Ahas man TUHAN. 23Ipersembahkenna persembahen man dibata-dibata bangsa Siria, bangsa si enggo naluken ia e. Nina Ahas i bas ukurna, “Dibata-dibata bangsa Siria enggo nampati raja-raja Siria, e maka adi kubereken persembahen man bana, banci jadi aku pe isampatina ka.” Si e mahanca bene ia ras bangsana. 24Tambah si e, ibuatna kerina perkakas Rumah Pertoton jenari iripukkenna. Itutupna Rumah Pertoton, jenari ipajekkenna batar-batar i tiap bagin Jerusalem. 25I bas tiap kuta ras kuta i Juda, ipajekkenna ingan ersembah man berhala kalak perbegu. I je itutungna si merim-merim man dibata-dibata bangsa si deban. Alu bage ilegina pernembeh TUHAN, Dibata nini-ninina, man bana.
26Kerina kejadin si deban sanga ia merentah, bena-benana nari seh ku kedungenna, isuratken i bas Sejarah Raja-raja Juda ras Israel. 27Raja Ahas mate jenari ikuburken i Jerusalem tapi la i bas kuburen raja-raja. Anakna Hiskia nggantiken ia jadi raja. #Jes 14:28
Currently Selected:
2 KRONIKA 28: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
