1 SAMUEL 28
28
1Lanai ndekah kenca si e, ipepulung bangsa Pilisti tenterana guna merang Israel, janah nina Akis man Daud, “Tentu enggo iertindu maka kam ras teman-temanndu la banci la erperang arah pihakku.”
2“Tentu,” nina Daud ngaloi. “Suruh-suruhenndu kap aku, janah idahndu jine me pagi kai si ngasup aku erbahanca.”
Nina Akis, “Mehuli! Kujadiken kam tetap jadi pengawalku.”
Saul nungkun man guru si baso
3Samuel enggo mate, janah kerina bangsa Israel nangisi ia janah enggo ia ikuburken i bas kutana jine i Rama. Kerina kalak si beluh ngoge nasip ras guru-guru si baso enggo ipaksa Saul nadingken Israel. #Im 20:27; Ul 18:10-11; 1Sam 25:1
4Tentera bangsa Pilisti pulung dingen erkemah deherken kuta Sunem; ipepulung Saul bangsa Israel jenari erkemah ia i Deleng Gilboa. 5Kenca idah Saul tentera bangsa Pilisti, seh kal ia biarna, 6e maka isungkunna TUHAN kai arus ibahan. Tapi la ialoi TUHAN ia, subuk arah nipi bage pe arah Urim ras Tummim tah pe arah nabi-nabi. #Bil 27:21 7Kenca bage iperentahken Saul man pegawai-pegawaina nina, “Daramilah sekalak diberu guru si baso, ateku nungkun ia.”
“I Endor lit sekalak,” nina kalak ndai ngaloi.
8E maka erbuni-buni me Saul; pakenna lain ibahanna, jenari kenca enggo gelap lawes ia ras dua kalak temanna njumpai diberu ndai. “Sungkunlah begu-begu janah turikenlah man bangku kai si nandangi jadi,” nina Saul man bana. “Dilolah begu kalak si kugelari.”
9Nina diberu ndai ngaloi, “Tentu enggo ietehndu kai si enggo ibahan Raja Saul, kuga enggo ipaksana kalak si beluh ngoge nasip ras guru si baso nadingken Israel. Engkai dage maka idaramindu dalan namaken aku ku bas siding gelah aku ibunuh?”
10Kenca bage, “Erkite-kiteken TUHAN si nggeluh erpadan aku maka la kam iukum perbahan ngelakoken si enda,” nina man bana.
11“Ise kin si arus kudilo man bandu?” nina diberu ndai nungkun.
“Samuel,” nina ngaloi.
12Kenca idah diberu ndai Samuel, nderkuh ia janah nina man Saul, “Engkai maka itipundu aku? Kam kap Raja Saul!”
13“Ola kam mbiar,” nina raja man bana. “Kai kin si idahndu?”
“Kuidah begu keke i bas taneh nari,” nina ngaloi.
14“Uga tempasna?” nina Saul nungkun.
“Sekalak tua-tua sangana keke,” nina njabapsa. “Ia make jubah.”
Kenca bage enggo ieteh Saul maka Samuel me e, jenari mungkuk ia seh ku taneh nuduhken kehamatenna.
15Nina Samuel man Saul, “Engkai maka iganggundu aku? Engkai maka isuruhndu aku mulih?”
Ngaloi Saul, “Aku sangana i bas kesusahen si mbelin! Kalak Pilisti sangana erperang ras aku, janah Dibata enggo nadingken aku. Lanai ialoiNa aku, subuk arah nabi-nabi bage pe arah nipi. Janah erkite-kiteken si e enggo kudilo kam, gelah iturikenndu man bangku kai arus kubahan.”
16Nina Samuel, “Engkai maka idilondu aku sedang TUHAN enggo nadingken kam janah enggo jadi musuhndu? 17Enggo ibahan TUHAN man bandu kai si enggo iturikenNa man bandu arah aku, Enggo ibuatNa kerajan e i bas kam nari jenari iberekenNa man Daud. #1Sam 15:28 18Isimbakndu pedah TUHAN janah la ikernepkenndu seh keri kalak Amalek ras kerina si lit i bas ia. Em sabapna maka ilakoken TUHAN enda genduari man bandu. #1Sam 15:3-9 19IdudurkenNa kam ras Israel man bangsa Pilisti. Pagi kam ras anak-anakndu la banci la ersada ras aku, janah tentera Israel pe la banci la idudurken TUHAN man bangsa Pilisti.”
20Minter mbulak Saul jenari terdang i babo taneh, lanai kal lang-lang biarna erkite-kiteken kai si enggo ikataken Samuel. Kote kal ia, sabap kai pe la ipanna sada berngi. 21Idahi diberu ndai ia janah erkite-kiteken idahna mbiar kal ia nina man Saul, “Enggo kuasamken kesahku ngelakoken kai si ipindondu, Bapa. 22Genduari ngarap aku, maka ibahanndu kai si kupindo. Berelah maka kusikapken pangan sitik man bandu. La banci la man kam gelah cukup gegehndu erdalan.”
23Tapi la ia nggit janah ikatakenna maka la atena man kai pe. Tapi pegawai-pegawaina pe meseksek nuruh ia gelah man. Kedungenna nggit ia, keke ia i taneh nari, jenari kundul i bas ingan medem. 24Pedas-pedas igeleh diberu ndai sada anak lembu si mbur. Kenca bage ibuatna tepung, iadukna, jenari ibahanna jadi roti si la erragi. 25Iidangkenna pangan e ku lebe-lebe Saul ras pegawai-pegawaina, jenari man ia kerina. Kenca e mulih ia i bas berngi e ka.
Currently Selected:
1 SAMUEL 28: BTX
Highlight
Share
Copy
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
