1 SAMUEL 27
27
Daud i tengah-tengah bangsa Pilisti
1Nina Daud i bas ukurna, “Pagi kedun enda ugapa pe mate aku ibahan Saul. Dage lompatlah aku ku taneh bangsa Pilisti. Alu bage tentu ingadiken Saul ndarami aku i taneh Israel enda, janah aku enggo terkelin.” 2E maka Daud ras 600 kalak temanna minter ndahi Akis anak Maoh, raja Gat. 3Daud ras teman-temanna ringan i Gat ras keluargana. Daud maba ndeharana duana ras ia, Ahinoam i Jesreel nari, ras Abigail, janda Nabal, i Karmel nari. 4Kenca ibegi Saul maka Daud enggo kiam ku Gat, ingadikenna ndarami Daud.
5Nina Daud man Akis, “Adi payo kin kam temanku, bereken dage inganku tading. La lit gunana aku ringan ras kam i bas ibu kuta kerajanndu enda.” 6E maka ibereken Akis man bana kuta Siklak janah erkite-kiteken si e, mulai i bas paksa e nari, kuta Siklak enggo jadi sikerajangen raja Juda. 7Daud ringan i taneh Pilisti sepuluh enem bulan dekahna.
8Kidekah si e Daud ras temanna merangi bangsa-bangsa Gesur, Girsi, ras Amalek si enggo ndekah kal ringan i bas daerah e. Iserbu Daud negeri bangsa-bangsa e seh ku Sur, ras ku kerina dalan ngincuah ku Mesir. 9Ibunuhna kerina dilaki ras diberu janah ibuatna biri-birina, lembuna, keledena, untana, ras uisna. Kenca bage mulihken ka ia ndahi Akis, 10si nungkuni ia nina, “Taneh si apai ka enggo iserangndu?” Jenari ituriken Daud man bana maka ia enggo lawes ku daerah bagin Selatan Juda ntah pe ku daerah Jerahmeel ntah pe ku daerah ingan kalak Keni tading. 11La lit sekalak pe ipelepas Daud nggeluh, bali dilaki bage pe diberu, seh maka la lit sekalak pe banci ku Gat janah ngelaporken kai kin si tuhuna si enggo ilakoken Daud ras teman-temanna. Enda me kai si ilakoken Daud kidekah ia ringan i taneh Pilisti. 12Tapi tek Akis man Daud janah nina i bas ukurna, “Seh kal segatna ate bangsana Israel man bana, e maka la banci lang tetap nge ia jadi suruh-suruhenku kidekah geluhna.”
Currently Selected:
1 SAMUEL 27: BTX
Highlight
Share
Copy
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
